ވާޓިކަލް ފާމިންގ އަށް ފަސް ރަށެއް ހޮވައިފި
ވާޓިކަލް ފާމިންގ އަށް ހޮވާފައިވާ ރަށްތަކަކީ ނ. ކެނދިކުޅުދޫ، ރ. ހުޅުދުއްފާރު، ޅ. ނައިފަރު، އއ. މަތިވެރި އަދި ތ. ކިނބިދޫ އެވެ.
ހައިޑްރޮޕޯނިކް ވާރޓިކަލް ފާމެއް
ވާޓިކަލް ފާމިންގ މަޝްރޫޢުތަކަށް ފަސް ރަށެއް ހޮވައިފި ކަމަށް ސަރުކާރުން ބުނެފިއެވެ.
ސަރުކާރުން ބުނެފައިވަނީ މިއީ ދަނޑުވެރިކަން ޒަމާނީކޮށް، އިމްޕޯޓަށް ބަރޯސާވާ މިންވަރު މަދުކުރުމަށް ސަރުކާރުން ކުރަމުންދާ މަސައްކަތުގެ ތެރެއިން ހިންގާ މަޝްރޫއުތަކެއް ކަމަށެވެ.
މިނިސްޓަރ އޮފް އެގްރިކަލްޗަރ އެންޑް އެނިމަލް ވެލްފެއަރ އައިޝަތު ރަމީލާ ސަރުކާރުގެ މީޑިއާ ޕީއެސްއެމް އަށް ދެއްވި އިންޓަވިއުއެއްގައި މިކަން ހާމަކުރައްވައި، މި މަޝްރޫޢަކީ ރާއްޖޭގެ ދަނޑުވެރިކަން ކުރިއެރުވުމަށް އެޅޭ މުހިންމު ފިޔަވަޅެއް ކަމުގައި ވިދާޅުވިއެވެ.
ވާޓިކަލް ފާމިންގ އަށް ހޮވާފައިވާ ރަށްތަކަކީ ނ. ކެނދިކުޅުދޫ، ރ. ހުޅުދުއްފާރު، ޅ. ނައިފަރު، އއ. މަތިވެރި އަދި ތ. ކިނބިދޫ އެވެ. މި ރަށްތައް ހޮވީ ކޮން ގޮތަކަށް ކަން ބަލާފައިކަން ސަރުކާރުން ހާމަކޮށްފައި ނުވި ނަމަވެސް، މި ރަށްތަކުގެ ކައުންސިލް ތަކަށް އެ ރަށްތައް މަޝްރޫއު ހިންގުމަށް ހޮވިފައިވާ ކަން މިހާރު ވަނީ އަންގާފައި ކަމަށް މިނިސްޓަރު ވިދާޅުވިއެވެ.
މިނިސްޓަރު ވިދާޅުވި ގޮތުގައި، ވާޓިކަލް ފާމިންގ އަށް ބޭނުންވާ ސްޓްރަކްޗަރތައް ހޯދުމުގެ މަސައްކަތް މިހާރު ދަނީ ކުރެވެމުންނެވެ. އަދި މި ތަކެތި 2025 ވަނަ އަހަރުގެ ކުރީކޮޅު ލިބޭނެ ކަމަށް އުންމީދުކުރެވޭ ކަމަށްވެސް މިނިސްޓަރ ވިދާޅުވިއެވެ. މި ތަކެތި ލިބުމުން، ވާޓިކަލް ފާމިންގ އަށް ބޭނުންވާ ހުނަރާއި މަޢުލޫމާތު ރަށްރަށުގެ ދަނޑުވެރިންނަށް ދިނުމަށް ސަރުކާރުން ތަމްރީނު ޕްރޮގްރާމްތައް ފަށާނެ ކަމަށާއި އަދި އިތުރު ޓެކްނިކަލް އެހީތެރިކަންވެސް ފޯރުކޮށްދޭނެ ކަމަށްވެސް މިނިސްޓަރު ވިދާޅުވިއެވެ.
