މި ދައްކައިދިނީ ކޮންމެ ވަގުތެއްގައި ވެސް ނަތީޖާ ނެރެވޭނެކަން: ޒަކާ

ޔޫރޮޕާ ލީގުގައި ރޭ ވެސްޓްހަމް 2-0އިން ބަލިކޮށް ޖަރުމަނުގެ ބަޔާން ލެވަކޫސަން ސެމީ ފައިނަލާ ގާތަށް ޖެހިލި މެޗުގައި ދައްކައިދިނީ ކޮންމެ ވެސް ވަގުތެއްގައި ވެސް ނަތީޖާ ނެރެވޭނެކަން ކަމުގައި ބަޔާން ލެވަކޫސަންގެ މިޑްފީލްޑަރު ގްރަނިތް ޒަކާ ބުނެފި އެވެ.

މެޗަށް ފަހު ވާހަކަ ދައްކަމުން ޒަކާ ބުނީ ވެސްޓްހަމް ކުޅޭނީ ފަހަތުގައި ތިބެގެންކަން މެޗުގެ ކުރިން އޭނާގެ ޓީމުން ގަބޫލުކުރި ކަމަށެވެ. އަދި މެޗުގައި ފެނިގެންދިޔައީ އޭނާގެ ޓީމުގެ މޮޅުކަމާއި މެޗަށް ތައްޔާރުވިމިންވަރު ކަމަށެވެ.

މުބާރާތުގެ ކުއާޓާ ފައިނަލުގައި އިޓަލީގެ ރޯމާ އާއި އޭސީ މިލާން ކުޅުނު މެޗު ރޯމާ ކާމިޔާބު ކުރީ 1-0އިންނެވެ. އަދި ބެންފީކާ އާއި މާސޭ ކުޅުނު 2-1އިން ކާމިޔާބު ކުރީ ބެންފީކާ އެވެ.

މެޗުގެ ހަމައެކަނި ދެ ގޯލު ޖެހީ ފަހު 10 މިނިޓް ތެރޭގަ އެވެ. ފުރަތަމަ ލަނޑު ހޮފްމަން ޖެހީ 83 ވަނަ މިނިޓްގަ އެވެ. އިތުރުވަގުތުގައި ބޮނިފޭސް ދެވަނަ ގޯލުޖެހީ އެވެ.

މެޗަށް ފަހު ވެސްޓަހަމްގެ ކީޕަރު ލޫކަސް ފަބިއާންސްކީ ބުނީ 80 މިނިޓް ވަންދެން ރަނގަޅަށް ކުޅެފައި ބައިކޮޅަށް ވަނީ ވަރަށް ކަމުނުދާ ދެ ގޯލު ކަމަށެވެ.

އޭނާ ބުނީ އެންމެ ދެރަވީ ދެ ވަނަ ގޯލު ޖެހުމުން ކަމަށެވެ. ސަބަބަކީ ދެ ޓީމު ވެސް މޮޅަށް ކުޅުނު މެޗުގައި އާދައިގެ ޖެހުމަކުން ދެ ވަނަ ގޯލެއް ވަނުމުން ދެ ވަނަ ލެގު އުނދަގޫވީ ކަމަށެވެ.

ކޯޗު ޑޭވިޑް މޮޔޭސް ބުނީ ބަޔާން ލަވެކޫސަން އޭނާގެ ޓީމަށްވުރެ ހުރިހާ ގޮތަކުން ވެސް މޮޅު ކަމަށެވެ. އެކަމަކު މި ނަތީޖާ އަކީ ބަދަލު ނުކުރެވޭނެ ނަތީޖާއެއްނޫން ކަމަށެވެ.

އޭނާ ބުނީ ދެ ވަނަ ލެގާމެދު އުއްމީދީ ނަޒަރަކުން ދުށުމަށް ކުޅުންތެރިންނަށް ވިސްނައިދީފައިވާނެ ކަމަށެވެ.