ވޭތުވެދިޔަ ހަފްތާގައި ކޮލްކަތާގެ ސަރުކާރު ހޮސްޕިޓަލެއްގައި ޓްރެއިނީ ޑޮކްޓަރަކު ރޭޕްކޮށް މަރާލި މައްސަލައާ ގުޅިގެން އެ އަނިޔާވެރި އަމަލު ކުށްވެރިކޮށް އިންސާފު ހޯދައިދިނުމަށް ގޮވާލާ ކޮލްކަތާގައި ބޮޑު މުޒާހަރާ އެއް ކޮށްފިއެވެ.

ރިޕޯޓްތައް ބުނާ ގޮތުގައި ކޮލްކަތާގެ 100 ށް ވުރެ ގިނަ ސަރަހައްދުގައި "ރިކްލެއިމް ދަ ނައިޓް" ގެ ނަމުގައި ބުދަ ދުވަހުގެ ރޭ ފެށި މުޒާހަރާ، މިއަހަރުގެ އިންޑިއާގެ މިނިވަން ދުވަސް ކަމަށްވާ ބުރާސްފަތި ދުވަސް ފެށިގެން އައި އިރުވެސް ދިޔައީ ކުރިއަށެވެ.

މިދިޔަ ހުކުރު ދުވަހު އާރް.ޖީ. ކާރ މެޑިކަލް ކޮލެޖް އެންޑް ހޮސްޕިޓަލް ގައި އުމުރުން 31 އަހަރުގެ ޓްރޭނީ ޑޮކްޓަރަކު ރޭޕް ކޮށް މަރާލި ހަދިސާ އާއެކު މުޒާހަރާ ތައް އިންޑިއާގައި ހިނގަމުންދާތާ ގާތްގަނޑަކަށް ހަފްތާއެއް މިހާރު ވަނީ ވެފައެވެ.

ކޮލްކަތާ އާއި އެހެން ސަރަހައްދުތަކުގައި ބުދަ ދުވަހުގެ ރޭ އޮތް މުޒާހަރާގައި ޝުއޫރު ފާޅު ކުރި މީހުން މި އަނިޔާވެރި ހަމަލާ ކުށްވެރި ކުރަމުން ގޮވަމުން ދިޔައީ އަންހެނުންނަށް ދެވޭ މިފަދަ އަނިޔާވެރި ހަމަލާތަކުން އަންހެނުންނަށް ރައްކައުތެރިކަން ހޯދައިދިނުމަށް އަޅަން ޖެހޭ ފިޔަވަޅު އެޅުމަށެވެ.

ބުދަ ދުވަހުގެ ރޭގެ މުޒާހަރާ މައިގަނޑުގޮތެއްގައި ސުލްހަވެރިކޮށް ދިޔަ ނަމަވެސް ބައެއް ކުރިމަތިލުންތައް ހިނގާ ހަމަނުޖެހުން އުފައްދަން އުޅުނު މީހުންނާ ދިމާލަށް ފުލުހުން ކަރުނަ ގޭސް ޖަހާފައިވާ ކަމަށް ރިޕޯޓްތައް ބުނެއެވެ.

ބައެއް މީހުން ވަނީ އާރ ޖީ ކާރ ހޮސްޕިޓަލަށް ވަދެ އެތަނުގެ އިމަޖެންސީ ޑިޕާޓްމަންޓަށް ގެއްލުން ދީފައެވެ.

ދިއްލީ މުމްބާއީ ހައިދަރްއާބާދް އަދި ޕޫނޭ ގައި ވެސް މުޒާހަރާ ކުރި ކަމަށް ޚަބަރުތައް ބުނެއެވެ.

މި ހާދިސާ ގައި މަރާލީ އަންހެން މީހާއަށް އިންސާފު ހޯދަދިނުމަށް ގޮވާލާ އިންޑިއާގެ އެކި ސަރަހައްދުތަކުގައި ޑޮކްޓަރުން އިހްތިޖާޖު ކުރަމުން ގެންދާތީ އިމަރޖެންސީ ޚިދުމަތް ނޫން އެހެން ޚިދުމަތްތައް ސަރުކާރު ހޮސްޕިޓަލުތަކުން ވަނީ މެދުކަނޑާލާފައެވެ.

ރޭޕް އާ މަރުގެ ހާދިސާ ހިނގީ ރިޕޯޓްތައް ބުނާ ގޮތުގައި، އެ އަންހެންމީހާ 36 ގަޑީއިރުގެ ޝިފްޓް އަކަށް ފަހު ވަރުބަލިވެގެން އައިސް މެޑިކަލް ކޮލެޖްގެ ސެމިނާރ ޔޫމްގައި ޖައްސާލިތަނުން އޭނާ އަށް ނިދިފައި އޮއްވައެއް. އެ ހޮސްޕިޓަލަކީ އަރާމު ކޮށްލަން ވަކި ޚާއްސަތަނެއް ކަނޑައަޅާފައި ހުންނަ ތަނެއް ނޫން ކަމަށްވެއެވެ.

އަނެއް ދުވަހުގެ ހެނދުނު، އޭނާގެ އެކުވެރިންނަށް ފެނުނީ ސެމިނަރ ހޯލްގެ ޕޯޑިއަމް މަތީގައި އޭނާގެ މަރުވެފައިވާ ހަށިގަނޑު ބޮޑެތި ޒަހަމްތަކަކާއެކު އެކު އޮއްވައެވެ.

މި މައްސަލައިގެ ތުހުމަތުގައި ހޮސްޕިޓަލުގެ ވޮލަންޓިއަރ މުވައްޒަފަކު ވަނީ ހައްޔަރުކުރެވިފައެވެ.

އިންޑިއާގެ މިނިވަން ދުވަހުގެ މުނާސަބަތުގައި ބޮޑު ވަޒީރު ދެއްކެވި ވާހަކަފުޅުގައި އަންހެނުންނަށް ދެވޭ އަނިޔާތަކާ މެދު ތަދު އިހްސާސް ކުރެއްވޭ ކަމަށް ވިދާޅުވިއެވެ. މޯދީ ކޮލްކަތާގައި ހިނގައިގެން އުޅޭ ހާދިސާގެ ވާހަކަ ސީދާ ވިދާޅު ނުވިޔަސް އަންހެނުންނާ ދެކޮޅަށް ހިންގާ ޖަރީމާތައް އަވަހަށް ތަހުގީގު ކުރަން ޖެހޭނެ ކަމަށާއި، އަންހެނުންނަށް ދޭ އަނިޔާތަކަށް އަވަހަށް އަދި އެންމެ ހަރުކަށި އަދަބު ދިނުމަށް މޯދީ ގޮވާލެއްވިއެވެ.

އިންޑިއާގެ ނޭޝަނަލް ކްރައިމް ރެކޯޑްސް ބިއުރޯ ގެ ތަފާސް ހިސާބުގެ މައްޗަށް ބަލާއިރު 2022 ވަނަ އަހަރު އޭގެ ކުރީ އަހަރާ އަޅާ ކިޔާއިރު އަންހެނުންނަށް ދޭ އަނިޔާތައް 4 އިން ސައްތަ އިންޑިއާ ގައި ވަނީ މައްޗަށް ގޮސްފައެވެ.