އަންހެން ކުއްޖާ ވެއްޓުނު ހ. ފެންޓެނޯއީ ގެއަށް ނޫސްވެރިން ނުވެއްދީ ގޭގެ ވެރިފަރާތުން ބުނެގެން ކަމަށް، ފުލުހުން ބުނާ ބުނުން ގޭގެ ވެރިފަރާތުން ދޮގުކޮށްފި
އުމުރުން 21 އަހަރުގެ ހައްވާ ޔުމްނު ވެއްޓުނު ހ. ފެންޓެނޯއިގެއަށް ނޫސްވެރިން ނުވައްދާނެ ކަމަށް ގޭގެ ވެރިފަރާތުން ފުލުހުންނަށް ވަނީ އަންގާފައި
ޔުމްނާ ވެއްޓުނު ކަމަށް ބުނާ ހ.ފެންޓެނޯއީގޭގެ ސިޑިގޮޅީގެ މަންޒަރެއް - ފެންޓެނޯއީ ގެއަށް ވަނުމަށް ނޫސްވެރިންނަށް ހުއްދަ ނުދިން
މި މަހުގެ 18 ވަނަ ދުވަހުގެ ރޭ ފަތިހު އުމުރުން 21 އަހަރުގެ ހައްވާ ޔުމްނު ވެއްޓުނު ހ. ފެންޓެނޯއިގެއަށް ނޫސްވެރިން ނުވައްދާނެ ކަމަށް އެ ގޭގެ ވެރިފަރާތުން އަންގާފައިވާ ކަމަށް ފުލުހުން ބުނާ ބުނުމަކީ ދޮގެއް ކަމަށް ގޭގެ ވެރިފަރާތުން ބުނެފި އެވެ.
ރާއްޖެއެމްވީއާއި ވާހަކަ ދައްކަވަމުން ގޭގެ ވެރިފަރާތުން ވާހަކަ ދެއްކެވި ޝިމާޒް އަބްދުﷲ ރަޝީދު ވިދާޅުވީ ނޫސްވެރިން އެގެއަށް ވައްދަން، ގޭގެ ވެރިފަރާތާއި ފުލުހުން އެއްވެސް މަޝްވަރާއެއްކޮށްފައި ނުވާ ކަމަށާއި މިކަމާއި ގުޅިގެން ފުލުހުން ހަދަނީ ދޮގެއް ކަމަށެވެ.
ބުރާސްފަތި ދުވަހު ފުލުހުން ބޭއްވި ނޫސްވެރިންގެ ބައްދަލުވުމުގައި އެގެއަށް ނޫސްވެރިންނަށް ވަދެވޭނޭ އިންތިޒާމު ހަމަޖައްސައި ދެއްވަން މަސައްކަތް ކުރައްވާނޭ ކަމަށް ފުލުހުން ވިދާޅުވުމަށްފަހު، ފުލުހުން މީޑިއާތަކަށް ފޮނުވި މެސެޖެއްގައި ބުނީ ހ. ފެންޓެނޯއިގެއަށް ނޫސްވެރިންނަށް ވަދެވޭނެ ފުރުސަތު ހޯދުމުގެ ގޮތުން އެ ގޭގެ ވެރިފަރާތާ މަޝްވަރާ ކުރުމުން އެ ގެއަށް ނޫސްވެރިން ނުވެއްދޭނެ ކަމަށް އެ ފަރާތުން ބުނެފައިވާ ކަމަށެވެ. ނަމަވެސް މިކަމަށް ރައްދު ދެއްވާ ޝިމާޒް ވިދާޅުވީ މިކަމުގައި ފުލުހުން ދޮގު ހަދާފައިވާ ކަމަށާއި އެފަރާތަށް މިކަން އެނގުނީވެސް މީޑިއާއިން ކަމަށެވެ.
މިއަދުގެ ޕްރެސްގައި ދެންނެވި ގޮތަށް ހާދިސާ ހިނގި ގެއަށް ނޫސްވެރިންނަށް ވަދެވޭނެ ފުރުސަތު ހޯދުމުގެ ގޮތުން އެ ގޭގެ ވެރިފަރާތާ މަޝްވަރާކުރުމުން އެގެއަށް މީޑިއާ ވެއްދުމުގެ ހުއްދަ ދެވެންނެތްކަމަށް ވަނީ ގޭގެ ވެރިފަރާތުން ވިދާޅުވި ކަމަށް ފުލުހުން އެންގެވިއެވެ.ފުލުހުން މީޑިއާއަށް ފޮނުވި މެސެޖު
އެ ގެއަށް ނޫސްވެރިން ވެއްދޭތޯ މަސައްކަތް ކުރާނެ ކަމަށް ފުލުހުން ވިދާޅުވީ ޔުމްނު ވެއްޓުނު ހާދިސާއާ ގުޅޭގޮތުން އެކި ގޮތްގޮތަށް ސޯޝަލްމީޑިއާގައި ވާހަކަތައް ފެތުރެމުން ދާތީ އެ ފަރާތްތަށް ހަރަކާތްތެރި ވެފައިވާ ތަންތަނުގެ މަންޒަރު ނޫސްވެރިންނަށް ދައްކާލުމަށް ކަމަށް ފުލުހުން ވަނީ ވިދާޅުވެފައެވެ.
ފުލުހުން މީޑިއާތަކަށް މައުލޫމާތު ދީފައިވާ ގޮތުގައި ޔުމްނު ވެއްޓިފައި ވަނީ ހ. ފެންޓެނޯއި ގޭގެ ނުވަ ވަނަ ފަންގިފިލާގައި ހުރި ފެންލައިޓަކުންނެވެ.
ބުރާސްފަތި ދުވަހުގައި އޮތް ނޫސްވެރިންގެ ބައްދަލުވުމުގައި ފުލުހުން ވަނީ ފެންޓެނޯއި ގޭގެ ސިޑިގޮޅި ފެންނަ ސީސީޓީވީ ފުޓޭޖު ވެސް އާންމު ކޮށްފަ އެވެ. އެއީ މީގެ ކުރިން ސިއްރު ކޮށްގެން ބޭއްވި ނޫސްވެރިންގެ ބައްދަލުވުމުގައި ދެއްކި ފުޓޭޖެވެ. ނަމަވެސް ސިއްރުން ބޭއްވި ބައްދަލުވުމުގައި ނޫސްވެރިންނަށް ދެއްކި ވީޑިއޯ ފުޓޭޖުގައި ދައްކާފައިނުވާ އިތުރު ބައެއް މަންޒަރުތައް ބުރާސްފަތި ދުވަހުގެ ދެއްކި ފުޓޭޖުންގައި ހިމަނާފައިވާކަން ފާހަގަކޮށްލެވެއެވެ.
ފުލުހުން އާންމުކުރި ސީސީޓީވީ ފުޓޭޖުން ފެންނަ ގޮތުގައި ޔުމްނު ވެއްޓުނު ކަމަށް ބެލެވެނީ ހުކުރު ދުވަހުގެ ފަތިހު 4:52 ހާއިރު އެވެ. ޔުމްނު އާއި ރައުދު އެ ގެއަށް ވަނުމާ ހަމައިން ކަން ހިނގަމުން ދިޔަ ގޮތް އެ ވީޑިއޯއިން ފެނެ އެވެ. އަދި ޔުމްނު ވެއްޓުމަށްފަހު އޭނާ ހޯދުމަށް ރައުދު އުޅޭ މަންޒަރު ވެސް ފުލުހުން އާންމުކުރި ވީޑިއޯ ފުޓޭޖުން ފެނެ އެވެ.
ފުލުހުން ބުނީ އެ ވީޑިއޯއިން ފެންނަ މަންޒަރުތަކަކީ އެރޭގައި ކަންހިގައި ދިއަ ގޮތުގެ މަންޒަރުތައް ކަމަށާއި މި މައްސަލައިގައި އަދިވެސް ބަލަން ޖެހޭ ކަންކަން ހުރުމުން އެކަންކަން ބަލައި ތަހުގީގުކުރުމުގެ މަސައްކަތް ކުރިއަށް ދާކަމަށެވެ.
