"ރައީސް ވިދާޅުވެގެން!"

އާދީއްތަ ދުވަހު ރައީސުލްޖުމްހޫރިއްޔާގެ އޮފީހުގައި ނޫސްވެރިންގެ ބައްދަލުވުމެއް ބޭއްވި އެވެ. މެންދުރު ފަހަށް ބާއްވަން ތާވަލު ކުރި އެ ނޫސްވެރިންގެ ބައްދަލުވުން އެހެން ވަގުތަކަށް ފަސް ކުރީ، ރައީސް އޮފީހަށް ނޫސްވެރިން ޙާޟިރުވީ ވެސް ފަހުންނެވެ. ނޫސްވެރިންގެ ބައްދަލުވުން ފަސް ކުރި ވާހަކަ ނޫސްވެރިންނަށް އެންގީ ގާތް ގަނޑަކަށް ގަޑި އިރެއް ފަހުންނެވެ. އެއަށްފަހު އެންގީ "ސްޓޭންޑް ބައި"ގައި ތިބުމަށެވެ. އެ ނޫސްވެރިންގެ ބައްދަލުވުން ބޭއްވީ ހަވީރު އެވެ.

ނޫސްވެރިންގެ ބައްދަލުވުމަށް ދިޔައިރު، ބައްދަލު ކުރަނީ ކޮން ބޭފުޅެއްކަން ނުވަތަ ބޭފުޅުންނެއްކަން ސާފެއް ނުވެ އެވެ. ނަމަވެސް ޤަބޫލު ކުރެވިފައި އޮތީ ނޫސްވެރިންގެ ބައްދަލުވުން ބާއްވަނީ، ބޭންކް އޮފް މޯލްޑިވްސް (ބީއެމްއެލް) އިން އާދިއްތަ ދުވަހު ނިންމި ނިންމުމާ ގުޅިގެން ކަމަށެވެ. އާދިއްތަ ދުވަހުގެ ހެނދުނު ބީއެމްއެލް އިން ނިންމި ނިންމުން، އަނެއްކާ މެންދުރު ފަހު ވަނީ ބަދަލުކޮށްފަ އެވެ. އެއީ ގިނަ އާންމުންގެ ނުރުހުމާއި، ރުޅިވެރިކަމާއި، ނަފުރަތު ސަރުކާރަށް އަމާޒުވީ ފަހުންނެވެ. އޭރު ވެސް އަޅުގަނޑު ހިތަށް އެރި އެވެ. މިކަމުގައި ސަރުކާރުން ކޮންމެ ވެސް "ފޮންޏެއް ކަނޑާލާނެ" އެވެ.

އާދިއްތަ ދުވަހުގެ ނޫސްވެރިންގެ ބައްދަލުވުން ބޭއްވީ އިޤްތިޞާދީ ވަޒީރު މުޙައްމަދު ޞައީދު އާއި މާލީ ވަޒީރު ޑޮކްޓަރު މުޙައްމަދު ޝަފީޤު އާއި ޚާރިޒީ ވަޒީރު މޫސާ ޒަމީރު އަދި ބަންޑާރަ ނައިބު އަޙުމަދު އުޝާމް އެވެ. ހަތަރު ބޭފުޅުން ވެސް ނޫސްވެރިންގެ ބައްދަލުވުމަށް ވަޑައިގެންނެވީ ވަޒީރުންގެ މަޖިލީހުގެ ބައްދަލުވުން ނިންމަވާފައި ކަމަށް އެ ބޭފުޅުން ނޫސްވެރިންގެ ބައްދަލުވުމުގައި ވިދާޅުވި އެވެ. އަދި ގިނަ އިރުތަކަކަށް ވަޒީރުންގެ މަޖިލީހުގެ އެ ބައްދަލުވުން ދިގު ދެމިގެން ދިޔަ ކަމަށް ވެސް ވިދާޅުވި އެވެ.

ނޫސްވެރިންގެ ބައްދަލުވުމުގައި މައިގަނޑު ގޮތެއްގައި ދެކެވުނު ވާހަކަ އަކީ ބީއެމްއެލް އިން ނިންމި ނިންމުމުގެ ވާހަކަ އާއި، ޑޮލަރުގެ މައްސަލައިގެ ވާހަކަ އެވެ. ނޫސްވެރިންގެ ސުވާލުތައް ވަޒީރުން އަދި ބަންޑާރަ ނައިބާ އަމާޒުކޮށްފައި ވަނީ ވެސް އެ މަޢުޟޫއުގަ އެވެ. ސުވާލުތަކަށް ވަޒީރުންނަށް އެންމެ އެކަށީގެންވާ މިންވަރަށް ޖަވާބު ދެވިފައި ނުވާއިރު، އެ ސުވާލުތަކަށް ޖަވާބު ދެއްވުމަށް ނޫސްވެރިން ވަޒީރުންގެ ގާތުގައި އެދެން ވެސް އެދުނެވެ. އެހެން ނަމަވެސް، އެކަމަށް ވަޒީރުންގެ މާބޮޑު ސަމާލުކަމެއް ނުދެއްވަ އެވެ.

އެ ބައްދަލުވުމުގައި ބީއެމްއެލް އިން ނިންމި ނިންމުމާއެކު، ބޭރުގައި ކިޔަވަން ތިބޭ ކުދިންނާއި، އަދި ދިރިއުޅޭ ދިވެހިންނަށް ދިމާވާނެ މައްސަލަތަކާއި، އަދި ދަތިތަކާ ގުޅޭ ގޮތުން ވެސް ވަޒީރުންނާ ސުވާލު ކުރެއްވި އެވެ. އެ ސުވާލަށް ޖަވާބު ދެއްވަމުން ވަޒީރު ޞައީދު ވިދާޅުވީ، ބޭރުގައި ކިޔަވަން ތިބޭ ކުދިންނާއި، ދިރިއުޅޭ ދިވެހިންނަށް އެއްވެސް ދަތިތަކެއް ކުރިމަތިވާން "ރައީސް ބޭނުންފުޅު" ނުވާ ކަމަށެވެ. އަދި ބީއެމްއެލް އިން ނިންމި ނިންމުމަށް އިޝަރާތްކޮަށް ވިދާޅުވީ، އެއީ ރައީސްގެ އެންގެވުމާ ޚިލާފު ނިންމުމެއް ކަމަށެވެ. ކުރު ގޮތަކަށް ދަންނަވާ ނަމަ، ހަމަ ކޮންމެ ސުވާލަކަށް ޖަވާބު ދެއްވަމުން ވެސް ވިދާޅުވަނީ، "ރައީސް ވިދާޅުވެގެން!" މިހެންނެވެ.

ގާތްގަނޑަކަށް ދޮޅު ގަޑިއިރަށް ދިގު ދެމިގެން ދިޔަ އެ ނޫސްވެރިންގެ ބައްދަލުވުމުގައި އެންމެ ގިނައިން އިވުނު ދެ ލަފުޒަކީ، "ރައީސް ވިދާޅުވެގެން" އެވެ. ރައީސް ވިދާޅުވެގެން މާލީ ނިޒާމު ޚަރަދަނާ ކުރުމުގެ މަސައްކަތް ކުރަމުން އަންނަ ކަމަށާއި، ރައީސް ވިދާޅުވެގެން އިޤްތިޞާދު ރަނގަޅު ކުރުމުގރ މަސައްކަތް ކުރަމުން އަންނަ ކަމަށާއި، ރައީސް ވިދާޅުވެގެން ޤާނޫނަށް ބަދަލުތައް ގެނައުމުގެ މަސައްކަތް ކުރަމުން އަންނަ ކަމަށާއި، އަދި ރައީސް ވިދާޅުގެން އެކި އެކި އަވައްޓަރި ޤައުމުތަކުގެ އެހީ އަށް އަދި މަދަދަށް އެދެމުން އަންނަ ވާހަކަ އެވެ.

ދޭތެރެއަކުން ވަޒީރު ބޭފުޅުން އަރުއްވައި، "އަޅުގަނޑުމެން" އޭ ވިދާޅުވުމަށްފަހު، އޭގެ ފަހަތަށް ވެސް ވިދާޅުވަނީ، "ރައީސް ވިދާޅުވެގެން" މިހެންނެވެ. ބައްދަލުވުމުގައި އިން ނޫސްވެރިޔެެއްގެ ޙައިޞިއްޔަތުން އަޅުގަނޑު ހިތަށް އެތަކެއް އެއްޗެހި އަރައި، ފައިބަމުން ދިޔަ އެވެ. ވަޒީރު ބޭފުޅުންގެ ކޮންމެ ޖުމުލައެއްްގެ ފަހަތަށް، "ރައީސް ވިދާޅުވެގެން" އޭ ބުނުއްވަނީ "ޑެލިބަރޭޓްލީ" ބާއެވެ؟ ނުވަތަ އެކަމަށް ރައީސް އަންގަވައިގެން ބާއެވެ؟ ނުވަތަ ނަންބަރު މައްޗަށް ޖައްސާލެއްވުމުގެ މަޤުޞަދުގައި ބާއެވެ؟ ނޫން ނަމަ، އެހެން ވިދާޅު ނުވެއްޖެ ނަމަ، ދެން އަންނަން އޮތް ރާޅުގެ ބޮޑުކަމުންބާ އެވެ؟