ލެވަކޫސަންގެ ކޯޗަކަށް ޓެން ހާގް ހަމަޖައްސައިފި

ޖަރުމަނުގެ ބަޔާ ލެވަކޫސަންގެ ކޯޗަކަށް، ނެދަލެންޑްސްގެ އެރިކް ޓެން ހާގް ހަމަޖައްސައިފި އެވެ.

ލެވަކޫސަންގެ ކޯޗުކަމުގެ މަގާމު ހުސްވީ އެންމެ ފަހުން އެ މަގާމުގައި ހުރި ޒަބީ އަލޮންސޯ ވަކިވުމުންނެވެ. ލެވަކޫސަން އާއެކު ސޮއި ކޮށްފައިވާ އެއްބަސްވުން އުވާލުމަށް ފަހު، އަލޮންސޯ ހަވާލުވީ ސްޕެއިންގެ ރެއާލް މެޑްރިޑާ އެވެ.

ލެވަކޫސަން އިން ވަނީ އެ ޓީމުގެ ކޯޗަކަށް އުމުރުން 55 އަހަރުގެ ޓެން ހާގް ހަމަޖައްސައިފި އެވެ. ލެވަކޫސަންގެ ކޯޗުކަމާ ޓެން ހާގް ހަވާލުވީ ދެ އަހަރު ދުވަހުގެ އެއްބަސްވުމެއްގެ ދަށުންނެވެ. އެހެންކަމުން، 2027 ވަނަ އަހަރުގެ ޖޫން މަހުގެ ނިޔަލަށް އޭނާ އެ ޓީމަށް އިރުޝާދު ދޭނެ އެވެ.

ލެވަކޫސަން އިން މިހާރު ވަނީ އެ ޓީމުގެ ކޯޗު ކަމަށް ޓެން ހާގް ހަމަޖައްސައި، އޭނާ އާއެކު އެއްބަސްވުމުގައި ސޮއި ވެސް ކޮށްފަ އެވެ. އަދި އެ ޓީމުގެ ކޯޗުގެ ގޮތުގައި ވަނީ ޓެން ހާގް ދައްކާލާފައި އެވެ.

ލެވަކޫސަންގެ ކޯޗުކަމާ ހަވާލުވުމަށް ފަހު ވާހަކަ ދައްކަމުން ޓެން ހާގް ބުނެފައި ވަނީ، އެ ޓީމަކީ ބޮޑު ޓީމެއް ކަމަށާއި، މާޒީގައި އެ ޓީމުން ކާމިޔާބީތަކެއް ހޯދާފައިވާ ކަމަށެވެ. އަދި އޭނާގެ އަމާޒަކީ ލެވަކޫސަން ކުރިއަށް ގެންގޮސް އެ ޓީމަށް ކާމިޔާބުތަކެއް ހޯދައި ދިނުން ކަމަށް ވެސް ޓެން ހާގް ވަނީ ބުނެފަ އެވެ.

ލެވަކޫސަންގެ ކުރިން ޓެން ހާގް އިރުޝާދު ދިނީ މެންޗެސްޓަރ ޔުނައިޓެޑަށެވެ. އެ ޓީމުގެ ކޯޗަކަށް 2022 ވަނަ އަހަރު އޭނާ ހަމަޖެއްސީ ތިން އަހަރު ދުވަހުގެ އެއްބަސްވުމެްއްގެ ދަށުންނެވެ. ނަަމަވެސް، މިދިޔަ އަހަރު ވަނީ އެ ޓީމުގެ ކޯޗުކަމުގެ މަގާމުން ޓެން ހާގް ވަކިކޮށްފަ އެވެ. އެއީ އޭނާގެ އިރުޝާދުގެ ދަށުން ޔުނައިޓެޑުގެ ނަތީޖާތައް ވަރަށް ބޮޑަށް ދަށްވުމުންނެވެ.

ނަމަވެސް، ޓެން ހާގްގެ އިރުޝާދުގެ ދަށުން ޔުނައިޓެޑުން ވަނީ ދެ ތައްޓެއް ކާމިޔާބު ކޮށްފަ އެވެ. އެއީ އެފްއޭ ކަޕްގެ އިތުރުން ކަރަބޯ ކަޕް އެވެ. އޭނާގެ އިރުޝާދުގެ ދަށުން ޔުނައިޓެޑު ކުޅެފައި ވަނީ 128 މެޗެވެ.

ގޯ އަހެޑް އީގަލްސް އިން 2012 ވަނަ އަހަރު ކޯޗިން ކެރިއަރު ފެށި ޓެން ހާގް އެންމެ ބޮޑަށް ފާހަގަ ކޮށްލެވުނީ އަޔެކްސްގަ އެވެ. އެ ޓީމުގެ ކޯޗުކަމާ އޭނާ ހަވާލުވީ 2018 ވަނަ އަހަރު އެވެ. އޭނާގެ އިރުޝާދުގެ ދަށުން އަޔެކްސް އިން ވަނީ 215 މެޗު ކުޅެފަ އެވެ. އޭގެ ތެރެއިން އެ ޓީމު ވަނީ 70 މެޗުން މޮޅުވެފަ އެވެ. 23 މެޗު އެއްވަރުވެފައިވާއިރު، 35 މެޗުން ވަނީ ބަލިވެފަ އެވެ.

ޓެން ހާގްގެ އިރުޝާދުގެ ދަށުން އަޔެކްސް އިން ވަނީ ހަ ތައްޓެއް ކާމިޔާބު ކޮށްފަ އެވެ. 2022 ވަނަ އަހަރު އޭނާ އަޔެކްސްގެ ކޯޗުކަން ދޫކޮށްލީ ޔުނައިޓެޑާ ހަވާލުވުމަށެވެ.