އޮނާނާގެ ޝުކުރު ޔުނައިޓެޑްގެ ސަޕޯޓަރުންނަށް

މެންޗެސްޓާ ޔުނައިޓެޑްގެ ގޯލްކީޕަރު އަންދްރޭ އޮނާނާ އެކުލަބުގެ ސަޕޯޓަރުންނަށް ޝުކުރު އަދާކޮށްފި އެވެ.

އޭނާ ބުނީ އިޓަލީގެ އިންޓަމިލާނުގައި ހުރެފައި ޔުނައިޓެޑަށް ބަދަލުވުމަށްފަހު އިނގިރޭސިވިލާތަކަށާއި ޔުނައިޓެޑަށް ހޭނެން އޭނާ އަށް ފުރަތަމަކޮޅު ވަރަށް ބޮޑަށް ދަތިވި ކަމަށެވެ. މި ގޮތުން ޓީމަށާއި މާހައުލަށް ހޭނުނީ ހަމަސް ދުވަސް ފަހުން ކަމަށެވެ.

އޮނާނާ ބުނީ ސީޒަނުގެ ފުރަތަމަ ދުވަސްކޮޅު އޭނާ ހުއްޓައި ޔުނައިޓެޑްގެ ގޯލަށް ގިނަ ބޯޅަތަކެއްވަދެ ޗެމްޕިއަންސް ލީގުން ޔުނައިޓެޑް ކެޓުން ފަދަ ދެރަނެތީޖާތައް ނުކުތީ އޭނާ ޓީމަށް ހޭނެން ވަގުތު ނެގުމުން ކަމަށެވެ.

ކެމަރޫނުގެ ގައުމީ ކީޕަރު ބުނީ މެންޗެސްޓާ ޔުނައިޓެޑަކީ ބޮޑު ކުލަބެއް ކަމަށާއި މިހެންވެ ކޮންމެ ސީޒަނެއްގައި ޗެމްޕިއަންސް ލީގު ކުޅުމަކީ މުހިންމު ކަމެއް ކަމަށެވެ. އަދި މިހާރު ޓީމުގައި ތިބި އެކަމަށްޓަކައި ވަރަށް ބޮޑަށް މަސައްކަތް ކުރާ ކަމަށެވެ.

ޔުނައިޓެޑުގައި ފަހަކަށް އައިސް އޮނާނާ ކުޅުނު މެޗުތަކުގައި އޭނާ ވަނީ ބައިކޮޅަށް ގޯލު ވަނަނުދީ ގިނަ މެޗުތަކެއްގައި މޮޅަށް ކުޅެފަ އެވެ.

މެންޗެސްޓާ ޔުނައިޓެޑަށް ވަނީ އަންނަ ސީޒަނުގައި ޗެމްޕިއަންސް ލީގު ފުޓްބޯޅަ މުބާރާތުގައި ކުޅެން ވަރަށް ބޮޑަށް މަސައްކަތް ކުރަންޖެހިފަ އެވެ. އެއީ ލީގު ޕާފޯމަންސް ދަށްވެ، ޕްރެމިއާ ލީގުގެ ތާވަލުގެ މެދުތެރެއަށް ސޮއްސާލާފައިވާތީ އެވެ.