އިޒްރޭލުން ފަލަސްތީންގެ ރެފިއުޖީ ކޭމްޕަކަށް، ގެދޮރަށް ހަމަލާދީ 22 މީހުން މަރާލައިފި

އިޒްރޭލު ސިފައިން ފަލަސްތީނުގެ ނުސީރަތް ރެފިއުޖީ ކޭމްޕަށް ވައިގެ މަގުން ދިން ހަމަލާތަކެއްގައި ފަލަސްތީންގެ 4 މީހުން މަރުވެއްޖެއެވެ.

މީގެ އިތުރުން ގާޒާގެ މެދުތެރޭގެ ބުރެއިޖް ރެފިއުޖީ ކޭމްޕަށް ދިން ހަމަލާތަކުގައި 6 އަންހެނުންނާ ކުޑަކުދިންތަކެއް ވަނީ މަރުވެފައެވެ.

ރޭގެ ވަގުތެއްގައި ޚާން ޔޫނިސް އަށް ދިން ހަމަލާތަކުގައި 12 މީހުން މަރުވި ކަމަށް އަލް ޖަޒީރާގެ ރިޕޯޓަރުން ބުނެފައިވެއެވެ. މީގެ ތެރޭގައި 3 ކުޑަކުދިން ހިމެނެއެވެ.

އިޒްރޭލުގެ ހަމަލާތައް ހުއްޓުމެއް ނެތި ފަލަސްތީނުގެ ރައްޔިތުންނަށް އަމާޒު ވަމުންދާއިރު އިޒްރޭލުން ބުނަމުންދަނީ ހަނގުރާމަ ނިމޭނީ އެމީހުން ބޭނުންވާ މަގްސަދު ހާސިލް ވުމުން ކަމަށެވެ. އެއީ ހަމާސް މުޅިން ނައްތާލުން ކަމަށް އިޒްރޭލުން ބުނެއެވެ. ހަމާސް އިން ގާޒާގައި ވެރިކަން ކުރަން އެއްވެސް އިރެއްގައި ފުރުސަތެއް ނުދޭނެ ކަމަށް އިޒްރޭލްގެ ޑިފެންސް މިނިސްޓަރ ޔޯވް ގަލާންޓް ވަނީ ވިދާޅުވެފައެވެ.

ހަމާސްގެ ތަރުޖަމާނު އުސާމާ ހަމްދާން ވަނީ އެމެރިކާގެ ރައީސް ހާމަ ކުރެއްވި ސުލްހައިގެ ހުށަހެޅުން ރަނގަޅު ކަމަށް ބުނެފައެވެ. އެހެން ނަމަވެސް އެ ޖަމާއަތައް ލިޔުމުން އަދި އެއްވެސް އެއްޗެއް ނުލިބޭކަމަށް އަލް ޖަޒީރާ އަށް މައުލޫމާތު ދެމުން އޭނާ ބުނެފައިވެއެވެ.

ޖަބާލިއާ ރެފިއުޖީ ކޭމްޕުން އިޒްރޭލް ސިފައިން 3 ހަފްތާ ފަހުން ފައިބައިފާ ވާއިރު އެސަރަހައްދު ތަކުގައި މަސައްކަތް ކުރާ ރެސްކިއު ޓީމްތަކަށް އެތަނުން 50ށް ވުރެ ގިނަ މަރުވެފައިވާ މީހުންގެ ހަށިތައް ވަނީ ފެނިފައެވެ.

ހުސްވި އަހަރުގެ އޮކްޓޯބަރ މަހުގެ 7ން ފެށިގެން އިޒްރޭލުން ފަލަސްތީނަށް ދެމުންދާ ހަމަލާތަކުގައި ފަލަސްތީނުގެ 36،439 މީހުން ވަނީ މަރުވެފައެވެ. އޭގެ އިތުރުން 82،627 މީހުން ވަނީ ޒަޚަމްވެފައެވެ. ހަމާސްގެ ހަމަލާތަކުން އިޒްރޭލުން މަރުވި މީހުންގެ އަދަދަކީ 1،139 އެވެ.