އިންޓަރނޭޝަލް ކޯޓް އޮފް ޖަސްޓިސްގެ ހުކުމަށް ބޯލަންބުވަން އިޒްރޭލަށް ދަތިކުރުމުގެ ފިޔަވަޅު އަޅަން ޖެހޭ: ޔޫއެން ސްޕެޝަލް ރެޕަޓުއަރ

އދ.ގެ އެންމެ މަތީ ކޯޓު އިންޓަނޭޝަނަލް ކޯޓް އޮފް ޖަސްޓިސް (އައިސީޖޭ) އިން ރަފާ ސިޓީއަށް އިޒްރޭލުން ދެމުންދާ ހަމަލާތައް ވަގުތުން ހުއްޓާލުމަށް އިޒްރޭލުގެ މައްޗަށް ކުރި އަމުރަށް ތަބާވުމަށް އިޒްރޭލަށް މަޖުބޫރު ކުރުވުމަށް، އައިސީޖޭގެ މެމްބަރު ގައުމު ތަކުން އިޒްރޭލަށް އަސްކަރީ ގޮތުންނާއި ސިޔާސީ ގޮތުން ދަތިކުރުމުގެ ފިޔަވަޅު އެޅުމަށް އދ. ގެ ސްޕެޝަލް ރެޕަޓުއަރ ފްރޭންސިސްކާ އަލްބަނީސް ގޮވާލައްވައިފިއެވެ.

އައިސީޖޭ އިން ހަމަލާތައް ހުއްޓާލުމަށް އިޒްރޭލަށް އަމުރު ކުރި ފަހުން އިޒްރޭލުން ރަފާ ސިޓީއަށް ދޭ ހަމަލާތައް އިތުރަށް ވަރުގަދަ ކޮށްފައިވާ ކަންވެސް ހޮނިހިރު ދުވަހު އަލްބަނީސް އެކްސްގައި ހާމަ ކުރެއްވި ބަޔާނުގައި ވެއެވެ.

އިޒްރޭލުން ހަމަ ބުއްދި ފިލައިގެން މިއުޅޭ އުޅުން އިޒްރޭލުން އަމިއްލަ އަށް ނުހުއްޓާނެ ކަމަށާއި، އެކަން ޖެހޭނީ ނުކުމެ ހުއްޓުވަން ކަމުގައިވެސް އަލްބަނީސްގެ ބަޔާނުގައި ވިދާޅުވެފައިވެއެވެ.

އައިސީޖޭ އިން އިޒްރޭލުގެ މައްޗަށް ކުރި އަމުރުގައި ބުނެފައިވަނީ ރަފާ ސިޓީގައި ހިންގަމުންދާ ހުރިހާ ބާވަތެއްގެ އަސްކަރީ ހަރަކާތްތައް ވަގުތުން ހުއްޓާލާ އެތަނުން އިޒްރޭލް ސިފައިން ފޭބުމަށެވެ.

އެއްގަމު މަގުން ރަފާ ސިޓީއަށް އިޒްރޭލް ސިފައިން އަރާފައިވަނީ މެއި މަހުގެ ކުރީ ކޮޅު އެކަން އެގޮތައް ނުކުރުމަށް ބައިނަލް އަގްވާމީ މުޖްތަމައުން ގޮވާލަމުން ދަނިކޮށް އެގޮވާލުން ތަކަށް ބީރު ކަންފަތެއް ދިނުމަށްފަހުގައެވެ.

އާއްމު ނަމުން ދުނިޔޭގެ ކޯޓުގެ ގޮތުގައި މުޚާތަބް ކުރެވޭ އައިސީޖޭ އިން ކުރި އަމުރުގައި ރަފާ އަށް އެހީގެ ތަކެތި ފޯރުކޮށްދޭ މަގުތައް ބަންދުކޮށްފައި އޮތް އޮތުން ނިމުމަކަށް ގެނައުމަށްވެސް އިޒްރޭލަށް އަމުރު ކޮށްފައިވެއެވެ.

15 މެމްބަރުން ފަނޑިޔާރުންގެ ބެންޗުން އިޒްރޭލުގެ މައްޗަށް އަމުރު ނެރުމަށް 13 ފަނޑިޔާރުން ފެންނަ ކަމަށް ނިންމި އިރު އެ އަމުރާ ދެކޮޅު ހެދީ ދެ ފަނޑިޔާރެކެވެ. އެއީ ޔޫގެންޑާ އަށް ނިސްބަތްވާ ފަނޑިޔާރަކާ އިޒްރޭލަށް ނިސްބަތްވާ ފަނޑިޔާރެކެވެ.