ރައީސް މުއިއްޒު ވެރިކަމާއި ހަވާލުވިއިރު މިނިސްޓްރީ 27 މިލިއަން ރުފިޔާގެ ދަރަނިވެފައި ނޯންނާނެ: ކުރީގެ އިސްލާމިކް މިނިސްޓަރު
މިނިސްޓްރީގެ ފަރާތުން ގިނަ މަޝްރޫއުތައް މުޅި ރާއްޖޭގައި ވަނީ ފަށާފައި
އިސްލާމިކް މިނިސްޓަރ ޑރ. އަހުމަދު ޒާހިރު
މި ސަރުކާރު ވެރިކަމާއި ހަވާލުވިއިރު އިސްލާމިކް މިނިސްޓްރީ 27 މިލިއަން ރުފިޔާގެ ދަރަނިވެފައި ނޯންނާނެ ކަމަށް ކުރީގެ އިސްލާމިކް މިނިސްޓަރު ޑރ. އަހުމަދު ޒާހިރު އަލީ ވިދާޅުވެއްޖެއެވެ.
ރާއްޖެއެމްވީއަށް މިނިސްޓަރު ޒާހިރު ވިދާޅުވީ އިސްލާމިކް މިނިސްޓްރީގެ ފަރާތުން ގިނަ މަޝްރޫއުތައް މުޅި ރާއްޖޭގައި ފަށާފައިވާ ކަމަށާއި، އެމަޝްރޫއުގެ މަސައްކަތްތައް ކުރިއަށްދާ ކަމަށެވެ. މިސަރުކާރު އައިރު އިސްލާމިކް މިނިސްޓްރީ 27 މިލިއަން ރުފިޔާއިން ދަރަނިވެރިވެފައިވާ ކަމަށް ދެކެވޭ ވާހަކައަކީ ހަގީގަތް ނޫން ކަމަށް މިނިސްޓަރު ޒާހިރު ވިދާޅުވިއެވެ.
މިނިސްޓަރު ޒާހިރު ވިދާޅުވީ ހިނގަމުންދާ ޕޮޖެކްޓްތަކުގެ ބިލްތައް ދޭތެރެ ދޭތެރެއިން އަންނާނެ ކަމަށާއި، އެ ބިލްތައް އައުމުން ބަޖެޓުން ފިނޭންސް މިނިސްޓްރީއަށް ފޮނުވައި ބިލްތައް ދައްކަމުންދާ ކަމަށެވެ.
މިނިސްޓަރު ޒާހިރު ވިދާޅުވީ ރައީސް އިބްރާހިމް މުހައްމަދު ސާލިހުގެ ސަރުކާރު ނިމުނުއިރު، 22 މިލިއަން ރުފިޔާގެ ބިލް އައިސްފައިވާ ކަމަށެވެ. އަދި ބިލްތައް ޕްރޮސަސް ކޮށްފައިވާ ކަމަށް މިނިސްޓަރު ޒާހިރު ވިދާޅުވިއެވެ. ނަމަވެސް 2023 ވަނަ އަހަރުގެ ޑިސެންބަރު މަހުގެ ތެރޭގައި އައިސްފައިވާ 5 މިލިއަން ރުފިޔާގެ ބިލްތަކާއެކު މިނިސްޓްރީ 27 މިލިއަން ރުފިޔާއިން ދަރަނިވެރިވެފައިވާ ކަމަށް ވާހަކަތައް ދައްކަމުންދަނީ އެހެން މަގުސަދެއްގައި ކަމަށް މިނިސްޓަރު ޒާހިރު ވިދާޅުވިއެވެ.
25 ޖެނުއަރީ 2024 ގައި ރައްޔިތުންގެ ސުވާލުތަކަށް ޖަވާބު ދިނުމަށް ސަރުކާރުން ބޭއްވި އަހާ ފޯރަމްގައި އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވީ ރައީސް ޑރ. މުހައްމަދު މުއިއްޒުގެ ވެރިކަން ނޮވެންބަރު 17، 2023 ގައި ފެށުނުއިރު އިސްލާމިކް މިނިސްޓްރީ ގައި އެކަނި ވެސް 27 މިލިއަން ރުފިޔާގެ ދަރަނި އޮތް ކަމަށެވެ. ނަމަވެސް ސަރުކާރުގެ ފުރަތަމަ ދެ މަސް ނިމިގެން ދިޔައިރު އެ ދަރަނި މުޅީން ހަލާސް ކޮށްފައިވާ ކަމަށް ވިދާޅުވެފައިވެއެވެ.
