ރައީސުލްޖުމްހޫރިއްޔާ ޑރ މުޙައްމަދު މުއިއްޒު ރިޔާސީ އިންތިޚާބުގެ ތެރޭގައި ވެވަޑައިގެންނެވި އެއްވެސް ވައުދެއް ނުފުއްދެވި އުޅުއްވަނިކޮށް، އަނެއްކާވެސް އިތުރު ވައުދުތަކެއް ވެވަޑައިގެންފިއެވެ.
ރައީސް މުއިއްޒު އއ. އަތޮޅަށާއި ކ. އަތޮޅުގެ ބައެއް ރަށްތަކަށް ކުރައްވާ ދަތުރުފުޅުގެ ތެރެއިން، އާދިއްތަ ދުވަހު އއ. ތޮއްޑޫއަށް ވަޑައިގެން ދެއްކެވި ވާހަކަފުޅުގައި އެރަށަށް އަނެއްކާވެސް އިތުރު ކަންތައްތަކެއް ކޮށްދެއްވާނެ ކަމުގައި ވައުދުވެވަޑައިގެންނެވިއެވެ.
އިންތިޚާބު ތެރޭގައި ވެސް އެރަށަށް ގިނަ ކަންތައްތަކެއް ކޮށްދެއްވާނެ ކަމަށް އެމަނިކުފާނު ވަނީ ވިދާޅުވެފައެވެ. ތޮއްޑޫގައި ވާހަކަފުޅު ދައްކަވަމުން އެމަނިކުފާނު ވިދާޅުވީ، މަގުހެދުމުގެ މަޝްރޫޢު އާއި ސްކޫލުގެ އެކްސްޕޭންޝަންއާއި، ސިއްހީ މަރުކަޒު ތަރައްޤީކޮށް ބޮޑުކުރުމާއި، ކުނި މެނޭޖްކުރުމުގެ މަސައްކަތަކީ ތޮއްޑޫއަށް ކޮންމެހެން ބޭނުން ޖެހިފައި ހުރިކަންކަން ކަމަށެވެ.
ރައީސް ވިދާޅުވީ ތޮއްޑޫ ރައްޔިތުން ލޯކަލް ޓޫރިޒަމަށް ޙާއްސަ ކަމެއް ދީގެން ކުރިއަށް ގެންދާ ކަމަށާއި، އެގޮތުން މިހާރުވެސް 50 އެއްހާ ގެސްޓުހައުސް އެބަހުރި ކަމަށާއި، އަދި އިތުރު 40 ގެސްޓްހައުސް މަޝްރޫޢު ކުރިއަށް ދާކަމަށެވެ. އެހެންކަމުން އެއް ރަށެއްގައި، ކުރިއަށް އޮތް ދެ އަހަރެއްހާ ދުވަހުގެ ތެރޭގައި 3000 އެއްހާ ޓުއަރިސްޓުން ގެނެވޭހާ ލޯކަލް ޓޫރިޒަމްގެ އިންޑަސްޓްރީއެއް އުފެދެމުންދާ ކަމަށެވެ. އެހެންކަމުން ޑޮލަރުގެ ވިޔަފާރި ވަރަށް ބޮޑަށް ހިނގާ ކަމަށް އެމަނިކުފާނު ފާހަގަކުރެއްވި އެވެ.
"އަޅުގަނޑު ގަސްތުކުރަނީ ރައްޔިތުންނަށް ހަމަހަމަ ގޮތެއްގަ ހިދުމަތް ކުރުމުގެ ސިޔާސަތުގެ ތެރެއިން މި ރަށުގައި ތިބެގެން ޑޮލަރު ވިތްޑްރޯ ކުރެވޭ ގޮތެއް ވާންޖެހޭނެ ކަމަށް. ޑޮލަރުގެ އޭޓީއެމްއެއް އިރާދަކުރެއްވިއްޔާ ގާއިމުކޮށްދޭނަން. އެހެންވީމަ ޑޮލަރު ލޯކަލް ބޭންކިން ކޮންމެ ރައްޔިތަކަށްވެސް ރުފިޔާ އަދި ޑޮލަރު އެރަށެއްގެ އާމްދަނީ ލިބޭނެ ގޮތަށް، މި ރަށަށް ވެއްޖިއްޔާ ޑޮލަރުގެ އާމްދަނީ ބޮޑަށް ލިބޭ ރަށެއް ވީމަ ޑޮލަރުގެ އޭޓީއެމްއެއް ގާއިމުކޮށްދޭނަން" ރައީސް މުއިއްޒު ވިދާޅުވިއެވެ.
މީގެ އިތުރުން ރައީސް މުއިއްޒު ވިދާޅުވީ ކުރިއަށް އޮތް ދެ އަހަރުގެ ތެރޭގައި މުޅި ރާއްޖޭގެ އެކިކަންކޮޅުތަކުގައި ވެފައިވާ ހުރިހާ ވައުދެއް ފުއްދުމުގެ އަމަލީ މަސައްކަތް ފަށާނެ ކަމަށެވެ.
"އިރާދަކުރެއްވިއްޔާ 2025 އަދި 2026 ވެގެންދާނީ އަޅުގަނޑު ރަށްރަށަށް ގޮސް ރިޔާސީ އިންތިހާބުގައި ވެފައި ހުރި ވައުދުތައް ފުއްދުމަށްޓަކައި އަމަލީ ގޮތުން އެ މަސައްކަތްތައް ހިންގައިދޭނެ އަހަރަށް. ރާއްޖޭގެ ހުރިހާ ކަންކޮޅެއްގައި ބަހާލެވިގެން ވަކި ތަރުތީބެއްގެ ތެރެއިން އަޅުގަނޑު ވެފައި ހުރި ހުރިހާ ވައުދެއް، އެއީ ބަނދަރު، މަގު، ބިން ހިއްކުން، ސްކޫލް، ހޮސްޕިޓަލް، ކިޔާނެ ކަމެއް ނެތް ކުޅިވަރާ ބެހޭ ކަންކަން، ތަރުތީބެއްގެ ތެރެއިން އިރާދަކުރެއްވިއްޔާ އަމަލީ ގޮތުން އަޅުގަނޑުމެން މަސައްކަތްތައް ފަށައި އަދި އެކި މަޝްރޫއުތައް ނިމެމުން ވެސް ދާނެ،" ރައީސް މުއިއްޒު ވިދާޅުވިއެވެ.
ތަރައްޤީގެ މަޝްރޫތައް ހިންގާއިރު އިސްކަންދޭން ޖެހޭނީ އާބާދީ ބޮޑު ރަށްތަކަށް ކަމަށާއި، ރަށްރަށް އެއްފަސްކުރެވޭނީ އޭރުންކަމަށް ރައީސް ޑރ މުޙައްމަދު މުއިއްޒު މީގެ ކުރިން ވަނީ ވިދާޅުވެފައެވެ. އެކި ފަހަރު އެކި ގޮތަށް ވާހަކަފުޅު ދައްކަވާ ކަމަށް ގިނަ ރައްޔިތުން ބުނާ، ރައީސް މުއިއްޒު އދ. ގެ 79 އާއްމު ބައްދަލުވުމަށް ވަޑައިގެން، 26 ސެޕްޓެމްބަރ 2024 ގައި އެމެރިކާގެ ޕްރިންސްޓަން ޔުނިވަރސިޓީގެ ދަރިވަރުންނާ ބައްދަލު ކުރައްވާ ވިދާޅުވީ، ރާއްޖޭގައި 1100 ރަށް އޮންނަ އިރު, އޭގެތެރެއިން 186 ރަށުގައި މީހުން ދިރިއުޅުމަކީ އެއީ ނިސްބަތުން ބޮޑު އަދަދެއް ކަމަށާއި، 186 ރަށް ތަރައްގީ ކުރަން ފޯކަސް ބަހައްޓައިގެން ނުދެވޭނެ ކަމަށެވެ. އެ 186 ރަށުގައި މީހުން ދިރިއުޅޭއިރު، އެ ހުރިހާ ރަށެއް ތަރައްގީ ނުކުރެވޭނެ ކަމަށް އެމަނިކުފާނު ވަރަށް ސާފުކޮށް ވިދާޅުވިއެވެ.
