ޕީއެންސީގެ މެންބަރުން އެކަތިގަނޑެއްގެ ގޮތުގައި މާގިނަ ދުވަހަކު ދެމިނުތިބޭނެ - މައުރޫފް
30 މެއި 2024 | ބުރާސްފަތި 04:53ކަންބޮޑުވުން ފާހަގަކުރައްވާ މަޖިލިސް ތެރޭގައި ސައި ކޮޓަރީގައި އަދި ވަކިން ހާއްސަކޮށް ކުޑަދަށުގައި ދެކެވުނު ވާހަކަ އަޑު އިވުނު
ޕީއެންސީގެ ޕާލަމެންޓްރީ ގްރޫޕުގެ މެންބަރުން
ޕީއެންސީގެ މެންބަރުން އެކަތިގަނޑެއްގެ ގޮތުގައި މާގިނަ ދުވަހު ދެމިނުތިބޭނެ ކެންދޫ ދާއިރާގެ މެންބަރު މައުރޫފް ޒާކިރު ވިދާޅުވެއްޖެއެވެ.
ރާއްޖެޓީވީގެ ފަަލަސުރުހީ ޕްރޮގްރާމުގައި ވާހަކަ ދައްކަވަމުން ކެންދޫ ދާއިރާގެ މެންބަރު މައުރޫފް ޒާކިރު ވިދާޅުވީ މަޖިލީހުގެ ރައީސްކަމާއި ނައިބުރައީސްކަމަށް އެމްޑީޕީން ކުރިމަތިލުމުން ތަފާތު ފާޑުކިއުންތައްވެސް އައި ކަމަށެވެ. އޭގެ ތެރޭގައި މަޖިލީހުގެ ރައީސްކަން ކާމިޔާބު ނުކުރެވޭނެ ކަމާއި، އެކަށީގެންވާ މިންވަރަކަށް ވޯޓު ނުލިބޭނެކަމުގެ ފާޑުކިއުންތައް އަމާޒުވިކަމަށެވެ. މައުރޫފް ވިދާޅުވީ އެހެންނަމަވެސް ފެނިގެންދިޔައީ މަޖިލިސް ހުވާކުރުމަށްފަހު ނެގި ވޯޓުގައި އެމްޑީޕީއަށް ބޮޑު ކާމިޔާބިއެއް ލިބިގެންދިޔަތަން ކަމަށެވެ.
އެގޮތުން ޕީއެންސީގެ ޕީޖީގައި ބައިބައިވުން ހުރިކަން ފެނިގެން ދިޔަ ކަމަށާއި، ހާއްސަކޮށް މަޖިލީހުގެ ރައީސްގެ ވޯޓުގައި އެމްޑީޕީއަށް 14 ވޯޓު ލިބުނު ކަމަށެވެ. އަދި 7 ބާތިލް ވޯޓު އޮތް ކަމަށާއި، ވޯޓާ ހަމައަށް ދިޔަ އިރު، ޕީއެންސީގެ ތެރޭގައި މަޖިލީހުގެ ރައީސް އަބްދުއްރަހީމަށް ތާއިދު ނުކުރައްވާ ވަރަށް ގިނަ ފަރާތްތަކެއް ތިބިކަން އެނގިގެން ދިޔަ ކަމަށެވެ.
މައުރޫފް ވިދާޅުވީ ބާތިލް ވޯޓުތަކުގެ ތެރޭގައި ރައީސްކަމަށް ކުރިމަތިލި 2 ބޭފުޅުންނަށް ވެސް ފާހަގަ ޖައްސަވާފައި ހުރުމުން އެކަމުން އެނގިގެން ދިޔައީ ޕީއެންސީގެ ޕާލަމެންޓްރީ ގްރޫޕުގެ ތެރޭގައި ހިތްހަމަ ނުޖެހުންތަކެއް ހުރިކަން ކަމެވެ.
އަދި ވޯޓުގެ އިތުރުންވެސް މަޖިލީހުގެ ޖަލްސާއަށް އައި އިރުވެސް، ފުންނާބު އުސް އަދި ކުރީގެ ދައުރުތައް އަދާކުރައްވާފައި ތިބި ބައެއް ބޭފުޅުން ޕީއެންސީގެ ޕާލަމެންޓްރީ ގްރޫޕުގެ ބޭފުޅުން މައިކްރޯ މެނޭޖްކުރާ ވަރު ބޮޑުކަމުން އެކަމުގެ ކަންބޮޑުވުން ޕީއެންސީގެ މެންބަރުންގެ ހުރި ކަމަށް މައުރޫފް ވިދާޅުވިއެވެ.
މައުރޫފް ވިދާޅުވީ ބޮޑު ޕާލަމެންޓްރީ ގްރޫއްޕެއް ގެންގުޅެން އުނދަގޫ ވެދާނެ ކަމަށާއި، ނަމަވެސް މިހާ އަވަހަށް އަދި މަޖިލިސް ފެށުނު ހިސާބުން އެފަދަ އަޑުތައް އިވެން ފެށުމުން ގަބޫލުކުރެވެނީ ޕީއެންސީގެ ޕީޖީ ގްރޫޕް އެގޮތަށް ދެމި އޮތުމަކީ އުނދަގޫކަމަކަށް ވެދާނެ ކަމަށެވެ.
މައުރޫފް ވިދާޅުވީ މަޖިލިސް ރައީސްއާއި ނައިބްރައީސް ހޮވުމުގެ ވޯޓުން އެނގިގެން ދިޔައީ މަޖިލީހުގެ ރައީސަށްވުރެ މަޖިލީހުގެ ނައިބްރައީސަށް އޮތް ތާއިދު ބޮޑުކަން ހާމަވެފައިވާ ކަމަށެވެ.
