ބާސެލޯނާ ބަލިކުރަން ޗެލްސީގެ ވީހާވެސް ގިނަ ސަޕޯޓަރުން ވަންނަންޖެހޭ: ކޯޗު

އަންހެނުންގެ ޗެމްޕިއަންސް ލީގުގައި ބާސެލޯނާއާ ދެކޮޅަށް ޗެލްސީގެ ވީހާވެސް ގިނަ ސަޕޯޓަރުން މިއަދު ދަނޑަށް ވަނުމަށް އެ ޓީމުގެ ކޯޗު އެމާ ހަޔޭސް ގޮވާލައިފި އެވެ.

އޭނާ މިގޮތަށް ގޮވާލީ ބާސެލޯނާގެ ދަނޑުގައި 1-0އިން އެ ޓީމު ބަލިކޮށްފައި އޮތުމުން އަމިއްލަ ދަނޑުގައި މިރޭ 9 ޖަހާއިރު ކުޅޭއިރު ސަޕޯޓަރުންގެ މުހިންމުކަން ފާހަގަ ކުރަމުންނެވެ. މިދިޔަ ހަފުތާގައި ކުޅުނު މި މެޗަކީ މިދިޔަ ފަސް އަހަރު ތެރޭގައި އަމިއްލަ ދަނޑުގައި ބާސެލޯނާ ބަލިވި ފުރަތަމަ ފަހަރެވެ. މިހެންވެ ބާސެލޯނާއިން ބުނަމުންދަނީ އަދިވެސް އެމީހުންނަށް ނަތީޖާ ބަދަލުކުރެވޭނެ ކަމަށެވެ.

ޗެލްސީން ވަނީ މި މެޗަށް އިއްޔެއާ ހަމައަށް 40000 ޓިކެޓް ވިކިފައިވާ ކަމަށް ބުނެފަ އެވެ. މިއީ ޗެލްސީގެ ދަނޑުގެ ފުލް ކެޕޭސިޓީ ވެސްމެ އެވެ.

ހަޔޭސް އަށް ޗެލްސީގެ ކޯޗުކަމުގައި މިހާތަނަށް ނުލިބޭ ހަމައެކަނި ތައްޓަކީ ވެސް ޗެމްޕިއަންސް ލީގެވެ. މީގެ ކުރިން އެއް ފަހަރު އޭނާ ވަނީ މި މުބާރާތުގެ ފައިނަލަށް ޓީމު ގެންގޮސްދީފަ އެވެ. އަދި 12 އަހަރަށް ފަހު މި ސީޒަން ނިމުމުން އޭނާ ޗެލްސީއާ ވަކިވާނެ އެވެ. އެއީ އެމެރިކާގެ ގައުމީ ޓީމާ ހަވާލުވުމަށެވެ.

އޭނާ ބުނީ ބާސެލޯނާ އަކީ ވަރުގަދަ ޓީމެއް ކަމަށާއި މިހެންވެ މެޗަށް ޓެކްޓިކަލް ބަދަލުތަކެއް ގެންނާނެ ކަމަށެވެ.