ފަލަސްތީނަށް ތާއީދުކޮށް އެމެރިކާގައި ބޭއްވި މުޒާހަރާއެއްގެ ތެރެއިން 100 މީހުން ހައްޔަރުކޮށްފި

ފަލަސްތީނަށް ތާއީދުކޮށް އެމެރިކާގެ ސެނެޓަރު ޝޫމަރގެ ގެ ކައިރީގައި ކުރިއަށް ގެންދިޔަ މުޒާހަރާއެއްގެ ތެރެއިން 100 އެއްހައި މީހުން ހައްޔަރުކޮށްފިއެވެ.

މި މުޒާހަރާއަކީ އިސްރާއީލަށް ދޭ އަސްކަރީ އެހީ ހުއްޓާލުމަށް ގޮވާލައި "ޔަހޫދީ ވޮއިސް ފޯ ޕީސް" އިން އިންތިޒާމުކޮށްގެން ބޭއްވި މުޒާހަރާއެކެވެ. މި މުޒާހަރާ އިންތިޒާމް ކޮށްފައިވަނީ ޔަހޫދީ ފަސާވާ ޗުއްޓީއާ ދިމާކޮށެވެ.

އިސްރާއީލަށް 26 ބިލިއަން ޑޮލަރު ދޭނެ އެހީގެ ޕެކޭޖަކާ ދެކޮޅަށް އަންގާރަ ދުވަހުގެ ރޭ ނިއުޔޯކްގެ ބްރޫކްލިންގައި ހުންނަ ސެނެޓްގެ މެޖޯރިޓީ ލީޑަރު ޗަކް ޝޫމާގެ ގެ ކައިރިން ފަލަސްތީނަށް ތާއީދުކުރާ 100 މީހުން ހައްޔަރުކޮށްފައިވާއިރު، ރައިސް ޖޯބައިޑެންގެ ސަރުކާރުން އިސްރާއީލަށް ކުރާ ތާއީދު ހުއްޓާލުމަށްވެސް މުޒާހަރާގެ ބައިވެރިން ވަނީ ގޮވާލައިފައެވެ.

ޔަހޫދީ ވޮއިސް ފޯ ޕީސް އިން އިންތިޒާމުކޮށްގެން ކުރިއަށް ގެންދިޔަ މި މުޒާހަރާއަކީ އިސްރާއީލަށް ދޭ 26.6 ބިލިއަން ޑޮލަރު ހިމެނޭ ގޮތަށް ގިނަ ދުވަސްތަކެއް ވަންދެން އިންތިޒާރު ކުރަމުން އައި 95 ބިލިއަން ޑޮލަރުގެ ބޭރުގެ އެހީގެ ޕެކޭޖެއް އެމެރިކާގެ ސެނެޓުން ފާސްކުރުމާ ގުޅިގެން އިސްރާއީލަށް ދޭ އެހީ ހުއްޓާލުމަށް ގޮވާލައި ކުރިއަށް ގެންދިޔަ މުޒާހަރާއެކެވެ.

އެ ޖަމާއަތުން އެކްސްގައި ނެރުނު ބަޔާނެއްގައި ބުނެފައި ވަނީ ޝޫމަރގެ ގޭގެ ދޮރުމަތީގައި ޓްރެފިކް ބްލޮކްކުރީ އިސްރާއީލު ސަރުކާރުން ޖަރީމާއެއް ހިންގަމުންދާތީ އެމެރިކާއިން އިސްރާއީލު ސަރުކާރަށް ހަތިޔާރު އެޅުމާއި ފަންޑުކުރުން ހުއްޓާލުމަށް ގޮވާލާ ކަމަށެވެ.

ނިއުޔޯކް ގެ ފުލުހުން މުޒާހަރާގެ އެތައް ސަތޭކަ ބަޔަކު ހައްޔަރުކޮށްފައިވާކަމަށް އެ ޖަމާއަތުން ބުނާއިރު، އެމެރިކާގެ ބައެއް އައުޓްލެޓްތަކުން ވަނީ މުޒާހަރާގެ ބައިވެރިންގެ ތެރެއިން 100 މީހުން ހައްޔަރުކޮށްފައިވާ ކަމަށް ރިޕޯޓްކޮށްފައެވެ.

ޔަހޫދީ ވޮއިސް ފޯ ޕީސްގެ އެގްޒެކެޓިވް ޑިރެކްޓަރު ސްޓެފާނީ ފޮކްސް ދެއްވި އިންޓަވިއުއެއްގައި ވިދާޅުވީ، އިސްރާއީލާއި ޔޫކްރެއިން އަދި ޓައިވާނަށް 95 ބިލިއަން ޑޮލަރުގެ އެހީގެ ޕެކޭޖް ސެނެޓުން ފާސްކޮށްފައިވާއިރު ޝޫމަރަށް މެސެޖެއް ދިނުމުގެ ގޮތުން ފަސާވަރުގެ ތެރޭގައި މުޒާހަރާ ކުރި ކަމަށެވެ.

މިދިޔައަހަރުގެ އޮކްޓޯބަރު މަހުގެ 7 ވަނަދުވަހުން ފެށިގެން އިސްރާއީލްގެ އަސްކަރިއްޔާއިން ފަލަސްތީނުގެ ޣައްޒާއަށް ދެމުންދާ ހަމަލާތަކުގައި މިހާތަނަށް 34،000 އަށްވުރެ ގިނަ މީހުން ޣައްޒާއިން ޝަހީދުކޮށްފައިވާއިރު، 70،000 އަށްވުރެ ގިނަމީހުންވަނީ ޝަހީދުކޮށްލާފައެވެ. އަދި ޣައްޒާގެ 60 އިންސައްތަ މީހުންގެ ގޮދޮރުގެއްލި އިންސާނީ ކާރިސާއެއްގެ ތެރެއެއަށް މުޅި ޣައްޒާ ވަނީ ވައްޓާލައިފައެވެ.