ޤައުމިއްޔަތުގެ ނަމުގައި ރައީސް މުއިއްޒު މަސައްކަތް ކުރައްވަނީ ފިތުނަފަސާދަ އުފައްދަވަން: މެންބަރު ފަލާހު
ހުރިހާ ސަރުކާރެއް ވެސް މަސައްކަތް ކުރަނީ ގައުމީ ދިދައިގެ ދަށުގައި
ރައީސުލްޖުމްހޫރިއްޔާ ޑރ.މުހައްމަދު މުއިއްޒު
ގަމިއްޔަތުގެ ނަމުގައި ރައީސުލްޖުމްހޫރިއްޔާ ޑރ.މުހައްމަދު މުއިއްޒު މަސައްކަތް ކުރައްވަނީ ފިތުނަފަސާދަ އުފެއްދެވުމަށް ކަމަށް ރައްޔިތުންގެ މަޖިލީހުގެ މާފަންނު ހުޅަނގު ދާއިރާގެ މެންބަރު މުހައްމަދު ފަލާހު ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި މެންބަރު ފަލާހު ވިދާޅުވީ މިސަރުކާރުން ވަރަށް ބޮޑަށް ގައުމިއްޔަތު ދެއްކުމަށް މަސައްކަތް ކުރާ ކަމަށެވެ. ނަމަވެސް ހަގީގީ ގައުމިއްޔަތު ނުފެންނަ ކަމަށާއި، ރައްޔިތުންނާއި ގައުމަށް މިސަރުކާރުގައި ތަފާތު ގޮތަކަށް ބަދަލު ނާންނަ ކަމަށް އޭނާ ވިދާޅުވިއެވެ. ގައުމިއްޔަތުގެ އެންމެ މުހިންމު ސިފައަކީ އިސްލާމް ދީން ކަމަށްވާއިރު، އެހެން ސަރުކާރުގައި ތަކުގައި ވެސް މިސްކިތްތައް އަޅައި، ދީން ކުރިއެރުވުމަށް ގިނަ މަސައްކަތްތައް ކޮށްފައިވާ ކަމަށް މެންބަރު ފަލާހު ވިދާޅުވިއެވެ.
މެންބަރު ފަލާހު ވިދާޅުވީ ހުރިހާ ސަރުކާރެއް ވެސް މަސައްކަތް ކުރަނީ ގައުމީ ދިދައިގެ ދަށުގައި ކަމަށާއި، ގައުމީ ސަލާމް ކިޔާ ކަމަށެވެ. އަދި އެ ދިދައަށް ދޭންޖެހޭ އިހްތިރާމް ދޭ ކަމަށެވެ. އަދި ގައުމިއްޔަތަށް އިސްކަންދިން ނަމަވެސް ރައީސް މުއިއްޒުގެ ސަރުކާރު ބޭފުޅުން ގޮތަށް ގައުމިއްޔަތުގެ ނަމުގައި މޭމަތީގައި އަތް ނާޅުއްވާ ކަމަށް މެންބަރު ފަލާހު ވިދާޅުވިއެވެ. އަދި ވިދާޅުވީ އެއީ ގައުމިއްޔަތު އިސްކުރުން ނޫން ކަމަށާއި، ގައުމިއްޔަތުގެ ނަމުގައި ރައީސް މުއިއްޒު މަސައްކަތް ކުރައްވަނީ ރައްޔިތުންގެ މެދުގައި ފިތުނަފަސާދަ އުފައްދަވައި ރައްޔިތުންގެ ހިތްތަކުގައި އެމްޑީޕީގެ މެންބަރުންނަށް ނަފްރަތު އުފައްދަވަން ކަމަށެވެ.
މެންބަރު ފަލާހު ވިދާޅުވީ މިރާއްޖޭގެ ރައްޔިތުންނަށް ގައުމިއްޔަތު ގެނެސްދިނުމަށް މާބޮޑު މަސައްކަތެއް މިސަރުކާރުން ނުކުރާ ކަމަށާއި، އެމަންޒަރު ނުފެންނަ ކަމަށެވެ. މިސަރުކާރަށް ހަ މަސް ދުވަސްވެގެންދިޔައިރު މަސައްކަތް ކުރީ ބުހުތާނު ދޮގު ހަދައިގެން އެމްޑީޕީގެ މެންބަރުންނަކީ އަދި އެމްޑީޕީއަކީ ވެސް ގައުމިއްޔަތާ ދުރު ބައެއްގެ ގޮތުގައި ދެއްކުމުގެ މަންޒަރު ކަމަށެވެ. ނަމަވެސް އެކަން ވެސް ކާމިޔާބުނުވާ ކަމަށް މެންބަރު ފަލާހު ވިދާޅުވިއެވެ.
