އަންހެނުންގެ ފައިނަލަށް ބާސެލޯނާ

ޗެލްސީ 2-0އިން ބަލިކޮށް އަންހެނުންގެ ޗެމްޕިއަންސް ލީގުގެ ފައިނަލަށް އެންމެ ފަހުގެ ޗެމްޕިއަން ބާސެލޯނާ ދަތުރުކޮށްފި އެވެ.

ޗެލްސީގެ ދަނޑުގައި 39000 މީހުންގެ ކުރިމަތީގައި މެޗު ފެށީ 1-0އިން ޗެލްސީ ކުރީގައި އޮވެގެންނެވެ. އެއީ މި ދެ ޓީމު ބާސެލޯނާގެ ދަނޑުގައި ކުޅުނު މެޗު އެ ޓީމު ކާމިޔާބުކޮށްފައިވާތީ އެވެ. ނަމަވެސް ދުނިޔޭގެ މޮޅު ކުޅުންތެރިޔާ އައިޓާނާ ބޮންމާޓީއަށް ލިބުނު ޕެނަލްޓީއަކުން ފްރިޑޮލީނާ ރޮލްފޯ ޖެހި ގޯލުން ބާސެލޯނާ ވަނީ ފައިނަލަށް ދަތުރުކޮށްފަ އެވެ. މި މެޗުގެ ފަހު ހާފުގެ ބޮޑުބައި ޗެލްސީ ކުޅުނީ އެއް ކުޅުންތެރިއަކު މަދުކޮށެވެ. އެއީ ރަތްކާޑެއް ދެއްކުމުންނެވެ.

މުބާރާތުގެ ފައިނަލުގައި ބާސެލޯނާއާ ވާދަކުރާނީ ފްރާންސްގެ ލިއޯން ނުވަތަ ޕީއެސްޖީ އެވެ.

މި މެޗުން މޮޅުވުމުން ބާސެލޯނާގެ ކޯޗު ޖޮނަތަން ޖިރާލްޑޭޒް ބުނީ ތިން އަހަރުން ދެ ފައިނަލަށް ދިއުމުން ވަރަށް އުފާވެއްޖެ ކަމަށެވެ.

އޭނާ ބުނީ މިދިޔަ ޑިސެމްބަރު މަހު މަގާމުން އިސްތިއުފާދޭން ވިސްނި ކަމަށާއި އެއިރު ގިނަ ބަޔަކު އެއީ ގޯސް ހިޔާލެއް ކަމުގައި ބުނީ ކީއްވެކަން މިހާރު ވިސްނިއްޖެ ކަމަށެވެ. އެއީ ޓީމާ އޮތް ގުުޅުން ކުރިއަށްވުރެ ބަދަހިވެ، ނަތީޖާ ރަނގަޅުވާތީ ކަމަށެވެ.

ބާސެލޯނާގެ ގޯލް ޖަހައިދިން ރޮލްފޯ ބުނީ ޗެލްސީއަށްވުރެ މޮޅަށް ކުޅުނީ ބާސެލޯނާ ކަމަށާއި ނަތީޖާ ނެރެން އޭނާގެ ޓީމަށް އެނގޭ ކަމަށެވެ.

މިއީ ބާސެލޯނާ މި މުބާރާތުގެ ފައިނަލް ކުޅޭ ހަތަރު ވަނަ ފަހަރެވެ. ޗެލްސީ މީގެ ކުރިން އެއް ފައިނަލް ކުޅެ ތައްޓެއް ލިބިފައިނުވެ އެވެ. މި ސީޒަނަށް ފަހު ޗެލްސީގެ ކޯޗު އެމާ ހަޔޭސް 12 އަހަރަށް ފަހު ޓީމާ ވަކިވެ އެމެރިކާގެ ގައުމީ ޓީމާ ހަވާލުވާނެ އެވެ.