ކުނީގެ މައްސަލައަކީ ސިޓީ ކައުންސިލާ ހަވާލުވި އިރުވެސް ހައްލު ނުވެ އޮތް މައްސަލައެއް - އާޒިމް
މަގާމާއި ހަވާލުވެވަޑައިގެންނެވި ދުވަހުން ފެށިގެން ވެމްކޯއާ ވާހަކަ ދައްކަވައިގެން މަސައްކަތް ކުރައްވަން ފެއްޓެވިކަމުގައި އާޒިމް ވިދާޅުވި
މާލޭގެ ސަރަހައްދެއްގައި ހުރި ކުނިތަކެއް
މާލޭގެ ކުނީގެ މައްސަލައަކީ، ސިޓީ ކައުންސިލާ ހަވާލުވެވަޑައިގެންނެވި އިރުވެސް ހައްލުނުވެ އޮތް މައްސަލައެއް ކަމަށް މާލެ ސިޓީގެ މޭޔަރު އާދަމް އާޒިމް ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމުގައި ވާހަކަ ދައްކަވަމުން އާޒިމް ވިދާޅުވީ މާލޭގެ ކުނީގެ މައްސަލަ ހައްލުކުރުމަށް، މަގާމާއި ހަވާލުވެވަޑައިގެންނެވި ދުވަހުން ފެށިގެން ވެސް، ވެމްކޯއާ ވާހަކަ ދައްކަވައިގެން މަސައްކަތް ކުރައްވަން ފެއްޓެވި ކަމަށެވެ. އަދި މައްސަލަ ހައްލުވަންދެން ބަލައިގެން ނުތިބެ ސިޓީ ކައުންސިލަށް ވެސް ކުރެވުނު ކަމެއް ކުރުމުގެ މަސައްކަތް ފެއްޓެވި ކަމަށް އާޒިމް ވިދާޅުވިއެވެ.
އާޒިމް ވިދާޅުވީ މަގާމާއި ހަވާލުވެވަޑައިގެންނެވި އިރު މާލެތެރެ އޮތީ ގޮނޑުވެފައި ކަމަށާއި، އެކަން ދިޔައީ ދުވަހަކަށްވުރެ ދުވަހެއް ގޯސްވަމުން ކަމަށެވެ. އަދި ވެށިފާރަވެރިންނާއި ފުލުހުންނާއި ގުޅިގެން ކުރަން ފެށި މަސައްކަތާއެކު ވަގުތީ ހައްލެއް ލިބުނު ނަމަވެސް، ދާއިމީ ހައްލެއް އަދިވެސް މިކަމަށް ނުލިބޭ ކަމަށާއި، ދާއިމީ ހައްލު ނުލިބޭ އެތަކެއް ސަބަބުތަކެއް އެބަހުރި ކަމަށެވެ.
އާޒިމް ވިދާޅުވީ މާލޭގެ ޕާކިން ޒޯންތަކުގައި ވެސް ބިދޭސީން ފުނިޖެހިގެން ތިބޭ މައްސަލައިގެ ރިޕޯޓްތައް ވެސް ލިބޭ ކަމަށާއި، އެ މައްސަލަ އަމިއްލަފުޅަށް ވެސް ފުލުހުންނަށް ހުށަހެޅި ކަމަށެވެ. އަދި ގަވާއިދާ ހިލާފަށް ހިންގާ ކަންކަން ގާނޫނު ތަންފީޒުކުރަން ތިބި އިދާރާތަކުން އެއްވެސް އުޒުރެއް ނުދައްކާ ގާނޫނު ތަންފީޒުކުރަމުންދާން ޖެހޭނެކަމަށް ވެސް އާޒިމް ވިދާޅުވިއެވެ.
