ރަފަހްގެ "ރައްކައުތެރި" ސަރަހައްދުތަކަށް އިޒްރޭލު ސިފައިން ފާއިތުވި 4 ދުވަހު ދިން ހަމަލާ ތަކުގައި މަދުވެގެން ފަލަސްތީނުގެ 60 މީހުން މަރުވެއްޖެ ކަމަށް ސޭވްދަ ޗިލްރަން އިން ހާމަ ކޮށްފިއެވެ.

މީގެ ތެރޭގައި ގިނައީ އަންހެނުންނާއި ކުޑަކުދިންނެވެ.

އަނެއްކޮޅުން ޔޫއެން އިން ބުނެފައިވަނީ ރަފަހްގެ ބިރުވެރި ހާލަތުން ރައްކައުތެރި ކަން ހޯދަން 18500ށް ވުރެ ގިނަ މާބަނޑު މީހުން އެހެން ސަރަހައްދުތަކަށް ހިޖްރަ ކޮށްފި ކަމަށެވެ.

ހުއްޓުމެއް ނެތި އިޒްރޭލް ސިފައިން ރަފަހް އަށް ހަމަލާ ދެމުންދާއިރު އަދި އެ ހަމަލާތަކުގައި ކުޑަކުދިންނާއި އަންހެނުން މަރުވަމުންދާ އިރު އެމެރިކާގެ ސްޓޭޓް ޑިޕާޓްމަންޓުން ބުނެފައިވަނީ އިޒްރޭލުން ރަފަހް ގައި ހިންގަނީ އަސްކަރީ "މޭޖަރ އޮޕަރޭޝަނެއް ނޫން" ކަމަށެވެ. އެމެރިކާ އިން މިހެން ބުނާއިރު އަލް ޖަޒީރާ އިން ރިޕޯޓު ކޮށްފައިވާ ގޮތުގައި ރަފަހް އަށް ހަމަލާ ދިނުމުގައި އެތައް ހާސް އިޒްރޭލް ސިފައިން އަންނަނީ ބައިވެރި ވަމުންނެވެ. އިޒްރޭލުގެ ހަމަލާ ތަކަށް ކެތް ނުކުރެވިގެން މިހާތަނަށް މިލިއަނަކަށް ވުރެ ގިނަ މީހުން ރަފަހް ސިޓީ ދޫކޮށް ހިނގައްޖެ ކަމަށްވެސް ރިޕޯޓްތަކުގައި ވެއެވެ.

އަނެއްކޮޅުން އިޒްރޭލުގެ އަނިޔާވެރި ކަމަށް ނިމުމެއް ގެނައުމަށް، ބައިނަލް އަގްވާމީ މުޖްތަމައުން އިޒްރޭލަށް ހަތިޔާރު ވިއްކުން ހުއްޓުވުމާއި، ދަތި ކުރުމުގެ އެހެން ފިޔަވަޅުތައް އެޅުމުގެ ވަގުތު އަތުވެއްޖެ ކަމަށް އދ.ގެ އެތައް ތަޖުރިބާކާރުން ވަނީ ބުނެފައެވެ.

އިޒްރޭލުން ހުސްވި އަހަރުގެ އޮކްޓޯބަރު މަހުން ފެށިގެން ގާޒާ އަށް ދެމުންދާ ހަމަލާތަކުގައި މިހާތަނަށް 36.224 ފަލަސްތީން މީހުން ވަނީ މަރުވެފައެވެ. މީގެ އިތުރު އިޒްރޭލުގެ ހަމަލާތަކުގައި ޒަޚަމްވި މީހުންގެ އަދަދު 81،777ށް ވަނީ އަރާފައެވެ.