ފައިސާ ހޯދަން ލެވަކޫސަންއިން މޮޅު ކުޅުންތެރިއަކު ވިއްކާލަންޖެހޭނެ
16 އެޕްރީލު 2024 | އަންގާރަ 09:23އެކަކު ވިއްކާލައިގެން ދެތިން ކުޅުންތެރިން ގެނެވޭނެ: ސީއީއޯ
ލެވަލޫސަންގެ ކުޅުންތެރިން ލަނޑު ޖަހާފައި އުފާފާޅު ކުރަނީ
އަންނަ ސީޒަނަށް ބޭނުންވާ ފައިސާ ހޯދުމަށް މޮޅު ކުޅުންތެރިއަކު ވިއްކާލަންޖެހޭނެ ކަމަށް ޖަރުމަނުގެ ޗެމްޕިއަން ބަޔާން ލެވަކޫސަންއިން ބުނެފި އެވެ.
އެކުލަބުގެ ސީއީއޯ ފެނާންޑޯ ކަރޯ ވިދާޅުވީ ކުލަބުގެ މާލީ ހާލަތު ހުންނަ ގޮތުން ކޮންމެ ސީޒަނެއްގައި ވެސް ކުޅުންތެރިން ވިއްކަންޖެހޭ ކަމަށެވެ. އެގޮތުން އަންނަ ސީޒަނުގައި ވެސް އެކަން ކުރަންޖެހޭނެ ކަމަށް ގަބޫލުކުރާ ކަމަށެވެ.
ލެވަކޫސަންގައި ޔޫރަޕުގެ ބޮޑެތި ކުލަބުތަކުން ބޭނުންވާ ކުޅުންތެރިންތަކެއް އެބަތިއްބެވެ. އަދި ވިއްކާލަން ނިންމައިފިނަމަ މި ކުޅުންތެރިންގެ އަގު ވެސް އަރާނެ އެވެ. އޭގެ ތެރޭގައި ޖަރުމަނުގެ މިޑްފީލްޑަރު ރޮބަޓް އެންޑްރިޗާއި ފްލޮރައިން ވިޒް އާއި ޗެކްރިޕަބްލިކްގެ ފޯވަޑް ޕެޓްރިކް ޝިކް އާއި އާޖެންޓީނާގެ ޕަލާސިއޯސް ފަދަ ކުޅުންތެރިން ހިމެނެ އެވެ.
ބަޔާން ލެވަކޫސަން މިސީޒަނުގައި ބަލިނުވެ ޖަރުމަނުގެ ބުންޑަސްލީގާ ކާމިޔާބުކޮށްފައިވާއިރު އެ ޓީމުގެ ކުޅުންތެރިންގެ އިތުރުން ކޯޗު ޒަބީ އަލޮންސޯގެ ޑިމާންޑް ވެސް ވަނީ ވަރަށް ބޮޑުވެފަ އެވެ. އޭނާ ގެންދަން ޔޫރަޕުގެ ބޮޑެތި ކުލަބުތަކުން ތައްޔާރަށް ތިބި ނަމަވެސް އަންނަ ސީޒަނުގައި ލެވަކޫސަންގައި މަޑުކުރަން ވަނީ ނިންމާފަ އެވެ.
