ޑިމޮކްރެޓްސް އާއި އެމްޑީޕީއިން ގުޅިގެން މަޖިލިސް އިންތިޚާބަށް ނުކުތް ނަމަ ފުދޭވަރެއްގެ ގިނަ ގޮނޑިތައް ކާމިޔާބުކުރެވުނީސް: މެންބަރު އާޒިމް

ދަ ޑިމޮކްރެޓްސް އާއި ދިވެހިރައްޔިތުންގެ ޑިމޮކްރެޓިކް ޕާޓީ (އެމްޑީޕީ)އިން ގުޅިގެން 20 ވަނަ ރައްޔިތުންގެ މަޖިލީހުގެ އިންތިޚާބަށް ނުކުތް ނަމަ ފުދޭވަރެއްގެ ގިނަ ގޮނޑިތައް ކާމިޔާބުކުރެވުނީސް ކަމުގައި މެދުހެންވޭރު ދާއިރާގެ މެންބަރު އަލީ އާޒިމް ވިދާޅުވެއްޖެއެވެ.

ރާއްޖެޓީވީގެ ފަށާއިރު ޕްރޮގްރާމްގައި މެންބަރު އާޒިމް ވިދާޅުވީ، 20 ވަނަ ރައްޔިތުން މަޖިލީހުގެ އިންތިޚާބުގެ ނަތީޖާއާ ގުޅޭގޮތުން ވަރަށް ބައިވަރު ވާހަކަތައް ދެއްކިދާނެ ކަމަށެވެ. އެއީ މެޗު ނިމުމުން ބޮޑަށް ކަންތައްތައް ކުރަންވީ ގޮތް އެނގޭތީ ކަމުގައި އޭނާ ވިދާޅުވިއެވެ.

އާޒިމް ވިދާޅުވީ ރިޔާސީ އިންތިޚާބަށްފަހު މަޖިލިސް އިންތިޚާބުގައި އެމްޑީޕީއާއެކުގައި މަސައްކަތް ކުރުމަށް ވަރަށް ގިނަ މަސައްކަތްތައް ކުރެއްވި ނަމަވެސް، އެކަން ކާމިޔާބުވާ ގޮތް ނުވީ ކަމަށެވެ. އަދި އެކުގައި ދެޕާޓީން މަސައްކަތް ކުރި ނަމަ މާލެސިޓީގެ އިތުރުން އަތޮޅުތެރެއިން ވެސް ގިނަ ގޮނޑިތަކެއް ނެގޭނެ ކަމަށް އޭނާ ވިދާޅުވިއެވެ. އަދި ބައެއް ގޮނޑިތައް ގެއްލިފައިވަނީ ވަރަށް މަދު ވޯޓަކުން ކަމުގައި އާޒިމް ފާހަގަކުރެއްވިއެވެ.

އާޒިމް ވިދާޅުވީ ދެ ޕާޓީން ގުޅިގެން މަސައްކަތް ކުރުމަކީ އުންމީދެއް ކަމަށެވެ.

20 ވަނަ ރައްޔިތުން މަޖިލީހުގެ އިންތިޚާބުގައި ޑިމޮކްރަޓްސްއަށް އެއްވެސް ގޮނޑިއެއް ކާމިޔާބު ކުރެވިފައިނުވެއެވެ. އަދި އެމްޑީޕިއަށް ކާމިޔާބު ކުރެވިފައިވަނީ 12 ގޮނޑިއެވެ.