އަނިޔާގެ ސަބަބުން ޑެ ރޫން އަށް ޔޫރޯގައި ވެސް ނުކުޅެވޭނެ!

އަނިޔާގެ ސަބަބުން އަންނަ މަހު ޖަރުމަނުގައި ފަށާ ޔޫރޯ ފުޓުބޯޅަ މުބާރާތުގައި ވެސް ނުކުޅެވޭނެކަން، ނެދަލެންޑްސްގެ ޑިފެންސިވް މިޑްފީލްޑަރު މާޓެން ޑެ ރޫން ހާމަކޮށްފި އެވެ.

އިޓަލީގެ އެޓަލަންޓާ އަށް ކުޅެމުން އަންނަ އުމުރުން 33 އަހަރުގެ ޑެ ރޫން އޭނާގެ ރަސްމީ އެކްސް އެކައުންޓުގައި ކުރި ޕޯސްޓެއްގައި ބުނީ، އަނިޔާގެ ސަބަބުން އޭނާ އަށް އިޓާލިއަން ކަޕްގެ ފައިނަލްގައި ނުކުޅެވުނު ކަމަށާއި، އެހެން ނަމަވެސް ޔުއެފާ ޔޫރޮޕާ ލީގު ކާމިޔާބު ކުރެވުނު ކަމަށެވެ.

އިޓާލިއަން ކަޕްގެ ފައިނަލްގައި އެޓަލަންޓާ އިން ވާދަކޮށްފައި ވަނީ ޔުވެންޓަސްއާ އެވެ. އެ މެޗުން އެޓަލަންޓާ ބަލިވެފައި ވަނީ 1-0 އިންނެވެ. އޭގެ ފަހުން ޔޫރޮޕާ ލީގުގެ ފައިނަލްގައި ބަޔާ ލެވަކޫސަނާ ދެކޮޅަށް ކުޅުނު މެޗު އެޓަލަންޓާ އިން ވަނީ 3-0 އިން ކާމިޔާބުކޮށް، މުބާރާތުގެ ތަށި އުފުލާލައިފަ އެެވެ. ޑެ ރޫން އަށް އަނިޔާވީ އިޓާލިއަން ކަޕްގެ ފައިނަލްގަ އެވެ. އަނިޔާވުމާއެކު، އެ މެޗުގައި އޭނާ ވަނީ ބަދަލުކޮށްފަ އެވެ.

އިތުރަށް ޑެ ރޫން އެ ޕޯސްޓުގައި ބުނީ، މެޑިކަލް ސްޓާފުންނާއެކު އޭނާ ގިނަ ވަގުތުތަކެއް ހޭދަކޮށްފައިވާ ކަމަށެވެ. އަދި ކުރިއަށް ގެންދިޔަ ޓެސްޓުތަކުން އެނގުނު ގޮތުގައި، އޭނާ އަށް އަންނަނ މަހު ފަށާ ޔޫރޯ މުބާރާތުގައި ނުކުޅެވޭނެ ކަމަށް ވެސް ޑެ ރޫން ވަނީ ބުނެފަ އެވެ. އެހެންކަމުން ނެދަލެންޑްސްގެ ޔޫރޯ ސްކޮޑުން އޭނާ އަށް ފުރުސަތު ގެއްލޭނެ އެވެ.

ޑެ ރޫން އަށް ނެދަލެންޑްސްގެ ޤައުމީ ޓީމުން ޖާގަ ލިބުނީ 2016 ވަނަ އަހަރު އެވެ. އޭގެ ފަހުން އޭނާ ވަނީ މިހާތަނަށް ޤައުމީ ޓީމަށް 42 މެޗު ކުޅެދީ، އެއް ލަނޑު ޖަހައިފަ އެވެ. އޭނާ ވަނީ ނެދަލެންޑްސް އާއެކު 2019-2018 ވަނަ އަހަރުގެ ޔުއެފާ ނޭޝަންްސް ލީގުގެ ފައިނަލްގައި ކުޅެފަ އެވެ. އެ ފައިނަލްގައި ނެދަލެންޑްސް ބަލިވެފައި ވަނީ ޕޯޗުގަލް އަތުންނެވެ.