ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫން (ލާމަރުކަޒީ ގާނޫން) އަށް ގެނައި އިސްލާހް ބާތިލު ކުރުމަށް ދިވެހި ރައްޔިތުންގެ ޑިމޮކްރަޓިކް ޕާޓީ (އެމްޑީޕީީ) އިން ކޯޓަށް ހުށަހަޅައިފިއެވެ.

އެމްޑީޕީ އިން ބުރާސްފަތި ދުވަހު ހުށަހެޅި މައްސަލައިގައި ލާމަރުކަޒީ ގާނޫނަށް 16 ވަނަ އިސްލާހު ގެނައުމުގެ ގާނޫން ގެ 70 ވަނަ މާއްދާގެ (ޅ) ގެ ގޮތުގައި އިތުރުކޮށްފައިވާ މާއްދާ އާއި 1-144 ގެ ގޮތުގައި އިތުރުކޮށްފައިވާ މާއްދާތަކަކީ، ގާނޫނުއަސާސީގެ 230 ވަނަ މާއްދާ އިން ކަނޑައަޅާފައިވާ ލާމަރުކަޒީ ނިޒާމުން އިދާރީ ދާއިރާތައް ހިންގުމުގެ އުސޫލާ ހިލާފު މާއްދާތަކެއް ކަމަށް ބުނެފައިވެއެވެ.

އޭގެ އިތުރުން، މި މާއްދާތަކުގެ ސަަބަބުން ގާނޫނު އަސާސީ އިން ރައްޔިތުންނަށް ކަށަވަރު ކޮށްދީފައިވާ ރައްޔިތުން ހިޔާރުކުރާ މަންދޫބުން މެދުވެރިކޮށް ރައްޔިތުންގެ ކަންކަން ހިންގުމަށް ލިބިދޭ ހައްގާއި، ގާނޫނުއަސާސީ އިން ކަށަވަރުކޮށްދޭ މުދާ ހޯދައި ގެންގުޅުމުގެ ހައްގު ނިގުޅިގެން ދާތީ އާއި، މި މާއްދާތައް ފާސްކޮށްފައި ވަނީ، ގާނޫނުއަސާސީގެ 16 ވަނަ މާއްދާއާ ހިލާފަށްކަމަށްވާތީ، އާއި މި އިސްލާހުގެ މި ދެ މާއްދާ ބާތިލުކަމަށް ކަނޑައަޅައި ދިނުމަށް އެދިފައިވެއެވެ.

ސަރުކާރުން ހުށަހަޅައިގެން، ލާމަރުކަޒީ ގާނޫނު އަށް 16 ވަނަ އިސްލާހު ގެނައުމުގެ ޤާނޫނު ރައްޔިތުންގެ މަޖިލީހުން ފާސްކޮށް، 14 އޮގަސްޓު 2025 ގައި، ރައީސުލްޖުމްހޫރިއްޔާ އެ ގާނޫނު ތަސްދީގު ކުރެއްވުމުން އެ ގާނޫނަށް އެ ތާރީހުގައި ވަނީ އަމަލު ކުރަން ފަށާފައެވެ.

ސުޕްރީމް ކޯޓަށް ހުށަހެޅި މައްސަލައިގައި ގާނޫނަށް ގެނައި ބަދަލުތަކުގެ ސަބަބުން ލޯކަލް ކައުންސިލުގެ ދައުރާއި ބާރުތައް ހަނިވާގޮތަށް އުސޫލުތައް ކަނޑައަޅައިފައިވާ ކަމަށް ބުނެފައިވެއެވެ.

އެ ގޮތުން ލޯކަލް އޮތޯރިޓީ ކުންފުނިތަކުން ކުރާ ވިޔަފާރީގެ މަސައްކަތްތަކަކީ ވަކި ހާއްސަ ޝަރުތުތަކެއް ފުރިހަމަވާ ކަންކަން ކަމުގައިވާންވާނެ ކަމަށް ކަނޑައެޅުމާއި، އެ ކުންފުނިތަކުގެ ދާއިރާ ހަނިކޮށްފައިވާ ކަމަށާއި، އެ މަސައްކަތަކީ، ރަށުގައި ނުވަތަ ރަށްތަކުގައި އުމްރާނީ ތަރައްޤީއަށް ކޮންމެހެން ކުރަންޖެހޭ ކަމެއްކަމުގައި ވާން ޖެހޭނެ ކަމަށް ކަނޑައެޅުމާއި، އެ މަސައްކަތުގެ އިންވެސްޓްމަންޓު ނުވަތަ ރައުސުލްމާލުގެ އަދަދު، 10،000،000 ރުފިޔާއަށްވުރެ ބޮޑުވާން ޖެހޭނެ ކަމަށް ކަނޑައެޅުން ފާހަގަ ކޮށްފައިވެއެވެ.

ހުށަހަޅާފައިވާ މައްސަލައިގައި ބުނެފައިވަނީ ލޯކަލް އޮތޯރިޓީ ކުންފުނިން ކުރިން ފަށައިފައިވާ ވިޔަފާރިތަކުގެ ތެރެއިން، މި ޝަރުތުތަކާ ތަޢާރުޟުވާ ވިޔަފާރިތައް، ޤާނޫނަށް ޢަމަލުކުރަންފަށާތާ 90 ދުވަހުގެ ތެރޭގައި ހުއްޓައިލަން ވާނޭ ކަމަށްވެސް މި މާއްދާގައި ބަޔާންކޮށްފައިވާ ކަމަށާއި ކައުންސިލުގެ 5 އަހަރުގެ ދައުރުގެ ތެރެއިން، ފަހު އަހަރުގައި، މާލީ ވުޒާރާއާއި ލޯކަލް ގަވަމަންޓް އޮތޯރިޓީން ކަނޑައަޅާ ގޮތެއްގެ މަތިން މެނުވީ، ބައެއް ކަންކަން ކުރުމަށް ނިންމައިގެންނުވާނެ ކަމަށް ކަނޑައަޅައި، ކައުންސިލުގެ ޒިންމާ އަދާކުރުމަށް އޮތް މުއްދަތު ކުރު ކުރު ކޮށްފައިވާ ކަމަށެވެ.

މީގެ އިތުރުން މި ގާނޫނަށް ގެނައި އިސްލާހާ އެކު ކައުންސިލުގެ އިދާރާއަށް ނުވަތަ ކައުންސިލުގެ އޮފީހަކަށް ދާއިމީ މުވައްޒަފުންގެ ގޮތުގައި ނުވަތަ ކޮންޓްރެކްޓް އުސޫލުން މުވައްޒަފުން ނެގުމާއި، ކައުންސިލުގެ އިހްތިސާސްގެ ދަށުގައި ހުރި ބިމާއި، ފަޅާއި، ފަރުގެ ސަރަހައްދުތައް ކުއްޔަށް ދޫކުރުމާއި، ދިނުމާއި، ކައުންސިލުތަކުން އެކަށައަޅައިފައިވާ ތަރައްޤީގެ ޕްލޭންތަކުގައި ކަނޑައަޅައިފައިނުވާ އާ ތަރައްޤީގެ މަޝްރޫއުތައް ފެށުން ވަނީ ނިމުމަކަށް ގެނެސްފައެވެ.

މައްސަލައިގައި ބުނެފައި ވަނީ ކައުންސިލްތަކާ ހަވާލުކޮށްފައިވާ މަސްއޫލިއްޔަތުތަކާއި ވާޖިބުތައް އަދާކުރުމަށް ހުރަސްއަޅައި، ގާނޫނުއަސާސީ އިން އެކަށައަޅާފައިވާ ލާމަރުކަޒީ ނިޒާމުގެ ބާރު ކަނޑުވާލާތީ، މި މާއްދާތައް، ގާނޫނުއަސާސީގެ 230 ވަނަ މާއްދާއާ ހިލާފުވާ ކަމަށް ދެކޭ ކަމަށެވެ.

މި އިސްލާހުތަކުގެ ސަބަބުން، ރައްޔިތުން ހިޔާރުކުރާ މަންދޫބުން މެދުވެރިކޮށް އެމީހުންގެ ކަންކަން ހިންގުމުގެ ހައްގަށް ހުރަސްއަޅާ އިރު، މި އިސްލާހުތައް ރެޓްރޯއެކްޓިވްކޮށް ހިނގާގޮތަށް ގާނޫނު ފާސްކޮށްފައި ވަނީ ގާނޫނުއަސާސީގެ ކަމާ ގުޅުން ހުރި މާއްދާތަކާ ހިލާފަށް ކަމަށް ބުނެފައިވެއެވެ.

ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމަކީ ގާނޫނުއަސާސީގެ 230 ވަނަ މާއްދާއިން ލާޒިމުކުރާ ކަމެކެވެ.

ގާނޫނުއަސާސީގެ 231 ވަނަ މާއްދާ ގައި ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގަން ޖެހޭނީ ރައްޔިތުން އިންތިހާބުކުރާ ކައުންސިލްތައް މެދުވެރިކޮށްގެން ކަމަށް ވެސް ބުނެފައިވެއެވެ.