މިސްރާއި ގަތަރު މެދުވެރިއެއްގެ ރޯލު އަދާކޮށްގެން ކުރިޔަށްގެންދިޔަ ސުލްހައިގެ ވާހަކަތަކުގައި ހުށަހަޅާފައިވާ ހަމަލާ ބަދަލުކުރުން ހުއްޓާލުމުގެ އެއްބަސްވުން ބަލައިގަންނަކަމަށް ހަމާސް ޖަމާއަތުން ބުނެފިއެވެ.

ހަމާސްގެ ޕޮލިޓިކަލް ބިޔުރޯ ގެ ހެޑް އިސްމާއީލް ހަނިއްޔާ ވަނީ ޤަތަރުގެ ބޮޑުވަޒީރު ޝެއިޚް މުހައްމަދު ބިން އަބްދުލްރަހުމާން އަލް ޘާނީ އަދި މިސްރުގެ އިންޓެލިޖެންސް ކަންތައްތަކާ ބެހޭ ވަޒީރު އައްބާސް ކަމާލް އާ ފޯނުން ގުޅުއްވާ އެކަމަށް ހަމާސް އިން އެއްބަސްވެފައިވާކަމަށް ވިދާޅުވެފައެވެ.

މިއެއްބަސްވުމުގެ މާގިނަ ތަފްސީލުތަކެއް އަދި މިހާތަނަށް އައިއިރު ހާމަވެފައެއްނުވެއެވެ.

ނަމަވެސް ހަމާސްގެ ޕޮލިޓިކަލް ބިޔުރޯގެ މެމްބަރެއް ކަމުގައިވާ ޚަލީލް އަލް ޙައްޔާ އަލް ޖަޒީރާ އާ ވާހަކަދައްކަވަމުން ވިދާޅުވީ މި އެއްބަސްވުމުގައި ގެދޮރު ގެއްލިފައިވާ ޣައްޒާގެ ރައްޔިތުން އަލުން އަނބުރާ އެމީހުންގެ ގެދޮރަށް އައުމާއި ޣައްޒާއިން އިޒްރޭލުގެ އަސްކަރިއްޔާ ފޭބުމާއި އަސީރުން މިނިވަންކުރުމާއި އިޒްރޭލުގެ ޖަލުތަކުގައި ތިބި ފަލަސްތީނުގެ ރައްޔިތުން މިނިވަންކުރުން ހިމެނޭކަމަށެވެ.

ފޭސް ތަކަކަށް ބަހާލައިގެން މިކަންކަން ކުރިޔަށްދާއިރު ފުރަތަމަ ފޭސްގެ ތެރޭގައި އަސީރުންނާއި ޖަލުގައި ތިބި ގައިދީން މިނިވަންކުރުމުގެ ވާހަކަތައް މެދުވެރިއެއްގެ ދައުރާއެކު ފެށިގެންދާނެއެވެ. އަދި ޣައްޒާގެ ވަކި ހިސާބުތަކަކުން އިޒްރޭލު އަސްކަރިއްޔާ ފޭބުމާއި ޣައްޒާގެ ރައްޔިތުންނަށް އަނބުރާ އެމީހުންގެ ގޯތި ގެދޮރަށް ދެވުމާއި ޣައްޒާއަށް ބޭނުންވާ އެހީގެ ސާމާނު އޭގެތެރޭގައި ތެލާއި އެހެނިހެން ޒަރޫރީތަކެތި ޣައްޒާއަށް އެތެރެކުރެވޭނެއެވެ.

އަދި ދެ ވަނަ ފޭސްގެ ތެރޭގައި ހަމަލާ ބަދަލުކުރުން ދާއިމީ ގޮތެއްގައި ހުއްޓާލުން އިއުލާންކުރެވިގެންދާނެއެވެ.

މިއެއްބަސްވުމާއި ގުޅޭގޮތުން ދެން ގޮތެއް ނިންމުން އޮތީ އިޒްރޭލަށެވެ.

އަނެއްކޮޅުން އެމެރިކާގެ ސްޓޭޓް ޑިޕާޓްމަންޓްގެ ސްޕޯކްސްޕާސަން މެތިއު މިލާ ވިދާޅުވީ ހަމާސް އިން އެއްބަސްވި އެއްބަސްވުން އެމެރިކާއިން މުރާޖާކުރާނެކަމަށެވެ. އެމެރިކާގެ ބައިވެރިންނާ ގުޅިގެން މިއެއްބަސްވުން މުރާޖާކުރުމުގެ މަސައްކަތްކުރަމުންދާކަމަށް މިލާ ވިދާޅުވިއެވެ. އަދި އެންމެ އިސްކަމެއްދީގެން އެމެރިކާ ސަރުކާރުން މިވަގުތުކުރަމުންދާނެ ކަމަކީ މިއީކަމަށްވެސް މިލާ ވިދާޅުވިއެވެ.

ހަމާސް އިން ހަމަލާދިނުން ހުއްޓާލުމަށް އެއްބަސްވިކަން ހާމަކުރުމާއި ގުޅިގެން ރަފަހްގައި ޣައްޒާގެ ރައްޔިތުން ވަނީ އުފާފާޅުކޮށްފައެވެ.

އޮކްޓޯބަރު މަހުގެ 7 ވަނަ ދުވަހުން ފެށިގެން އިޒްރޭލުން މެދުކެނޑުމެއްނެތި ހިންގަމުންދާ ގަތުލުއާންމުގައި މިހާތަނަށް ފަލަސްތީނުން 34،735 މީހުންގެ ފުރާނަ ވަނީ ގެއްލިފައެވެ.