ތޮއްޑޫ އިން ދަނޑުވެރިކަމަށް ބިން ދޫކުރި ގޮތާ މެދު ހުރި ހިތްހަމަނުޖެހުންތަކާ ގުޅޭގޮތުން ޕެޓިޝަނެއް އެކުލަވާލަނީ
ތޮއްޑޫގެ ގޮއިގަނޑު ބިން ދޫކުރުމުގެ މަސައްކަތް ނުކޮށް ތޮއްޑޫ ކައުންސިލުން ގަސްތުގައި ލަސްކުރާ ކަމަށް އެ ރަށުގެ ބައެއް އާންމުން ދަނީ ބުނަމުން
ތޮއްޑޫގެ ބިން ބަހާ ގޮތުން ދަނޑުވެރިން ދަނީ ހިތްހަމަނުޖެހުން ފާޅުކުރަމުން
ތޮއްޑޫ އިން ދަނޑުވެރިކަމަށް ބިން ދޫކުރަން މަސައްކަތްކުރާ ގޮތާ މެދު ހުރި ހިތްހަމަނުޖެހުންތަކާ ގުޅޭގޮތުން ޕެޓިޝަނެއް އެކުލަވާލުމުގެ މަސައްކަތް ފަށައިފިއެވެ.
ތޮއްޑޫގެ ގޮއިގަނޑު ބިން ދޫކުރުމުގެ މަސައްކަތް ނުކޮށް ތޮއްޑޫ ކައުންސިލުން ގަސްތުގައި ލަސްކުރާ ކަމަށް އެ ރަށުގެ ބައެއް އާންމުން ދަނީ ބުނަމުންނެވެ. ރާއްޖެއެމްވީ އާ ވާހަކަދެއްކި ބައެއް އާންމުން ބުނެފައި ވަނީ މީގެކުރިން އެ ބިން ދޫކުރާ މުއްދަތު ހަމަވާ އިރަށް އެހެން ފަރާތަކަށް އެ ބިން ދޭ ކަމަށެވެ. އަދި މިހާރު އެ ބިން ބޭރުގެ ބަޔަކަށް ދޭން ކައުންސިލުން މަސައްކަތް ކުރާ ކަމަށް ބައެއް އާންމުން ތުހުމަތުކުރެއެވެ. އާންމުން އެދެމުން ދަނީ އާންމުންނަށް އެ ބިން ފަސް އަހަރު ދުވަހަށް ދޫކޮށްދިނުމަށެވެ. ދަނޑުވެރިން ގަބޫލުކުރާ ގޮތުގައި އާންމުންނަށް އެންމެ ފައިދާ ހުރި ގޮތަށް ބިން ދޫކުރެވޭނީ އާންމުންނާ މަޝްވަރާކޮށްގެންނެވެ.
ރާއްޖެއެމްވީ އާ ވާހަކަދެއްކި ތޮއްޑޫގެ ދަނޑުވެރިއެއް ކަމަށްވާ އަލީ ނަޝީދު ބުނީ ތޮއްޑޫ އިން ދަނޑުވެރިކަމަށް ބިން ދޫކުރާ ގޮތާ މެދު އާންމުންގެ ބޮޑެތި ކަންބޮޑުވުންތަކެއް އެބަހުރި ކަމަށެވެ. އެކަމާ ގުޅޭގޮތުން ކައުންސިލާ މަޝްވަރާކުރުމަށް ތަކުރާރުކޮށް އެދެމުން ދިޔަ ނަމަވެސް ކައުންސިލްގެ ފަރާތުން އެކަމަށް އެކަށީގެންވާ އިޖާބައެއް ލިބިފައިނުވާ ކަމަށް އޭނާ ވަނީ ބުނެފައެވެ. އޭނާ ބުނީ އެންމެ ބޮޑު ކަންބޮޑުވުމަކީ މި މައްސަލައިގައި ކައުންސިލުން ރައްޔިތު ބައްދަލުވުމެއް ބާއްވާ ނުދިނުން ކަމަށެވެ. ކައުންސިލުން ބިން ދޫކުރުމުގެ އަމަލީ މަސައްކަތް ނުކޮށް ގިނަ ދުވަސް ހޭދަވުމުގެ ސަބަބުން ދަނޑުވެރިންނަށް ބޮޑެތި ގެއްލުންތަކެއް ވަމުންދާ ކަމަށް ދަނޑުވެރިން ދަނީ ބުނަމުންނެވެ. މި މައްސަލައިގައި ޕެޓިޝަނެއް އެކުލަވާލާ އޭގައި ސޮއިކުރުމުގެ މަސައްކަތް ކުރިއަށްދާ ކަމަށް ނަޝީދު ވަނީ ބުނެފައެވެ. އެ ޕެޓިޝަންގައި އާންމުންނަށް ބިމުން ލިބޭ މިންވަރާއި، ބިން ދޫކުރާ ގޮތުގެ ތަފްސީލްތައް ހޯދަން އެދިފައިވާނެ ކަމަށް އޭނާ ވަނީ ބުނެފައެވެ. ނަމަވެސް އެ ޕެޓިޝަން ހުށަހަޅާނީ ކޮންއިރަކުން ކަން އޭނާ ހާމައެއް ނުކުރެއެވެ.
މި މައްސަލަ ހޫނުވެ ބުދަ ދުވަހު އާންމުން ވަނީ ކައުންސިލަށް އެއްވެފައެވެ. ތޮއްޑޫގެ ދަނޑުވެރިންނާ ކައުންސިލްގެ ރައީސް އަހުމަދު ކަރަމް ބައްދަލުނުކުރަން ވެގެން ކައުންސިލް އިދާރާ ބަންދުކޮށް ފުލުހުން ވަނީ ފޯރިމަރާފައެވެ. ތޮއްޑޫ އިން ރާއްޖެއެމްވީ އާ ވާހަކަ ދެއްކި މީހަކު ބުނީ، ބުދަ ދުވަހު ކައުންސިލުން ރައްޔިތުންގެ ބައްދަލުވުމެއް މެންދުރު 1:00 ގައި ބާއްވަން ކައުންސިލްގެ ރައީސް ނިންމާފައިވާތީ 1 ޖެހި އިރު ރައްޔިތުން ކައުންސިލް އިދާރާއަށް ދިޔައިރު ކައުންސިލް ބަންދުކޮށް ތަޅުލާފައި އެތަނުގައި ކައުންސިލުން އެދިގެން ފުލުހުން ސެކިއުރިޓީ ބަލަހައްޓާފައިވާ ކަމަށެވެ.
މީގެ އިތުރުން ބުދަ ދުވަހު ކައުންސިލްގައި ބޭއްވި ކައުންސިލަރުންގެ ބައްދަލުވުމުގައިވެސް ރައްޔިތުންގެ ބައްދަލުވުމެއް ބާއްވައިދޭނެކަމަށް ބުނެފައިވަނީ މަޖަލަކަށް ކަމަށް ބުނެފައިވާ ކަމަށް ރާއްޖެއެމްވީ އާ ވާހަކަދެއްކި އާންމުން ވަނީ ބުނެފައެވެ.
ދަނޑުބިންތަކާ ގުޅިގެން ހުރި ކަންބޮޑުވުންތައް ހައްލުކުރުމަށް ކައުންސިލާ ބައްދަލުކުރަން ތަކުރާރުކޮށް އާންމުން އެދުނު ނަމަވެސް އެކަން ކޮށްދީފައި ނުވާތީ އާންމުން ވަނީ ކަންބޮޑުވުން ފާޅުކޮށްފައެވެ.
