ވެރިކަމުގެ ދައުރު ދިގުދަންމާލައި 10 އަހަރަށް އިތުރުކުރެއްވުމަކީ ކުރެވޭނެ ކަމެއް ނޫން: މޫސަ
25 މެއި 2024 | ހޮނިހިރު 07:24އަމިއްލަ ގޮތުން ވާދަ ކުރެއްވި ބައެއް މެމްބަރުންވެސް ގެންދަނީ ސަރުކާރު ހިންގާ ޕާޓީއާ ގުޅިވަޑައިގަންނަވަމުން
މަޖިލީހުގެ ކުރީގެ ނައިބް ރައީސް ރީކޯ މޫސާ މަނިކު
ވެރިކަމުގެ ދައުރު ދިގުދަންމާލައި 10 އަހަރަށް އިތުރު ކުރެއްވުމަކީ ކުރެވޭނެ ކަމެއް ނޫންކަމަށް މަޖިލީހުގެ ކުރީގެ ނައިބްރައީސް ރީކޯ މޫސާ މަނިކު ވިދާޅުވެއްޖެއެވެ.
ހޮނިހިރު ދުވަހު ރާއްޖެޓީވީގެ ފަށާއިރު ޕްރޮގްރާމްގައި ވާހަކަ ދައްކަވަމުން މޫސަ ވިދާޅުވީ، ވެރިކަމުގެ ދައުރު ދިގުދަންމާލައި 10 އަހަރަށް އިތުރު ކުރެއްވުމަކީ ކުރެވޭނެ ކަމެއް ނޫން ކަމަށެވެ. މިހާރު އޮތް ގޮތުން އެކަމަށްޓަކައި ރައްޔިތުންގެ ފެންނަ ނުފެންނަ ވޯޓެއްވެސް ނަގަންޖެހޭނެކަމަށް މޫސަ ވިދާޅުވިއެވެ.
އަދި މަޖިލީހަށް ހޮވޭ މެމްބަރުންނަކީ ރައީސް ބޭނުންފުޅުވާ ގޮތަކަށް ކަންކަން ކުރަން ތިބޭ ބައެއް ނޫންކަން ފާހަގަ ކުރައްވައި މޫސަ ވިދާޅުވީ، މަޖިލީހުގެ ރައީސަކަށް ހުންނަ މީހަކީ ރައީސުލްޖުމްހޫރިއްޔާގެ "ރަބަރ ސްޓޭމްޕްއަކަށް" ވެގެން ނުވާނެކަމަށެވެ.
އެހެންނަމަވެސް 20 ވަނަ މަޖިލީހުގެ ރައީސް އަބްދުއްރަޙީމް އަބްދުﷲ ދާދި ފަހުން ވަނީ މަޖިލިސް ހިންގަވާނީ ރައީސް ބޭނުންފުޅުވާ ގޮތަށްކަމަށް ވިދާޅުވެ އެ މޭރުމުން ވާހަކަ ދައްކަވާފައެވެ. އެއީ އެކަން އޮންނަންޖެހޭ ގޮތް ނޫންކަން މޫސަ ފާހަގަ ކުރެއްވިއެވެ.
މޫސަ އިތުރަށް ވިދާޅުވީ، އެމްޑީޕީން މިހާރު މަޖިލީހަށް ހޮވިފައިވާ މެމްބަރުންވެސް ބާރުވެރި ކުރުވައި އެކަންކަން ކަށަވަރު ކުރުމަށް ނުކުމެ ކުރެވިދާނެ މަސައްކަތްތައް އެބަހުރި ކަމަށެވެ.
މިހާރުވެސް އަމިއްލަ ގޮތުން ވާދަ ކުރެއްވި ބައެއް މެމްބަރުންވެސް ގެންދަނީ ސަރުކާރު ހިންގާ ޕާޓީއާ ގުޅިވަޑައިގަންނަވަމުންނެވެ.
