ތޮއްޑޫ އަންހެނުން ދޭ ޖާފަތަކަށް ރައީސްގެ ދެކަނބަލުން އެރަށަށް!
28 ޖޫން 2023 | ބުދަ 07:57ރައީސް ވަޑައިގަތީ ޢީދުގެ އުފަލުގައި ތޮއްޑޫ އަންހެނުންދޭ މެންދުރު ޖާފަތުގައި ބައިވެރިވެވަޑައިގަތުމަށް
ރައީސް ތޮއްޑޫއަށް ވަޑައިގަތުމުން އެ ރަށުން މަރުހަބާ ދަންނަވަނީ
ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު އއ. ތޮއްޑޫއަށް ވަޑައިގަންނަވައިފިއެވެ.
އެމަނިކުފާނު އެ ރަށަށް ވަޑައިގެންނެވީ މިއަދު ހެނދުނު 11:00 ހާއިރުއެވެ. އެމަނިކުފާނުގެ މި ދަތުރުފުޅުގައި އަނބިކަނބަލުން ފަޒްނާ އަހުމަދު ވެސް ބައިވެރިވެވަޑައިގެންނެވިއެވެ. ރައީސްގެ ދެކަނބަލުންނަށް ތޮއްޑޫއިން ވަނީ ހޫނު މަރުހަބާއެއް ދަންނަވާފައެވެ.
ތޮއްޑޫ ކައުންސިލުން "ރާއްޖެ ޓީވީ" އަށް މައުލޫމާތު ދޭ ގޮތުގައި އެމަނިކުފާނު އެ ރަށަށް ވަޑައިގެންނެވީ އެ ރަށުގެ އަންހެނުންގެ ފަރާތުން ދެއްވާ މެންދުރުގެ ޖާފަތެއްގައި ބައިވެރިވެވަޑައިގެންނެވުމަށެވެ. މިއީ އަޟްހާ ޢީދާ ގުޅިގެން އެ ރަށުގައި ކުރިއަށްގެންދާ ހަރަކާތެކެވެ. މި ހަރަކާތަށްފަހު މިއަދު މެންދުރު ފަހު ރައީސް އެނބުރި މާލެ ވަޑައިގަންނަވާނެ ކަމަށް ވެސް އެ ރަށު ކައުންސިލުން ބުންޏެވެ.
ތޮއްޑޫ ކައުންސިލުން ވަނީ މިއަހަރުގެ އަޟްހާ ޢީދާ ގުޅުވައިގެން އެރަށުގައި ގިނަ ހަރަކާތްތަކެއް ރާވާފައެވެ. މި ހަރަކާތްތައް އަންގާރަ ދުވަހުގެ ރޭ ޢީދު ވެދުމާ ދިއުމުން ފަށާފައިވާއިރު ބޮޑުމަހާއި މާލި އާއި ޢީދު ޝޯ އަދި ހަވާއެރުވުން ވެސް ކުރިއަށްދާނެއެވެ.
