މިއީ އިސްތިއުފާ ދޭންޖެހޭ ވަގުތުކަމަށް ގަބޫލެއް ނުކުރަން: ފައްޔާޒު
ބަލިވި ސަބަބުތައް ދެނެގަނެ ކުރިޔަށް އޮތީ ޕާޓީ ވަރުގަދަކުރުންކަމަށް ފައްޔާޒު ވިދާޅުވި
އެމްޑީޕީގެ ޗެއަރޕާސަން ފައްޔާޒު އިސްމާއީލު
ރިޔާސީ އިންތިޚާބާއި ރައްޔިތުންގެ މަޖިލީހުގެ އިންތިޚާބުން އެމްޑީޕީ އަށް ކުރިމަތިވި ބޮޑު ނާކާމިޔާބީ އާއެކު ޕާޓީގެ ލީޑަރޝިޕް އިސްތިއުފާ ދޭންޖެހޭކަމަށް ބުނާ އަޑުތައް ގަދަވަގެންދިޔަނަމަވެސް މިއީ އިސްތިއުފާ ދޭންޖެހޭ ވަގުތު ނޫންކަމަށް އެމްޑީޕީގެ ޗެއަރޕާސަން ފައްޔާޒު އިސްމާއީލު ވިދާޅުވެއްޖެއެވެ.
ބުދަ ދުވަހުގެ ރޭ ސިއްރުކޮށްގެން ބޭއްވި އެމްޑީޕީގެ ގައުމީ މަޖިލީހަށްފަހު ޕާޓީގެ ރައީސް އަބްދުﷲ ޝާހިދު އާއި ޗެއަރޕާސަން ވަނީ ނޫސްވެރިންނާ ބައްދަލުކުރައްވާ ވާހަކަދައްކަވާފައެވެ. މިބައްދަލުކުރުމުގައި ނޫސްވެރިން ވަނީ ދެ އިންތިޚާބަކުން އެމްޑީޕީއަށް ކުރިމަތިވި ނާކާމިޔާބީއަކީ އެމްޑީޕީގެ ލީޑަރޝިޕްގެ ފެއިލްވުމެއްކަމަށާއި ފައްޔާޒު އިސްތިއުފާ ދޭންޖެހޭކަމަށް ބުނެ ސޯޝަލް މީޑިޔާގައި ގިނަ ބަޔަކު ޝުއޫރު ފާޅުކުރަމުންދާކަން ފާހަގަކޮށްފައެވެ. އަދި އެއާއެކު ފައްޔާޒު އިސްތިއުފާ ދެއްވަފާނެތޯ ވަނީ ސުވާލުކޮށްފައެވެ.
އެސުވާލަށް ޖަވާބު ދެއްވަމުން ފައްޔާޒު ވިދާޅުވީ އިންތިޚާބުތަކުން ކޮންމެސް އެއްބަޔަކު މޮޅުވެ އަނެއް ބަޔަކު ބަލިވާނީކަމުގައެވެ. އެހެންކަމުން ބަލިވި ސަބަބުތައް ދެނެގަނެ ކުރިޔަށް އޮތީ ޕާޓީ ވަރުގަދަކުރުންކަމަށް ފައްޔާޒު ވިދާޅުވިއެވެ. އެމްޑީޕީގެ ގައުމީ މަޖިލީހުގެ ޖަލްސާއިން ނިންމާފައިވަނީ އެމްޑީޕީ އަށް އިންތިޚާބުތައް ގެއްލިގެންދިޔަ ސަބަބުތައް ދެނެގަތުމަށް ދިރާސާއެއް ކުރުމަށްފަހު އެމްޑީޕީ ކުރިޔަށް ގެންދަން ޖެހޭގޮތުގެ މަގު ޗާޓެއް އެކުލަވާލުމަށެވެ.
ފައްޔާޒު ވިދާޅުވީ މިއީ އަނެއްކާވެސް އެމްޑީޕީ ނަގާ ކޮޅަށް ޖަހަންޖެހޭ ވަގުތުކަމުގައެވެ. އަދި އެއަށްފަހު ކުރިޔަށް އޮތްތަނުގައި ލިޑަރޝިޕް ބަދަލުކުރަން މެމްބަރުން ބޭނުންވާކަމަށްވާނަމަ އެފުރުސަތު ދޭނެކަމަށް ފައްޔާޒު ވިދާޅުވިއެވެ.
ފައްޔާޒު ވިދާޅުވީ ޕާޓީ ވަރުގަދަ ކުރުމުގެ މަސައްކަތްކުރުމަށްފަހު އަންނަ އަހަރު ތެރޭގައި ކޮންގްރެސް ބާއްވާނެކަމަށެވެ. އަދި ކޮންގްރެސް ތެރޭގައި އެފަދަ ކަމަކަށް ބޭނުންވާނަމަ އެކަމަށް ފުރުސަތު އޮންނާނެކަމަށް ފައްޔާޒު ވިދާޅުވިއެވެ.
ފައްޔާޒު މިމޭރުމުން ވާހަކަދައްކަވާފައިވާއިރު އެމްޑީޕީގެ ރައީސް އަބްދުﷲ ޝާހިދު ވަނީ ފައްޔާޒު އިސްތިއުފާ ނުދެއްވުމަށް އެދިވަޑައިގަންނަވާފައެވެ. ޝާހިދު ވިދާޅުވީ އެމްޑީޕީގެ ލީޑަރޝިޕްގައި ތިބި މީހުންނަކީ ބަލިވާ ކޮންމެ ފަހަރަކު މައިދާން ދޫކޮށް ފިލާނެ ބައެއް ނޫންކަމަށެވެ.
ޝާހިދު އިތުރަށް ވިދާޅުވީ އެމްޑީޕީ އަކީ އިންތިޚާބުތަކުގައި ކާމިޔާބީއާއި ނާކާމިޔާބީ ވެސް ކުރިމަތިލާފައިވާ ޕާޓީއެއްކަމަށެވެ.
