މާލެސިޓީގެ މަގުތަކުގައި އުޅޭ ބުޅާތައް އަންނަ މަހު ޝެލްޓަރ އަށް ބަދަލުކުރުމުގެ މަސައްކަތް ފަށާނެ: މޭޔަރު އާޒިމް
ބުޅާތައް ބަދަލުކުރުމުގެ މަސައްކަތް ކުރަނީ ފޭސް ތަކަކަށް ބަހާލައިގެން
މާލޭގެ މަގުމަތީގައި އުޅޭ ބުޅާތަކެއް
މާލެސިޓީގެ މަގުތަކުގައި އުޅޭ ބުޅާތައް އަންނަ މަހު ޝެލްޓަރއަށް ބަދަލުކުރަން ފަށާނެ ކަމަށް މާލެ ސިޓީގެ މޭޔަރު އާދަމް އާޒިމް ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމުގައި މޭޔަރު އާޒިމް ވިދާޅުވީ މަގުތަކުގައި އުޅޭ ބުޅާތައް ގިނަވެ އެ މައްސަލަ ހައްލު ކުރުމަށް ޚާއްސަ އިސްކަމެއްދީގެން މަސައްކަތް ކުރާ ކަމަށެވެ.
ކެޓް ޝެލްޓަރ އިމާރާތް ކުރުމުގެ މަސައްކަތާއި ގުޅޭގޮތުން މޭޔަރު އާޒިމް ވިދާޅުވީ ކެޓް ޝެލްޓަރ އިމާރާތުގެ ހުއްދަ އަންގާރަ ދުވަހު އެޗްޑީސީން ދީފައިވާ ކަމަށެވެ. މަސައްކަތް ކުރިއަށްދާ ގޮތަށް ބަލާއިރު، އުންމީދުކުރަނީ ޖުލައި މަހުގެ ތެރޭގައި މާލޭގެ މަގުތަކުގައި އުޅޭ ބުޅާތައް ބަދަލުކުރުމުގެ މަސައްކަތް ފެށޭނެ ކަމަށް މޭޔަރު އާޒިމް ވިދާޅުވިއެވެ.
މޭޔަރު އާޒިމް ވިދާޅުވީ ބުޅާތައް ބަދަލުކުރުމުގެ މަސައްކަތް ކުރަނީ ފޭސް ތަކަކަށް ބަހާލައިގެން ކަމަށެވެ. އެގޮތުން އެންމެ ފުރަތަމަ ބަދަލުކުރާނީ ސަލްމާން މިސްކިތް ސަރަހައްދުގައި އުޅޭ ބުޅާތައް ކަމަށާއި، އެއަށްފަހު މޭރީބްރައުން ސަރަހައްދުގައި އުޅޭ ބުޅާތައް ބަދަލުކުރާނެ ކަމަށް މޭޔަރު އާޒިމް ވިދާޅުވިއެވެ.
މި ފެސިލިޓީއަކީ މާލެ ސަރަހައްދުގެ ޕާކުތަކާއި މަގުމަތީގައާއި އަދި މި ނޫންވެސް އާންމުން އެއްވެ އުޅޭ ސަރަހައްދުތަކުގައި ބުޅާ ގިނަވެ، އެ ބުޅާތަކަށް ލިބެމުންދާ އަނިޔާތަކާއި އަދި ތަފާތު ބަލިތައް ޖެހުމުން ސަލާމަތްކޮށް، ބުޅާތައް ދިރިއުޅޭނެ ރައްކާތެރި މާހައުލެއް ގާއިމުކުރުމަށާއި އާންމު ތަންތަނުގައި ބުޅާ ގިނަވުމުގެ ސަބަބުން ފެތުރިދާނެ ބަލިތަކުން އާންމު ސިއްހަތު ރައްކާތެރި ކުރުމުގެ ބޭނުމުގައި ގާއިމުކުރާ ފެސިލިޓީއެކެވެ.
މި ފެސިލިޓީގައި ބުޅާތައް ކަރަންޓީނު ކުރެވޭ ސަރަހައްދަކާއި، ކްލިނިކަކާއި، ފާމަސީއާއި، ލެބޯޓްރީ އަދި ހިޔާވަހިކަމާއި، އެކަށީގެންވާ ސިއްހީ ފަރުވާ އަދި ކުޅޭ ސަރަހައްދު ފަދަ ތަފާތު ޚިދުމަތްތައް އެއްފުރާޅެއްގެ ދަށުން ލިބިގެންދާނެއެވެ.
މީގެ އިތުރުން ގޭގައި ގެންގުޅޭ ބުޅާތަކަށްވެސް ފެންވަރު ރަނގަޅު ސިއްހީ ފަރުވާ މި ފެސިލިޓީން ލިބިގެންދާނެއެވެ. އަދި މި ފެސިލިޓީ ގާއިމުކުރުމުން މާލެ ސަރަހައްދުގައި ބުޅާތައް ގިނަވެފައި ވުމުން ކުރިމަތިވާ މައްސަލަތަކަށް ދާއިމީ ހައްލެއް ލިބިގެންދާނެއެވެ.
