މޫނަށް ކަނދުރާއަށް ނުބަލައި ކޮރަޕްޝަންގެ ތުހުމަތުތައް ބައްލަވާ، ދައުލަތުގެ ބައި ލާރިއެއްގައިވެސް ނުޖެހެން: ރައީސް ސާލިޙު
ސަރުކާރުން ގެންދަނީ ނިމިދިޔަ ވެރިކަމާ ގުޅުވައި ކޮރަޕްޝަންގެ ތުހުމަތުކޮށް، އެ މައްސަލަތައް ބަލާނެކަމަށް ބުނަމުން
ކުރީގެ ރައީސް އަދި އެމްޑީޕީގެ އިސް އެޑްވައިޒަރ އިބްރާހިމް މުޙައްމަދު ސާލިޙު
މޫނަށް ކަނދުރާއަށް ނުބަލައި ކޮރަޕްޝަންގެ ތުހުމަތުތައް ބެއްލެވުމަށް އެދިވަޑައިގަންނަވާ ކަމަށާއި، ދައުލަތުގެ ބައި ލާރިއެއްގައިވެސް ޖެހިވަޑައިގެންފައި ނުވާނެކަމަށް ކުރީގެ ރައީސް އަދި އެމްޑީޕީގެ އިސް އެޑްވައިޒަރ އިބްރާހިމް މުޙައްމަދު ސާލިޙު ވިދާޅުވެއްޖެއެވެ.
މިއަދުގެ ސަރުކާރުން ގެންދަނީ ނިމިދިޔަ ވެރިކަމާ ގުޅުވައި ކޮރަޕްޝަންގެ ތުހުމަތުކޮށް، އެ މައްސަލަތައް ބަލާނެކަމަށް ބުނަމުންނެވެ.
އެކަމާ ގުޅޭގޮތުން ބުދަ ދުވަހު ރާއްޖެޓީވީގެ ފަށާއިރު ޕްރޮގްރާމްގައި ވާހަކަ ދައްކަވަމުން ރައީސް ސާލިޙު ވިދާޅުވީ، އެމަނިކުފާނުގެ އެދިވަޑައިގަތުމަކީވެސް "މޫނަށް ކަނދުރާއަށް" ބެއްލެވުމެއް ނެތި މައްސަލަތައް ބެއްލެވުން ކަމަށެވެ.
މައްސަލަ ބަލާނެކަމުގެ އިންޒާރުތަކާމެދު އެއްވެސް ކަހަލަ ކަންބޮޑުވުމެއް ނެތްކަން ފާހަގަ ކުރައްވައި ރައީސް ސާލިޙު ވިދާޅުވީ، އެމަނިކުފާނު ނުޙައްޤުން ބައި ލާރިއެއްވެސް ނަންގަވާފައި ނުވާނެ ކަމަށެވެ.
އަދި އެމަނިކުފާނުގެ ސަރުކާރާމެދުވެސް އެ ޔަޤީންކަން އޮތްކަން ރައީސް ސާލިޙު ފާހަގަ ކުރެއްވިއެވެ.
ރައީސް އެހެން ވިދާޅުވެފައިވާއިރު، ނިމިދިޔަ ސަރުކާރުގައި ފެނަކައިގައި ހިންގާފައިވާކަމަށް ތުހުމަތު ކުރާ ކޮރަޕްޝަންގެ މައްސަލަތައް ބެލުމަށް ބުދަ ދުވަހުގެ މަޖިލިސް ޖަލްސާއަށް ކުއްލި މައްސަލައެއްވެސް ހުށަހަޅައި ބަހުސް ކޮށްފައިވެއެވެ.
