މެންޗެސްޓަރ ޔުނައިޓެޑަށް ކުޅެމުން އަންނަ އިންގްލެންޑުގެ މާކަސް ރަޝްފޯޑު ސްޕެއިންގެ ބާސެލޯނާ އަށް ބަދަލުވެއްޖެ އެވެ.

އުމުރުން 27 އަހަރުގެ ރަޝްފޯޑު އޭނާގެ ސީނިއަރ ކެރިއަރު ޔުނައިޓެޑުން ފެށީ 2015 ވަނަ އަހަރު އެވެ. އެ ކުލަބާ އެކު އެންމެ ފަހުން ރަޝްފޯޑު ސޮއި ކޮށްފައިވާ އެއްބަސްވުމުގެ މުއްދަތު ހަމަވާނީ 2028 ވަނަ އަހަރު އެވެ. ނަމަވެސް ޔުނައިޓެޑު ދޫކޮށްލަން ނިންމާފައިވާ ކުޅުންތެރިންގެ ތެރޭގައި ރަޝްފޯޑު ވެސް ހިމެނުނެވެ.

ބާސެލޯނާ އިން ރަޝްފޯޑު ގެނެސްފައި ވަނީ ލޯނު އެއްބަސްވުމެއްގެ ދަށުންނެވެ. އެގޮތުން ކުރިއަށް އޮތް ސީޒަން ނިމެންދެން ރަޝްފޯޑު ބާސެލޯނާ އަށް ކުޅޭނެ އެވެ. ނަމަވެސް އެއް އަހަރު ދުވަހުގެ ލޯނު އެއްބަސްވުމުގެ މުއްދަތު ހަމަވުމުން، ބާސެލޯނާ އިން ބޭނުންވާ ނަމަ ރަޝްފޯޑުގެ އެއްބަސްވުން ދާއިމީ ކުރުމުގެ ފުރުސަތު ވެސް އޮންނާނެ އެވެ. އެގޮތުން 30.3 މިލިއަން ޕައުންޑު ދެއްކުމަށް ފަހު، ރަޝްފޯޑުގެ އެއްބަސްވުން ދާއިމީ ކުރެވޭނެ ކަމަށް ރިޕޯޓުތައް ބުނެ އެވެ.

ބާސެލޯނާ އިން ވަނީ ރަޝްފޯޑު އެ ކުލަބަށް ބަދަލުވެފައިވާކަން އިއުލާން ކޮށްފަ އެވެ. އަދި ބާސެލޯނާގައި ރަޝްފޯޑު ބޭނުން ކުރާނީ 14 ނަންބަރު ޖާޒީ އެވެ. ބާސެލޯނާ އަށް ބަަދަލުވުމަށް ފަހު ވާހަކަ ދައްކަމުން ރަޝްފޯޑު ބުނެފައި ވަނީ، އެ ކުލަބަކީ ކޮންމެ ކުޅުންތެރިޔަކު ވެސް އަންނަން ބޭނުންވާނެ ކުލަބެއް ކަމަށެވެ.

ރަޝްފޯޑު ބުނީ ބާސެލޯނާ އަށް ކުޅެ، އެ ކުލަބު ތަމްސީލު ކުރުމަކީ އޭނާ އަށް ލިބޭ ވަރަށް މުހިންމު އުފަލެއް ކަމަށެވެ. އަދި އޭނާ އަށް އިޙުސާސް ކުރެވެނީ އަމިއްލަ ގޭގައި ހުރެވޭ ކަމުގެ އިޙުސާސް ކަމަށް ވެސް ރަޝްފޯޑު ބުންޏެވެ. އެކަން ފާހަގަކޮށް ރަޝްފޯޑު ބުނީ، އޭނާ އަށް އިޙުސާސް ވަނީ ބާސެލޯނާ އަށް ބަދަލުވުމަކީ އަމިއްލަ ގެއަށް އައުން ކަހަލަ ކަމެއްގެ ގޮތުގައި ކަމަށެވެ.

މީޑިއާ ތަކުގައި ބުނެފައިވާ ގޮތުން ރަޝްފޯޑު ރަޖިސްޓްރީ ކުރުމަށްޓަކައި ބާސެލޯނާ އިން ބައެއް ކުޅުންތެރިން ދޫކޮށްލަން ޖެހޭނެ އެވެ. އެގޮތުން ބާސެލޯނާ އިން މިހާރު ދެ ކުޅުންތެރިޔަކު ދޫކޮށްލުމަށް ވިސްނަމުން އަންނަ ކަމަށާއި، އެކަމުގެ ސަބަބުން ރަޝްފޯޑު ރަޖިސްޓްރީ ކުރުމަށް އެ ކުލަބަށް ފަސޭހަ ވާނެ ކަމަށް ބުނެފައިވެ އެވެ.

ޔުނައިޓެޑުގައި ހުރުމަށް ފަހު ރަޝްފޯޑު ވަނީ ލޯނު އެއްބަސްވުމެއްގެ ދަށުން އެސްޓަން ވިލާ އަށް ވެސް ކުޅެފަ އެވެ. ނަމަވެސް، ރަޝްފޯޑުގެ އެއްބަސްވުން ދާއިމީ ކުރަން ލިބުނު ފުރުސަތުގައި އެސްޓަން ވިލާ އިން ވަނީ އެ ފުރުސަތު ދޫކޮށްލައިފަ އެވެ.

ރަޝްފޯޑު ވަނީ މިހާތަނަށް އޭނާ ޔުނައިޓެޑަށް ކުޅެދިން 426 މެޗުގައި 138 ލަނޑު ޖަހައިފަ އެވެ. އަދި އެ ކުލަބާ އެކު އޭނާ ވަނީ އެފްއޭ ކަޕް ދެ ފަހަރު، ކަރަބޯ ކަޕް ދެ ފަހަރު، އެފްއޭ ކޮމިއުނިޓީ ޝީލްޑް އަދި ޔުއެފާ ޔޫރޮޕާ ލީގު ވެސް ކާމިޔާބު ކޮށްފަ އެވެ.