މިއަހަރުގެ މިހާތަނަށް ޒަކާތު ފަންޑަށް 98.6 މިލިއަން ރުފިޔާ ލިބިފައިވޭ: މިނިސްޓަރު ޝަހީމް
25 ޑިސެމްބަރު 2024 | ބުދަ 13:01އަމާޒަކީ އަހަރަކު މަދުވެގެން 100 މިލިއަން ރުފިޔާއަށް ޒަކާތު ފަންޑުން ހޯދުން
ޒަކާތުގެ ފައިސާ ބަލައިގަންނަނީ
މިއަހަރުގެ މިހާތަނަށް ޒަކާތު ފަންޑަށް 98.6 މިލިއަން ރުފިޔާ ލިބިފައިވާ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
ބުދަ ދުވަހު ޒަކާތު ފަންޑާއި ގުޅޭގޮތުން މިނިސްޓަރު ޝާހީމް ވިދާޅުވީ 2024 ވަނަ އަހަރު ޒަކާތު ފަންޑަށް 25 ޑިސެންބަރު 2024އާއި ހަމައަށް 98.6 މިލިއަން ރުފިޔާ ލިބިފައިވާ ކަމަށާއި، ރާއްޖޭގެ ތާރީޚުގައި އެންމެ ގިނަ އަދަދަކަށް ޒަކާތަށް ފައިސާ ލިބުނު އަހަރު ކަމަށެވެ.
މިނިސްޓަރު ޝަހީމް ވިދާޅުވީ އަމާޒަކީ އަހަރަކު މަދުވެގެން 100 މިލިއަން ރުފިޔާއަށް ޒަކާތު ފަންޑުން ހޯދުން ކަމަށާއި، ޝަރުއީ އަސާސްގެ އަލީގައި ޒަކާތުގެ ހައްގުވެރިންނަށް ފުޅާދާއިރާއެއްގައި އެހީތެރިވުން ކަމަށެވެ.
ޒަކާތް ދެއްކުމަށް ވަރަށް ބޮޑަށް ބާރުއަޅައި، އެކަމަށް އާއްމު ރައްޔިތުން ހޭލުންތެރިކުރުމަށް ވެސް އިސްލާމިކް މިނިސްޓްރީން ދަނީ ގިނަ މަސައްކަތްތައް ކުރަމުންނެވެ. ޒަކާތު ފަންޑުން މިސްކީނުންނާއި ފަގީރުންގެ ބޭސްފަރުވާއަށް ޚަރަދު ކުރުމުގެ އިތުރުން، ފަލަސްތީނުގެ ހާލުގައި ޖެހިފައިވާ ރައްޔިތުންނަށް ވެސް މި އަހަރު އެހީ ފޯރުކޮށްދީފައިވެއެވެ.
އަންގާރަ ދުވަހު މިނިސްޓަރު ޝާހީމް ވިދާޅުވީ ގަތަރު ރެޑް ކްރެސެންޓުން ދަނީ ރާއްޖޭގެ ޒަކާތު ފަންޑުގެ އެހީތެރިކަމާއެކު ފަލަސްތީންގެ މުސްލިމުންނަށް ފެން ކޭސް ފޯރުކޮށްދެމުން ކަމަށެވެ. އެގޮތުން މިހާތަނަށް ބަންދުކޮށްފައިވާ 6،000 ކޭސް ފެން ފަލަސްތީންގެ ރައްޔިތުންނަށް ވަނީ ފޯރުކޮށްދީފައެވެ. މި ތަކެތި ފޯރުކޮށްދީފައިވަނީ އަލް ޝިފާ އަދި އަލް ހަޔާތު ހޮސްޕިޓަލްގައި ތިބި ބަލިމީހުންނަށެވެ.
ރާއްޖޭގެ ޒަކާތު ފަންޑުގެ އެހީގައި 60،000 ފަލަސްތީންގެ މުސްލިމުންނަށް 50،000 ފެން ކޭސް ފޯރުކޮށްދިނުމަށް ވެސް ވަނީ ހަމަޖެހިފައެވެ.
