އަލްބޭނިއާ ގައި މުސްތަޤުބަލެއް އޮތް ކަމަށް، އެ ޤައުމުގެ ކޯޗު ސިލްވީނިއޯ ބުނެފި އެވެ.
އޭނާ މިހެން ބުނީ މިހާރު ޖަރުމަނުގައި ކުރިއަށްދާ ޔޫރޯ ފުޓުބޯޅަ މުބާރާތުގެ ގްރޫޕް ސްޓޭޖުގެ ތިން ވަނަ މެޗުގައި ސްޕެއިން އާ ދެކޮޅަށް ކުޅުމަށްފަހު އެވެ. އެ މެޗުން އަލްބޭނިއާ ބަލިވެފައި ވާއިރު، އެ ޓީމު އޮތީ ޕޮއިންޓަކާއެކު ގްރޫޕް ބީގެ ފުލުގަ އެވެ. އަލްބޭނިއާ އަށް ވަނީ އެ ހިސާބުން މުބާރާތް ނިމިފަ އެވެ.
ސްޕެއިން މެޗަށްފަހު އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުން ސިލްވީނިއޯ ބުނީ، އަލްބޭނިއާ ގައި ވަރަށް ގިނަ ޒުވާން ކުޅުންތެރިން ތިބި ކަމަށެވެ. ޚާއްސަކޮށް އެ ޓީމުގައި ވަރަށް ރަނގަޅު މުސްތަޤުބަލެއް އޮތްކަން ވެސް އޭނާ ވަނީ ފާހަގަކޮށްފަ އެވެ. ސިލްވީނިއޯ ބުނީ އެ ކުޅުންތެރިންގެ ނަން ފާހަގަ ކުރަން އޭނާ ބޭނުން ނުވާ ކަމަށާއި، އެ ޓީމުގައި ތިބީ ރަނގަޅު ކުޅުންތެރިން ކަމަށެވެ. އަދި އެކަމާ އޭނާ ވަރަށް އުފާވާ ކަމަށް ވެސް ސިލްވީނިއޯ ބުންޏެވެ.
ޔޫރޯ މުބާރާތުގައި އަލްބޭނިއާގެ ކުޅުންތެރިން ދެއްކި ކުޅުމަށް އިޝާރާތްކޮށް ސިލްވީނިއޯ ބުނީ، ކުޅުންތެރިންގެ ކުޅުމާ މެދު އޭނާ ހިތްހަމަ ޖެހޭ ކަމަށެވެ. ޚާއްސަކޮށް އެންމެ ފަހު މެޗުގައި ސްޕެއިންއާ ދެކޮޅަށް ކުޅުނުއިރު، އެ މެޗު ވަރަށް އުނދަގޫކަން އޭނާ ފާހަގަ ކުރި އެވެ. އެހެން ނަމަވެސް، ސްޕެއިންއާ ދެކޮޅަށް ވެސް އަލްބޭނިއާ އިން ދެއްކި ކުޅުމަކީ އޭނާ ހިތްހަމަ ޖެހޭ ކުޅުމެއް ކަމަށް ސިލްވީނިއޯ ވަނީ ބުނެފަ އެވެ.
މީގެ އިތުރުން ސިލްވީނިއޯ ބުނީ، މީގެ ތިން މަސް ނުވަތަ ހަތަރު މަސް ކުރިއަށް ބަލާއިރު، އަލްބޭނިއާގެ ކުޅުން ތަފާތު ކަމަށެވެ. އޭރު އަލްބޭނިއާ އިން ދައްކަމުން އައި ކުޅުމަށް ބަލާއިރު، މުބާރާތުގައި އެ ޓީމުން ކުޅުނު ކޮންމެ މެޗެއްގައި ވެސް ތިން ލަނޑު އެ ޓީމު ކޮޅަށް ވަންނާނެ ކަމަށް ގިނަ ބަޔަކު އަންދާޒާ ކޮށްގެން ތިބި ކަމަށް ސިލްވީނިއޯ ބުންޏެވެ. އެހެން ނަމަވެސް އެކަން އެހެން ނުވީ އަލްބޭނިއާގެ ކުޅުންތެރިން މުބާރާތަށް، އަދި މެޗުތަކަށް ފޯކަސް ކޮށްގެން ކުރި މަސައްކަތުގެ ސަބަބުން ކަމަށް އޭނާ ބުންޏެވެ.
އިތުރަށް ސިލްވީނިއޯ ބުނީ، ކުރިއަށް އޮތް ދުވަސްތަކުގައި ވެސް މަސައްކަތް ކުރާނީ، މިހާތަނަށް ކުރަމުން އައި މަސައްކަތް ކަމަށެވެ. ޚާއްސަކޮށް، ހުނަރުވެރި ކުޅުންތެރިންގެ މައްޗަށް އެކުލެވިގެންވާ އަލްބޭނިއާ، އިތުރަށް ކުރިއަށް ގެންދިޔުމަށް އޭނާ މަސައްކަތް ކުރާނެ ކަމަށް ވެސް ސިލްވީނިއޯ ބުންޏެވެ.
މުބާރާތުގެ ފުރަތަމަ މެޗުގައި އަލްބޭނިއާ ވަނީ އިޓަލީ އަތުން ބަލިވެފަ އެވެ. އެ މެޗުގައި ފުރަތަމަ ލަނޑު ޖަހައި ކުރި ހޯދީ ވެސް އަލްބޭނިއާ އިންނެވެ. ނަމަވެސް އިޓަލީން ފަހަތުން އަރައި ދެ ލަނޑު ޖަހައިގެން ވަނީ މޮޅުވެފަ އެވެ. ދެ ވަނަ މެޗުގައި އަލްބޭނިއާ އިން ކްރޮއޭޝިއާ އާ އެއްވަރު ކުރިއިރު، ފަހު މެޗުގައި ސްޕެއިން އަތުން ބަލިވެފަ އެވެ.
