ޔޫރޯ ފުޓުބޯޅަ މުބާރާތުގެ ގްރޫޕް ސްޓޭޖުގެ ފުރަތަމަ މެޗުގައި އިންގްލެންޑާ ދެކޮޅަށް ސާބިއާގެ ކުޅުންތެރިން ދެއްކި ކުޅުމާ މެދު ފަޚުރުވެރިވާ ކަމަށް އެ ޓީމުގެ ކޯޗު ޑްރަގަން ސްޓޮޖްކޯވިޗް ބުނެފި އެވެ.

މުބާރާތުގެ ފުރަތަމަ މެޗުގައި އާދިއްތަ ދުވަހުގެ ރޭ އިންގްލެންޑާ ވާދަކޮށް ސާބިއާ ބަލިވެފައި ވަނީ 1-0ންނެވެ. މެޗުގައި ސާބިއާ އިން ވަނީ ރަނގަޅަށް ކުޅެ، ލަނޑު ޖަހާނެ ފުރުސަތުތަކެއް ވެސް ތަނަވަސްކޮށްފަ އެވެ.

މެޗަށް ފަހު އޮތް ނޫސްވެރިންގެ ބައްދަލުވުމުގަައި ވާހަކަ ދައްކަމުން ސްޓޮޖްކޯވިޗް ބުނީ، އެ މެޗަކީ ވަރަށް ރަނގަޅު މެޗެއް ކަމަށެވެ. ދެ ޓީމުގެ ފަރާތުން ވެސް ވާދަވެރި އަދި ރަނގަޅު ކުޅުމެއް އެ މެޗުގައި ފެނުނު ކަމަށް އޭނާ ވަނީ ބުނެފަ އެވެ.

އިންގްލެންޑާ ގުޅޭ ގޮތުން އޭނާ ބުނީ، އެ ޓީމަކީ ވަރަށް ރަނގަޅު އަދި އެހާމެ ވަރުގަދަ ޓީމެއް ކަމަށެވެ. އެހެންނަމަވެސް, އިންގްލެންޑާ ދެކޮޅަށް ސާބިއާގެ ކުޅުންތެރިން ކުޅުނީ ވަރަށް ހިތްވަރުގަދަ ކުޅުމެއް ކަމަށާއި، އެއީ ސާބިއާ އިން ބޭނުންވި ފުޓުބޯޅަ ކަމަށް ވެސް ސްޓޮޖްކޯވިޗް ވަނީ ބުނެފަ އެވެ.

އިތުރަށް އޭނާ ބުނީ, ސާބިއާ އަށް އެމީހުން ބޭނުންވާ ހިސާބަކަށް އާދެވިފައި އޮތީ އެ ބަދަލުތަކުގެ ސަބަބުން ކަމަށެވެ. ހާއްސަކޮށް އެ މެޗުގައި ސާބިއާ އިން ވެސް ބޯޅަ ރަނގަޅަށް ހިފަހައްޓައިގެން ކުޅެ، އިންގްލެންޑަށް ޑިފެންސް ކުރުމުގައި އުނދަގޫތަކެއް ކުރިމަތި ކުރުވި ކަމަށް އޭނާ ބުންޏެވެ.

މުޅި މެޗަށް ބަލާއިރު، ގެއްލުނީ ހަމައެކަނި މޮޅު ކަމަށް ވެސް އޭނާ ބުންޏެވެ. އެހެންނަމަވެސް، އިންގްލެންޑާ ދެކޮޅަށް ސާބިއާގެ ކުޅުންތެރިން ދެއްކި ކުޅުމާއި، އެ ކުޅުންތެރިން ކުރި މަސައްކަތާ މެދު ފަޚުރުވެރިވާ ކަމަށް ވެސް ސްޓޮޖްކޯވިޗް ވަނީ ބުނެފަ އެވެ. އޭނާ ބުނީ މެޗުން ސާބިއާ ބަލިވި ނަމަވެސް، ހިތްވަރު ދޫކޮށް ނުލާ އެ ޓީމުން ކުރިއަށް ދާނެ ކަމަށެވެ.

މުބާރާތުގެ ގްރޫޕް ސީ ގައި ސާބިއާ ކުޅޭ ދެވަނަ މެޗުގައި އެ ޓީމު ނިކުންނާނީ މި މަހުގެ 20 ވަނަ ދުވަހު ސްލޮވޭނިއާ އާ ދެކޮޅަށެވެ. ސްލޮވޭނިއާ ކުޅުނު ފުރަތަމަ މެޗުން އެ ޓީމު ވަނީ އެއްވަރުވެފަ އެވެ.