މަސްތުވާތަކެތީގެ ވިޔަފާރިކުރާކަމުގެ ތުހުމަތުގައި 3 މީހަކު ބަންދުކޮށްފި
3 މީހުން ހައްޔަރުކުރީ ގިނަ އަދަދެއްގެ މަސްތުވާތަކެއްޗާއެކު
މަސްތުވާތަކެތީގެ އޮޕަރޭޝަނެއްގެ ތެރެއިން
މަސްތުވާތަކެތީގެ ވިޔަފާރިކުރާ ކަމުގެ ތުހުމަތުގައި 3 މީހަކު ބަންދުކޮށްފިއެވެ.
ފުލުހުން އެދިގެން ކްރިމިނަލް ކޯޓުން ނެރުނު އަމުރުގައި ބަންދުކުރުމަށް އަމުރުކޮށްފައިވަނީ 35 އަހަރުގެ ދިވެހި ފިރިހެނަކާއި، 35 އަހަރުގެ ދިވެހި އަންހެނެއްގެ އިތުރުން 21 އަހަރުގެ ދިވެހި ފިރިހެނެކެވެ. މި 3 މީހުންގެ ބަންދަށްވެސް ދީފައިވަނީ 10 ދުވަހެވެ.
މި މައްސަލައިގައި ކްރިމިނަލް ކޯޓުން ނެރުނު ބަންދު އަމުރުގައި ބުނެފައިވަނީ ކުށުގެ ތުހުމަތުކުރެވޭ ކޮންމެވެސް މިންވަރެއްގެ ހެކި ހުށަހަޅާފައިވާ ކަަމަށެވެ. އެގޮތުން ސީނަށް ދިޔަ ފުލުހުންގެ ބަޔާނާއި، އިންޓެލިޖެންސް ރިޕޯޓާއި، ސީންގެ ފޮޓޯ ރިޕޯޓަށް ބަލާއިރު، 35 އަހަރުގެ ފިރިހެން މީހާ އާއި އަންހެން މީހާ އަކީ ކުށްކޮށްފައިވާ މީހެއްކަމަށް ބެލެވޭ ސަބަބުތަކެއް ހުރިކަމަށް ފާހަގަކުރެވޭ ކަމަށް ބުނެފައިވެއެވެ. އަދި މި ސީނަށް ދިޔަ ފުލުހުންގެ ބަޔާނާއި، ސީންގެ ފޮޓޯ ރިޕޯޓަށް ބަލާއިރު، މަސްތުވާތަކެތިކަމަށް ޝައްކުކުރެވޭ އެއްޗެއްހުރި ސެލޯފިން ކޮޅާއި ރަބަރު ޕެކެޓާއި މަސްތުވާތަކެތި ކަމަށް ޝައްކުކުރެވޭ އެއްޗެއް ހުރި ޖޫސްޕެޓީ ކޮތަޅު ފެނިފައިވެއެވެ.
އަދި މިތަނުން ފެނުނު މަސްތުވާތަކެތީގެ ވަގުތީ ބަރުދަނުގައި ހެރޮއިން ކަމަށް ތުހުމަތުކުރެވޭ 999.6 ގްރާމްއާއި ކެނެބިސް ކަމަށް ތުހުމަތުކުރެވޭ 43.77 ގްރާމާއި އިތުރު ބާވަތްތައް ފެނިފައިވާ ކަމަށް ފުލުހުން ބުނެފައިވެއެވެ.
މީގެ އިތުރުން 35 އަހަރުގެ މި ދެމީހުން ކޯޓުގައި ބުނެފައިވަނީ ސީނުން ފެނުނު މަސްތުވާތަކެއްޗަކީ އޭނާއާއި އެއްވެސް ގުޅުމެއްނެތް ތަކެތި ކަމަށާއި، އޭނާއަކީ އެ އެޕާޓްމަންޓުގައި ކުއްޔަށް އުޅޭ ފަރާތެއް ކަމަށެވެ. ނަމަވެސް މި މީހާގެ ކުޑަކަމުދާތަކެތި ބެންޒޯޑައިޒިޕައިންއާއި އެމްފިޓަމިން އަދި އޯޕިއޭޓްސްއަށް ޕޮޒިޓިވްވެފައިވެއެވެ. ކޯޓު އަމުރުގައި ބުނެފައިވަނި މި މައްސަލައަކީ ޖަމާއަތް ހަދައިގެން ހިންގާފައިވާ ކަމެއްކަމަށް ބެލެވޭ ކަމަށެވެ. އަދި މި މައްސަލައިގައި މަސްތުވާތަކެތި ބަންދުކޮށް ކުރުމަށް ބޭނުންކުރާ އާލާތްތައް ފެނިފައިވާ ކަމަށް އަމުރުގައި ބުނެފައިވެއެވެ.
މި މައްސަލައިގައި ބަންދުކުރި 21 އަހަރުގެ މީހާގެ ބަންދު އަމުރުގައި ބުނެފައިވަނީ މި ކުށްކޮށްފައިވަނީ ޖަމާއަތް ހަދައިގެން ކަމަށާއި، އެގޮތުން މި މައްސަލައާއި ގުޅިގެން އިތުރު ފަރާތްތަކެއްވެސް ބަންދުކުރެވިފައިވާ ކަމަށެވެ. އަދި އެތަނުން ގިނަ އަދަދެއްގެ މަސްތުވާތަކެތި ފެނިފައިވާއިރު، މަސްތުވާތަކެތި ބަންދުކޮށް ކުރުމަށް ބޭނުންކުރާ އާލާތްތައް ފެނިފައިވެއެވެ.
އަދި މައްސަލައިގައި ފެނުނު ތަކެއްޗަށް އެހެން ފަރާތަކުން ޒިންމާ ނަގާފައިވާކަމަށާއި، އެތަނަކީ 21 އަހަރުގެ މީހާ ދިރިއުޅޭ ތަނެއް ނޫން ކަމަށާއި، އޭނާ އެ ކޮޓަރިއަށް ވަނީ ފާހާނާއަށް ވަދެލަން ކަމަށެވެ. މީގެ އިތުރުން މައްސަލައިގެ ސީނުން ފެނުނު މަސްތުވާކަތެއްޗަކީ އޭނާއާއި އެއްވެސް ގުޅުމެއްނެތް އޭނާގެ ހިޔާޒަތުން ފެނުނު ތަކެތި ނޫންކަމަށް 21 އަހަރުގެ މީހާ ވަނީ ބުނެފައެވެ.
އެ ކޮޓަރި ތެރޭގައި ހުރި ރޯނެއްގައި ހުރި އޭނާގެ އަންނައުނަކީ އޭނާ ލައިގެން ހުރި ތަކެތިކަމަށް ދިފާއުން ފާހަގަކޮށްފައިވެއެވެ. އަދި މި ތަކެތި ފިޔަވައި އޭނާގެ އިތުރު އަންނައުނެއް އަދި އޭނާއާ ގުޅުންހުރި އެހެން އެއްޗެއް އެތަނުގައި ނުހުންނާނެކަމަށް ބުނެފައިވެއެވެ.
މި 3 މީހުން ބަންދުގައި ބަހައްޓަން އަމުރުކުރި ހާލަތުގެ ގޮތުގައި ބުނެފައިވަނީ ގާނޫނުއަސާސީގެ 49 ވަނަ މާއްދާއާއި، ޖިނާއީ އިޖްރާއަތުގެ ގާނޫނުގެ 59 ވަނަ މާއްދާއާއި 60 ވަނަ މާއްދާގެ ދަށުން، ބަންދުން ދޫކޮށްލައިފިނަމަ މުޖްތަމައުގެ ސަލާމަތަށް ނުރައްކާވެދާނެކަމަށް ފެންނާތީއެވެ.
އަދި ބަންދުގައި ބަހައްޓަންޖެހޭ ހާލަތް އޮތްކަމަށް ދެކޭ ސަބަބެއްގެ ގޮތުގައި ބުނެފައިވަނީ ޝަރީއަތްކުރުމާއި ބެހޭ ޖިނާއީ އިޖުރާއަތުގެ ގަވާއިދުގެ 13 ވަނަ މައްދާގެ (ނ) ގެ 4،3،1 އަދި 6 ވަނަ ނަންބަރުގައި ހުރިކަންކަން ފުރިހަމަވާކަމަށް ބެލެވޭތީއެވެ.
