ސަރުކާރާއި ރައީސަށް ފާޑުކިޔާނަމަ، "ރަނޑު ނުވެ" އެކަން ކުރުމަށް އެދިއްޖެ

"ރަނޑު ނުވެ" ކެރިގެން ސަރުކާރާއި ރައީސަށް ފާޑުކިޔުމަށް ރައީސް އޮފީހުގެ ކޮމިއުނިކޭޝަން މިނިސްޓަރު އިބްރާހީމް ހަލީލު އެދިވަޑައިގެންފިއެވެ.

ދައުލަތުގެ މީޑިއާއަށް ދެއްވި އިންޓަވިއުއެއްގައި ހަލީލު ވިދާޅުވީ، އަމިއްލައަށް ކޮން ބައެއްކަން ނޭނގޭގޮތަށް އެއްޗެހި ލިޔެ އުޅުމަކީ ރަނޑު ކަމެއް ކަމަށެވެ. އޭގެ ބަދަލުގައި ކެރިގެން ނުކުމެ ސަރުކާރަށާއި ރައީސުލްޖުމްހޫރިއްޔާއަށް ވެސް ފާޑުކިޔަންވީކަމަށް ހަލީލް ވިދާޅުވިއެވެ.

ހަލީލު ވިދާޅުވީ، ރާއްޖޭގައި ޑިމޮކްރަސީގެ ކަންކަން ފެށިގެންދިޔައިރު ކާކުކަން ނޭނގޭ ގޮތަށް ހިންގާ ސައިޓުތައްވެސް ހުންނަ ކަމަށާއި، ނަމަވެސް މިއަދު ބޭނުން އެއްޗެއް ލިޔެ، ބޭނުން ވާހަކައެއް ދެއްކުމުގެ ފުރުސަތު އެބައޮތް ކަމަށެވެ.

އޭގެ އިތުރުން، މިހާރު މީޑިއާގެ ބްލެކްލިސްޓެއް ނޯންނާނެކަން ފާހަގަ ކުރައްވައި ހަލީލު އިތުރަށް ވިދާޅުވީ، އަމިއްލައަށް "ބްލެކް ލިސްޓު ކަމަށް ދެއްކެން" ވެސް ބައެއް މީޑިއާތަކުން މަސައްކަތް ކުރާ ކަމަށެވެ.

ހަލީލް މިހެން ވިދާޅުވެފައިވަނީ ސަރުކާރަށް ފާޑުކިޔާ ދެ ނޫހެއް ބްލޮކް ކޮށް ހިޔާލު ފާޅުކުރުމަށް ހުރަސްއެޅިކަން ބަޔާންކޮށް އިދިކޮޅު މައިޕާޓީ އެމްޑީޕީން ވެސް ކަންބޮޑުވުން ފާޅުކޮށްފައިވާ ދަނޑިވަޅެއްގައެވެ.

އަދި ފާއިތުވި ހަ މަސް ދުވަހުގެ ތެރޭގައި ސަރުކާރުން ރާވައި އިންތިޒާމުވެގެން, ރަސްމީ އިދާރާތަައް މެދުވެރިކޮށް, ކަންކަމުގެ ހަގީގަތް ކަނޑައެޅިގެން އޮޅުވާލުމަށް މަސައްކަތް ކޮށްފައިވާކަމަށްވެސް އެމްޑީޕީން ބުނެއެވެ.

އޭގެ އިތުރުން، ނޫސްވެރިންގެ މަސައްކަތްތަކަށް ހުރަސް އެޅުމަށް ނޫސްވެރިންނަށް ރައީސް އޮފީހަށް ފޯނު ނުވެއްދޭ ގޮތަށް އެ އޮފީހުގެ އުސޫލުތައް ކުއްލި ގޮތަކަށް ބަދަލުކުރުމަކީ ވެސް ބަލައިގަނެވޭނެ ކަމެއް ނޫންކަމަށް އެމްޑީޕީން ބުނެފައިވެއެވެ.