އެގްރިކަލްޗާ ޒޯންގައި ކުކުޅު ބިސް ޕޯލްޓްރީ ފާމް އެއް ޤާއިމްކުރަނީ
މޯލްޑިވްސް އިންޑަސްޓްރިއަލް ޑިވެލޮޕްމެންޓް ފްރީޒޯން ކުންފުނިން ޗައިނާގެ ހާބާ އިންޖިނިއަރިންގް ކޮމްޕެނީ ލިމިޓެޑާއެކު އެއްބަސްވުމެއްގައި ސޮއިކުރީ މި އަހަރު ކުރީކޮޅު
ދަނޑުވެރިކަމާއި ދިރޭތަކެއްޗާ ބެހޭ ވަޒީރު ޑރ. ޢައިޝަތު ރަމީލާ
އުތުރުތިލަފަޅުގައި ތަރައްޤީކުރުމަށް ހަމަޖެހިފައިވާ އެގްރިކަލްޗާ ޒޯންގައި ކުކުޅު ބިސް ޕޯލްޓްރީ ފާމް ނުވަތަ ކުކުޅު ބިސް އުފައްދާ ކާރުހާނާއެއް ގާއިމުކުރަން ނިންމާފައިވާ ކަމަށް ދަނޑުވެރިކަމާއި ދިރޭތަކެއްޗާ ބެހޭ ވަޒީރު ޑރ. އައިޝަތު ރަމީލާ ވިދާޅުވެއްޖެއެވެ.
ބުރާސްފަތި ދުވަހު އެ ވުޒާރާގެ މަސައްކަތްތަކާއި ގުޅޭ ގޮތުން މަޢުލޫމާތުދެއްވަމުން މިނިސްޓަރ ރަމީލާ ވިދާޅުވީ އުތުރުތިލަފަޅުން ދަނޑުވެރިކަމުގެ ސަރަހައްދުގެ ގޮތުގައި 200 ހެކްޓަރުގެ ބިމެއް ކަނޑައަޅާފައިވާ ކަމަށެވެ. އެހެންކަމުން އެ ސަރަހައްދުގައި ދަނޑުވެރިކަން ކުރުމުގެ އިތުރުން ފުރަތަމަ ފިޔަވަހީގައި ކުކުޅު ބިސް އުފައްދާ ކާރުހާނާއެއް ޤާއިމްކުރުމަށް ނިންމާފައިވާ ކަމަށް އެކަމަނާ ވިދާޅުވިއެވެެ. މީގެ އިތުރުން އެ ޒޯންގައި ކުކުޅުގެ ކާނާވެސް ހައްދާނެ ކަމަށް ޑރ.ރަމީލާ ވިދާޅުވިއެވެ. ހަމައެހެންމެ އެ ތަނުގައި ކުކުޅުގެ ސިއްހީ ކަންކަން ބަލަހައްޓާ ފެސިލިޓީއެއް ވެސް ޤާއިމްކުރާނެ ކަމަށް މިނިސްޓަރ ވިދާޅުވިއެވެ. މިނިސްޓަރ ވިދާޅުވި ގޮތުގައި އެ މަސައްކަތް ކުރިއަށް ގެންދަން ހަމަޖެހިފައި ވަނީ ދެ ފިޔަވައްސަކަށް ބަހާލައިގެންނެވެ. އެ މަސައްކަތުގެ ފުރަތަމަ ފިޔަވަހީގައި ދަނޑުވެރިކަން ކުރަން ނިންމާފައިވަނީ 100 ހެކްޓަރުގެ ބިމުގައި ކަމަށް މިނިސްޓަރ ވަނީ ވިދާޅުވެފައެވެ.
އިތުރަށް ވާހަކަދައްކަވަމުން މިނިސްޓަރ ރަމީލާ ވިދާޅުވީ އެގްރިކަލްޗާ ޒޯންގައި ދަނޑުވެރިކަން ކުރާނެ މީހުން ތަމްރީންކުރުމުގެ މަސައްކަތް މިހާރު ކުރަމުންދާ ކަމަށެވެ. އަދި އެސަރަހއްދުގައި ދަނޑުވެރިކަމުގައި ބޭނުންކުރާ ވަސީލަތްތައް ޓެސްޓްކުރުމުގެ މަސައްކަތްތައް ކުރަމުންދާ ކަމަށް ވަނީ ވިދާޅުވެފައެވެ. ރާއްޖޭގެ ކާބޯތަކެތީގެ ރައްކާތެރިކަން ކަށަވަރުކުރުމަށްޓަކާ ދަނޑުވެރިކަމުގެ އިގްތިސާދީ ސަރަޙައްދެއް ގާއިމްކުރުމަށް މޯލްޑިވްސް އިންޑަސްޓްރިއަލް ޑިވެލޮޕްމެންޓް ފްރީޒޯން ކުންފުނިން ޗައިނާގެ ހާބާ އިންޖިނިއަރިންގް ކޮމްޕެނީ ލިމިޓެޑާއެކު އެއްބަސްވުމެއްގައި ސޮއިކުރީ މި އަހަރު ކުރީކޮޅެވެ.
