ތައިލެންޑާއި ޔޫއޭއީން އާސަންދަ ލިބޭނެ ގޮތް ހެދުމަށް ކުރަމުން އަންނަ މަސައްކަތްތައް އަދިވެސް ނުނިމޭ ކަމަށް އާސަންދައިން ބުނެފިއެވެ.
އިޖުތިމާއީ އަދި އާއިލީ ތަރައްގީއާ ބެހޭ ވުޒާރާއިން ބޭއްވި ނޫސްވެރިންގެ ބައްދަލުވުމުގައި ތައިލެންޑް އަދި ޔޫއޭއީ އިން އާސަންދަ ހިދުމަތް ދިނުމާއި ގުޅޭގޮތުން ކުރެވުނު ސުވާލަށް ޖަވާބު ދެއްވަމުން އާސަންދަ ކުންފުނީގެ މެނޭޖިން ޑިރެކްޓަރު އައިމިނަތު ޒީނިއާ ވިދާޅުވީ ތައިލެންޑާއި ޔޫއޭއީ އިން ސިއްހީ ޚިދުމަތް ހޯދޭ ގޮތަށް އާސަންދަ ހިދުމަތް ފުޅާކުރުމުގެ މަސައްކަތް އަދިވެސް ނުނިމޭ ކަމަށެވެ.
އާމިނަތު ޒީނިޔާ ވިދާޅުވީ ރައީސުލްޖުމްހޫރިއްޔާގެ ވިސްނުންފުޅަކީ އެއްގައުމު ދެގައުމަށް ބަރޯސާވުމުގެ ބަދަލުގައި ދިވެހިންނަކީ އެހެން ގައުމުތަކަށް ވެސް ސިއްހީ ހިދުމަތް ހޯދަން ދާ ބަޔަކަށް ވުމާއެކު ގިނަ ގައުމުތަކެއް އާސަންދަ ސްކީމުގެ ތެރެއަށް އިތުރުކުރުމުގެ ގޮތްތަކެއް ހެދުން ކަމަށެވެ. އެގޮތުން ތައިލެންޑް އަދި ޔޫއޭއީގައި ހިދުމަތް ފައްޓަން ކުރަންޖެހޭ ކަންކަން ކުރިއަށް ގެންދާ ކަމަށެވެ.
ޗައިނާއަށް ކުރެއްވި ދަތުރުފުޅަށްފަހު ޖެނުއަރީ މަހު ރާއްޖެ ވަޑައިގެން ނޫސްވެރިންނާއި ބައްދަލުކުރައްވާ ރައީސް ޑރ. މުހައްމަދު މުއިއްޒު ވިދާޅުވީ ޔުނައިޓެޑް އަރަބް އެމިރޭޓްސްއާއި ތައިލެންޑް ފަދަ ގައުމުތަކުން އާސަންދަ ލިބޭނެ އިންތިޒާމު ހަމަޖެއްސުމުގެ މަސައްކަތް ކުރަމުން އަންނަ ކަމަށެވެ.
ޖެނުއަރީ މަހުގެ 13 ވަނަ ދުވަހު ރައީސް ވިދާޅުވީ މިހާރު އާސަންދަ ލިބޭ ގައުމުތަކަށް ވުރެ މާ ފެންވަރު ރަނގަޅު، މާ މަތީ ފަންތީގެ ގައުމުތަކުން އާސަންދަ ލިބޭގޮތް ހަމަޖައްސަން މަސައްކަތް ކުރައްވާނެ ކަމަށެވެ.
ކުރިއަށް އޮތް ތަނުގައި އާސަންދައަކީ ހަމައެކަނި ވަކި ތަނެއްގައި، ވަކި ގައުމެއްގައި ހުންނަ މެޑިކަލް ފެސިލިޓީތަކުން އެކަނި ގޮސްގެން ބޭނުންކުރެވޭ އެއްޗަކަށް ނުހަދައި، އެއަށްވުރެ ފެންވަރު ރަނގަޅު ގައުމުތަކުން އާސަންދަ ލިބޭނެ އިންތިޒާމު ހަމަޖައްސަވާނެކަން ފާހަގަކުރައްވައި ރައީސް ވިދާޅުވީ، ޔޫއޭއީއަށާއި ތައިލެންޑަށް ރާއްޖޭގެ އާސަންދަ ފުޅާކުރައްވާނެ ކަމަށެވެ.
އަޅުގަނޑުމެން ގަސްތުކުރަނީ އަދި ނިންމާފައިވާނީ އިރާދަކުރެއްވިއްޔާ ކުރިއަށް އޮތްތާގައި އަޅުގަނޑުމެންގެ އާސަންދައަކީ ހަމައެކަނި ވަކި ގައުމެއްގައި، ވަކި ދިމާލެއްގައި ހުންނަ މެޑިކަލް ފެސިލިޓީތަކަށް ގޮސްގެން ބޭނުންކުރެވޭ އެއްޗަކަށް ނަހަދާ ތައިލެންޑަށާއި ޔޫއޭއީއަށް އަޅުގަނޑުމެންގެ އާސަންދަ ފުޅާކުރާނަން،ރައީސް ޑރ. މުހައްމަދު މުއިއްޒު
ނަމަވެސް މިހާތަނަށް އައި އިރުވެސް ތައިލެންޑް އަދި ޔުއޭއިން އާސަންދަ ލިބޭނެ ގޮތް ވަނީ ހަމަޖައްސައި ނުދެވިފައެވެ. އަދި އެކި ފަހަރުމަތިން އެކި މައުލޫމާތު ސަރުކާރުން ހާމަކޮށްފައިވާއިރު، މިކަން ހަމަޖެހޭނެ ދުވަހެއް އަދިވެސް ހާމަކޮށްފައިނުވެއެވެ.
އާސަންދައިގެ ހިދުމަތް މިހާރު ރާއްޖެއިން ބޭރުން ލިބެނީ އަވައްޓެރި އިންޑިއާ އާއި ލަންކާގެ ބައެއް ހޮސްޕިޓަލުތަކުންނެވެ.
