ޔުއެފާ ޗެމްޕިއަންސް ލީގުގެ ގަދަ 16 ވަނަ ބުރުގެ ދެ ވަނަ ލެގުގައި ވެސް ވާދަވެރި ބަޔާ ލެވަކޫސަން ބަލިކޮށް، ބަޔާން މިއުނިކް އިން މުބާރާތުގެ ކުއާޓާ ފައިނަލްގެ ފުރުސަތު ހޯދައިފި އެވެ.

ބަޔާންގެ އަމިއްލަ ދަނޑު، އަލިއާންޒް އެރީނާގައި ކުޅުނު ފުރަތަމަ ލެގުގެ މެޗު އެ ޓީމުން ވަނީ 3-0 އިން ކާމިޔާބު ކޮށްފަ އެވެ. އެހެންކަމުން އަންގާރަ ދުވަހުގެ ރޭ ލެވަކޫސަންގެ ދަނޑުގައި އެ ޓީމާ ދެކޮޅަށް ނިކުތްއިރު ވެސް ބަޔާނަށް ފައިދާ އޮތެވެ.

ލެވަކޫސަންގެ ދަނޑުގައި ކުޅުނު ދެ ވަނަ ލެގު ބަޔާނުން ކާމިޔާބު ކުރީ 2-0 އިންނެވެ. މެޗުގައި ބަޔާނުން އެ ޓީމުގެ ދެ ލަނޑު ވެސް ޖެހީ ދެ ވަނަ ހާފުގަ އެވެ.

މެޗުގެ ދެ ވަނަ ހާފު ފަށައިގެން ހަތް ވަނަ މިނެޓުގައި ބަޔާނަށް ލީޑު ނަގައިދިނީ އިންގްލެންޑުގެ ކެޕްޓަން ހެރީ ކޭން އެވެ. އޭނާ އެ ލަނޑު ޖަހަން ފުރުސަތު ތަނަވަސްކޮށްދިނީ ޔޯޝުއާ ކިމިކް އެވެ.

އޭގެ ފަހުން މެޗުގެ 71 ވަނަ މިނެޓުގައި އަލްފަންސޯ ޑޭވިސް ވަނީ ލަނޑު ޖަަހައި ބަޔާނަށް ލީޑު ފުޅާ ކޮށްދީފަ އެވެ. އެއީ ކޭން ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ.

މޮޅާއެކު ބަޔާނުން މުބާރާތުގެ ކުއާޓާ ފައިނަލްގެ ޖާގަ ހޯދީ އެގްރިގޭޓް ނަތީޖާ 5-0 އިންނެވެ.