ރަފާ ސިޓީއަށް އިޒްރޭލުން ދޭ ހަމަލާތަކާ ގުޅިގެން އދ. ގެ ސެކިއުރިޓީ ކައުންސިލްގެ ކުއްލި ބައްދަލުވުމެއް ބާއްވައިފިއެވެ.

އަނެއްކޮޅުން އިޒްރޭލުގެ ފައުޖުތަކުން "ރައްކައުތެރި ސަރަހައްދު" އެއްގެ ގޮތުގައި ކަނޑައަޅާފައިވާ ރަފާ ގެ ހުޅަނގުގައި ގާއިމް ކޮށްފައިވާ ޓެންޓް ކޭމްޕަކަށް ހަމަލާދީ ފަލަސްތީންގެ 21 މީހުން ވަނީ މަރާލާފައެވެ. މީގެ ތެރޭގައި 13 އަންހެނުންނާ އަންހެން ކުދިން ހިމެނޭ ކަމަށް ރިޕޯޓްތައް ބުނެއެވެ.

ގާޒާގައި އިޒްރޭލް ސިފައިން ހިންގާ އަނިޔާވެރިކަން އިތުރުވަމުންދާއިރު، ދުނިޔޭގެ ގައުމުތަކުން އިޒްރޭލަށް ނުރުހުމާ ރުޅިވެރިކަން ފާޅު ކުރުން އަންނަނީ އިތުރުވަމުންނެވެ.

އަނެއްކޮޅުން ފަލަސްތީންގެ މިނިވަން ކަމަށް ތާއީދު ކޮށް ރަސްމީކޮށް ފަލަސްތީން ދައުލަތެއްގެ ގޮތުގައި ބަލައިގަނެ އެކަން ސްޕެއިނުންނާއި، އަޔަލޭންޑް އަދި ނޯވޭ އިން ބުދަ ދުވަހު ވަނީ އިއުލާން ކޮށްފައެވެ.

އިޒްރޭލުގެ ހަމަލާތަކުގެ ސަބަބުން އެހީއަށް ބޭނުންވާ ފަރާތްތަކަށް އެހީގެ ތަކެތި ފޯރުކޮށްދިނުމުގައި ބޮޑެތި ގޮންޖެހުންތައް ކުރިމަތިވަމުން ދާ ކަމަށް އދ. އިން ބުނަމުން އަންނަތާ އެތައް ހަފްތާއެއް ވެއްޖެއެވެ.

އދ. އިން ހާމަކޮށްފައިވާ ގޮތުގައި ފާއިތުވި 3 ހަފްތާގައި އެހީގެ ގޮތުގައި ފަލަސްތީން ރައްޔިތުންނަށް ލިބިފައިވަނީ 170 ލޮރީގެ ތަކެއްޗެވެ. އދ. އިން ސިފަ ކޮށްފައިވަނީ އެއީ "ކަނޑުން ފެންތިއްކެއް" ގެ މިންވަރުގެ ގޮތުގައެވެ. އެހީގެ ގޮތުގައި މަދުވެގެން ދުވާލަކު 500 ލޮރީގެ ތަކެތި ބޭނުންވާ ކަމަށް އދ. އިން އަންނަނީ ބުނަމުންނެވެ.

މެއި މަހުގެ ކުރީކޮޅު ރަފާ ސިޓީއަށް އަރާ އިޒްރޭލުން ދެމުންދާ ހަމަލާތަކުގެ ސަބަބުން ދިރިއުޅޭ ސަރަހައްދު ދޫކޮށް އެހެން ތަންތަނަށް ދާން މަޖުބޫރުވި މީހުންގެ އަދަދު މިހާރު 1 މިލިއަނަށް ވުރެ މައްޗަށް އަރައިފި ކަމަށް ޚަބަރުތައް ބުނެއެވެ. މީގެ ތެރެއިން ގިނަ މީހުންނަކީ، ހަމަލާތަކުން ރައްކައުތެރި ކަން ހޯދުމަށް އޭގެ ކުރިންވެސް ދިރިއުޅުނު ތަން ބަދަލު ކޮށް ވަގުތީ ހިޔާވަހި ކަމުގައި އުޅެމުން ދިޔަ މީހުންނެވެ.

ހުސްވި އަހަރުގެ އޮކްޓޯބަރ 7 ގެ ފަހުން ގާޒާ އަށް އިޒްރޭލުން ދެމުންދާ ހަމަލާތަކުގައި މިހާތަނަށް 36،096 ފަލަސްތީނުގެ ރައްޔިތުން މަރުވެފައިވެއެވެ. އަދި 81،136 މީހުން ޒަޚަމްވެފައިވެއެވެ.