ލުބްނާނަށް ހަމަލާ ދީފި ނަމަ އިޒްރޭލަށް ހަމަލާދޭނެ ކަމުގެ އިންޒާރު އީރާނުން ދީފި

އިޒްރޭލުން ލުބުނާނަށް ހަމަލާ ދީފި ނަމަ، މުޅި ސަރަހައްދުގެ ހުރިހާ ބާރުތައް ގުޅިގެން އިޒްރޭލަށް ހަމަލާދޭނެ ކަމުގެ އިންޒާރު އީރާނުން އިޒްރޭލަށް ހޮނިހިރު ދުވަހު ދީފިއެވެ.

އީރާނުން ބުނީ ސަރަހައްދުގެ ހުރިހާ ޖަމާއަތްތަކެއް ހިމެނޭ ގޮތުން އެންމެން އެކުގައި އިޒްރޭލަށް ހަމަލާން ދޭން ތައްޔާރަށް ތިބި ކަމަށެވެ.

ނިއުޔޯކުގައި ހުންނަ އީރާނުގެ މިޝަން އިން މި އިންޒާރު އިޒްރޭލަށް ދިން އިރު، ލުބްނާނުގެ ހިޒްބުﷲ ޖަމާއަތާ އިޒްރޭލާ ދެމެދުގެ ބަހުގެ ހަމާލާތައް ހޫނުވެ، އިޒްރޭލާއި ލުބުނާން އާ ދެމެދު ހަނގުރާމައެއް ފެށުމުގެ ބިރުވަނީ އުފެދިފައެވެ. އަނެއްކޮޅުން، ގާޒާގައި އިޒްރޭލުން ހަނގުރާމަ ފެށިފަހުން ކޮންމެ ދުވަހަކު ކަހަލަ ގޮތަކަށް އިޒްރޭލާ ހިޒްބުﷲ އާ ދެމެދު ހަމަލާތައް ބަދަލު ކުރެވޭކަން ފާހަގަ ކުރެވެއެވެ.

ދެފަރާތުގެ ދެމެދުގެ މަސްރަހް އެންމެ ބޮޑަށް ހޫނުވެގެން ދިޔައީ ޖޫން މަހުގެ ތެރޭގައެވެ. އިޒްރޭލުން ބުނެފައިވަނީ ލުބުނާނަށް ހަމަލާ ދިނުމުގެ ޕްލޭން އިޒްރޭލުގެ އަސްކަރިއްޔާ އިން މިހާރު ވަނީ ފާސްކޮށްފައި ކަމަށެވެ. އެއާއެކު ހިޒްބުﷲ އިން ބުނެފައިވަނީ ލުބުނާނާ ދެކޮޅަށް ހަނގުރާމަ ފަށައިފި ނަމަ އިޒްރޭލުގެ އެއްވެސް ތަނެއް ސަލާމަތުން ނުބަހައްޓާނެ ކަމަށެވެ.

ނިއުޔޯކް ގައި ހުންނަ އީރާނުގެ މިޝަން އިން 'އެކްސް" ގައި ކޮށްފައިވާ ޕޯސްޓެއްގައި ބުނެފައިވަނީ ޔަހޫދީ ދައުލަތުން ލުބުނާނަށް ހަމަލާ ދޭނެ ކަމަށް ފަތުރާ ޕްރޮޕަގެންޑާ އަކީ ނަފްސާނީ ހަނގުރާމަ އެއް ކުރުމުގެ ގޮތުން ކުރާ ކަމެއް ކަމަށާއި، އެހެން ނަވެސް އިޒްރޭލުން ފުރިހަމަ ހަނގުރާމަ އެއް ފަށައިފި ނަމަ، އިޒްރޭލަށް ގެއްލުން ބޮޑު ހަނގުރާމައަކަށް އެ ހަނގުރާމަ ހަދާނެ ކަމީ ޔަގީން ކަމެއް ކަމަށާއި، އެކަން ކުރުމަށް ހުރިހާ އޮޕްޝަން އެއްގެ ބޭނުން އީރާނުން ހިފާނެ ކަމަށެވެ.

އީރާން އެހީތެރިވާ ހިޒްބުﷲ ގެ އިތުރުން، ސަރަހައްދުގެ އެހެން ބައެއް ގަމުތަކުގައި އުފެދިފައިވާ ހަނގުރާމަވެރި ޖަމާއަތްތަކަކީ ވެސް އީރާނުގެ އެހީތެރިކަން ލިބެމުން އަންނަ ޖަމާއަތްތަކެއްގެ ގޮތުގައި އަންނަނީ ބެލެމުންނެވެ. މިގޮތުން އީރާނުން މަދަދުވެރިވާ ޔަމަންގެ ހޫތީން ގެންދަނީ، ގާޒާގެ ރައްޔިތުންނާ ބައިވެރިވުމުގެ ގޮތުން ރަތް ކަނޑުން ދަތުރުކުރާ އާގު ބޯޓު ފަހަރަށް އަމާޒުކޮށް ވަރަށް ގާތްގާތުގައި ހަމާލާތައް ދެމެންނެވެ.

ލުބުނާނާ ދެކޮޅަށް އިޒްރޭލުން ހަނގުރާމަ ފަށާފާނެ ކަމުގެ އަޑުތައް ގަދަވެފައިވާއިރު، އިޒްރޭލާއި އީރާނަކީ ބޮޑު ދެ ހަތުރުންގެ ގޮތުގައި ބެލެވޭ ދެ ގައުމެވެ. ދޭތެރެ ދޭތެރެއިން މި ގޮތުން އެއް ގައުމުން އަނެއް ގައުމަށް ހަމަލާތައް ދެމުންދާކަން ފާހަގަ ކުރެވެއެވެ.

މިއަހަރުގެ އޭޕްރީލް މަހު ދިމިޝްގް ގައި ހުންނަ އީރާނުގެ ކޮންސިއުލޭޓަށް އިޒްރޭލުން ދިން ހަމަލާއެއް ގައި އީރާނުގެ ރިވޮލިއުޝަނަރީ ގާޑުންގެ 7 މެމްބަރުން ވަނީ މަރުވެފައެވެ. އޭގެ ތެރޭގައި އީރާނުގެ 2 ޖެނެރަލުން ވެސް ހިމެނެއެވެ.

މި ހަމަލާ އަށް ބަދަލު ހިފުމުގެ ގޮތުން އީރާނުން އޭޕްރީލް 13 ވަނަ ދުވަހާއި 14 ވަނަ ދުވަހު ފުލުފުލުގައި ޑްރޯން އާއި ރޮކެޓް ހަމަލާތައް އިޒްރޭލަށް ވަނީ ދީފައެވެ.