އެމްޑީޕީގެ ޕާލިމެންޓްރީ ގުރޫޕުގެ މަޤާމުތަކަށް މެމްބަރުން އިންތިޚާބުކުރުން މިމަހު 28 ވަނަ ދުވަހު ބާއްވާގޮތަށް އެ ޕާޓީން ހަމަޖައްސައިފިއެވެ.

އެމްޑީޕީން ވަނީ އެ ދުވަހަކީ 20 ވަނަ ރައްޔިތުން މަޖުލީހުގެ މެންބަރުން މަޤާމު ހުވާ ކުރެއްވުމަށް ހަމަޖެހިފައިވާ ދުވަސްކަން ފާހަަގަކޮށްފައެވެ. އެމްޑީޕީން ބުނީ އެ ޕާޓީގެ ޕާލިމެންޓަރީ ގްރޫޕްގެ އިންތިޚާބު 28 މޭ 2024 ވާ އަންގާރަ ދުވަހު ބޭއްވުމަށް ހަމަޖެހިފައިވާ ކަމަށެވެ. އަދި އެ އިންތިޚާބުގައި ޕާލިމެންޓަރީ ގްރޫޕްގެ ލީޑަރާއި، 2 ނައިބު ލީޑަރުންނާއި، ސެކްރެޓަރީ ޖެނެރަލާއި، ސެކްރެޓަރީ ޖެނެރަލްގެ ނާއިބު، ޗީފް ވިޕް އަދި ވިޕްގެ މަޤާމަށް ދެ ބޭފުޅުން އިންތިހާބުކުރުން އޮންނާނެކަމަށެވެ.

އެމްޑީޕީން ވަނީ މި މަޤާމްތަކަށް ވާދަކުރަން ބޭނުންވާ އެ ޕާޓީގެ ޕާލިމެންޓަރީ ގްރޫޕްގެ މެންބަރުން މޭ 27 ވާ ހޯމަ ދުވަހުގެ 14:00 ގެ ކުރިން އީމެއިލް މެދުވެރިކޮށް އެންގުމަށް އެދިފައެވެ. މި މަހުގެ 28 ވަނަ ދުވަހު ރައްޔިތުންގެ މަޖިލީހުގެ މެމްބަރުން ހުވާކުރެއްވުމަށް ވަނީ ހަމަޖެހިފައެވެ. 20 ވަނަ ރައްޔިތުންގެ 93 މެމްބަރުން ހިމެނޭ މަޖިލީހަށް އެމްޑީޕީގެ ފަރާތުން އިންތިޚާބުވެފައިވަނީ 12 މެމްބަރުންނެވެ.