މިސަރުކާރުން ލޯނު ނުނަގާ ކަމަށް ބުނަމުންދާއިރު، މިހާރު ވެސް ޑޮމެސްޓިކް މާކެޓުން 3.3 ބިލިއަން ރުފިޔާގެ ޓީބިލް އިޝޫކޮށްފައިވޭ: ރައީސް ސާލިހު
15 އެޕްރީލު 2024 | ހޯމަ 07:54ތިން މަސް ދުވަހުގެ ތެރޭގައި އެއް ބިލިއަން ރުފިޔާގެ ޑެފިސިޓެއް އެބައޮތް
އެމްޑީޕީގެ އިސް އެޑްވައިޒަރ އަދި ކުރީގެ ރައީސް އިބްރާހީމް މުހައްމަދު ވާހަކަފުޅު ދައްކަވަނީ
މިސަރުކާރުން ލޯނު ނުނަގާ ކަމަށް ބުނަމުންދާއިރު، މިހާރު ވެސް ޑޮމެސްޓިކް މާކެޓުން 3.3 ބިލިއަން ރުފިޔާގެ ޓީބިލް އިޝޫކޮށްފައިވާ ކަމަށް އެމްޑީޕީގެ އިސް އެޑްވައިޒަރ އަދި ކުރީގެ ރައީސް އިބްރާހީމް މުހައްމަދު ސާލިހު ވިދާޅުވެއްޖެއެެވެ.
އާދިއްތަ ދުވަހުގެ ރޭ ތިމަރަފުށީގައި ބޭއްވި އެމްޑީޕީގެ ކެމްޕެއިން މިސްރާބު ހަމަމަގަށް ޖަލްސާގައި ރައީސް ސާލިހު ވިދާޅުވީ ދައުލަތުގެ ބަޖެޓުގެ ބެލަންސްއާ ގުޅޭގޮތުން މިސަރުކާރުން ދޮގު ހަދައި، ރައްޔިތުންނަށް އޮޅުވާލުމަށް މަސައްކަތް ކުރަމުންދާ ކަމަށެވެ.
މިސަރުކާރަށް ތިން މަސްވެގެން ދިޔައިރު، ސަރޕްލަސް ފައިދާ ގޮތުގައި 133 މިލިއަން ރުފިޔާ ހުރި ކަމަށް ރައީސް ސާލިހު ވިދާޅުވިއެވެ. ނަމަވެސް އެއީ ޕްރައިމަރީ ބެލެންސް ކަމަށް އެމަނިކުފާނު ވިދާޅުވިއެވެ. އަދި ވިދާޅުވީ މި ތިން މަސް ދުވަހުގެ ތެރޭގައި އެއް ބިލިއަން ރުފިޔާގެ ޑެފިސިޓެއް އެބައޮތް ކަމަށެވެ.
ދައުލަތުގެ ހަރަދުތައް އިންތިހާއަށް ބޮޑުވަމުންދާކަން ފާހަގަކުރައްވައި ރައީސް ސާލިހު ވިދާޅުވީ މިދިޔަ އަހަރުގެ ތިން މަސް ދުވަހާއި އަޅާބަލާއިރު، މިއަހަރުގެ މާޗު މަހުގެ ނިޔަލަށް 450 މިލިއަން ރުފިޔާ އިތުރަށް ހަރަދުކޮށްފައިވާ ކަމަށެވެ. އަދި ވިދާޅުވީ މަޖިލިސް އިންތިޚާބާއި ގުޅިގެން މިނިސްޓްރީތަކާއި ސަރުކާރުގެ އެކިއެކި މުއައްސަސާތަކަށް ސިޔާސީ މުވައްޒަފުން ލިމިޓެއްނެތި ނަގަމުންދާ ކަމަށެވެ.
ރައީސް ސާލިހު ވިދާޅުވީ މިސަރުކާރުން މިހާރު ވެސް 1500 ވުރެ ގިނަ ސިޔާސީ މަގާމުތައް އުފައްދާފައިވާ ކަމަށާއި، މީގެ ހުރިހާ ބުރައެއް އަންނަނީ ބަޖެޓަށް ކަމަށެވެ. އަދި ބަޖެޓަށް ބުރަވުމާއި ގުޅިގެން މިހާރު ތަރައްގީގެ މަޝްރޫއުތަކުން ފައިސާ ނަގައިގެން އެ ފައިސާއިން މުސާރަ ދެމުންދާ ކަމަށް ރައީސް ސާލިހު ވިދާޅުވިއެވެ.
