ރަށު ރައްޔިތުންނާއި ބައްދަލުނުކުރަން ތޮއްޑޫ ކައުންސިލް ބަންދުކުރުމުން ހިންގި ހަމަނުޖެހުންތަކާއި ގުޅިގެން 8 މީހަކު ހައްޔަރުކޮށްފި

ރަށު ރައްޔިތުންނާ ބައްދަލުނުކުރަން ވެގެން ތޮއްޑޫ ކައުންސިލް ބަންދުކޮށް ހިނގި ހަމަނުޖެހުންތަކާ ގުޅިގެން އެރަށުގެ 8 މީހަކު ހައްޔަރުކޮށްފިއެވެ.

ހޯމަ ދުވަހު ފުލުހުން ބުނީ ތޮއްޑޫ ކައުންސިލް އިދާރާގެ ފުރާޅަށް ގާ އުކައި ހަމަނުޖެހުން ހިންގި މައްސަލައާ ގުޅިގެން ކޯޓު އަމުރެއްގެ ދަށުން 8 މީހަކު ހައްޔަރުކޮށްފައިވާ ކަމަށެވެ.

މިމައްސަލަ ފުލުހުން ދަނީ އިތުރަށް ތަހުގީގު ކުރަމުންނެވެ.

ތޮއްޑޫގެ ދަނޑުވެރިންނާ ކައުންސިލްގެ ރައީސް އަހުމަދު ކަރަމް ބައްދަލުނުކުރަން ވެގެން ކައުންސިލް އިދާރާ ބަންދުކޮށް ފުލުހުން ވަނީ ފޯރިމަރާފައެވެ. 2024 ޖޫން 5 ވީ ބުދަ ދުވަހު ކައުންސިލުން ރައްޔިތުންގެ ބައްދަލުވުމެއް މެންދުރު 1:00 ގައި ބާއްވަން ކައުންސިލްގެ ރައީސް ނިންމާފައިވާތީ 1 ޖެހި އިރު ރައްޔިތުން ކައުންސިލް އިދާރާއަށް ދިޔައިރު ކައުންސިލް ބަންދުކޮށް ތަޅުލާފައި އެތަނުގައި ކައުންސިލުން އެދިގެން ފުލުހުން ސެކިއުރިޓީ ވަނީ ބަލަހައްޓާފައެވެ.

އެ މައްސަލައާ ގުޅިގެން ގިނަ އަދަދެއްގެ ރައްޔިތުން ހިތްހަމަނުޖެހުންތަކާ ގުޅިގެން އެދުވަހު ކައުންސިލް އޮފީސް ކައިރީގައި ވަނީ މުޒާހަރާކޮށްފައެވެ. މި މުޒާހަރާ ހޫނުވެ، އޮފީހުގެ ދޮރު ވެސް ތަޅާލާފައިވެއެވެ. އަދި މި މުޒާހަރާގެ ތެރެއިން ފުލުހަކަށް ވެސް އަނިޔާވެފައިވެއެވެ.

މީގެ އިތުރުން ތޮއްޑޫ އިން ދަނޑުވެރިކަމަށް ބިން ދޫކުރަން މަސައްކަތްކުރާ ގޮތާ މެދު ހުރި ހިތްހަމަނުޖެހުންތަކާ ގުޅޭގޮތުން ޕެޓިޝަނެއް އެކުލަވާލުމުގެ މަސައްކަތް ވަނީ ފަށާފައެވެ.

ތޮއްޑޫގެ ގޮއިގަނޑު ބިން ދޫކުރުމުގެ މަސައްކަތްނުކޮށް ތޮއްޑޫ ކައުންސިލުން ގަސްތުގައި ލަސްކުރާ ކަމަށް އެ ރަށުގެ ބައެއް އާންމުން ދަނީ ބުނަމުންނެވެ. ރާއްޖެއެމްވީ އާ ވާހަކަދެއްކި ބައެއް އާންމުން ބުނެފައި ވަނީ މީގެކުރިން އެ ބިން ދޫކުރާ މުއްދަތު ހަމަވާ އިރަށް އެހެން ފަރާތަކަށް އެ ބިން ދޭ ކަމަށެވެ. އަދި މިހާރު އެ ބިން ބޭރުގެ ބަޔަކަށް ދޭން ކައުންސިލުން މަސައްކަތް ކުރާ ކަމަށް ބައެއް އާންމުން ތުހުމަތުކުރެއެވެ. އާންމުން އެދެމުން ދަނީ އާންމުންނަށް އެ ބިން ފަސް އަހަރު ދުވަހަށް ދޫކޮށްދިނުމަށެވެ. ދަނޑުވެރިން ގަބޫލުކުރާ ގޮތުގައި އާންމުންނަށް އެންމެ ފައިދާ ހުރި ގޮތަށް ބިން ދޫކުރެވޭނީ އާންމުންނާ މަޝްވަރާކޮށްގެންނެވެ.