ޔުއެފާ ޔޫރޮޕާ ލީގުގެ ފައިނަލްގައި މެންޗެސްޓަރ ޔުނައިޓެޑު ބަލިކޮށް، ޓޮޓެންހަމް އިން 17 އަހަރު ފަހުން ފުރަތަމަ ފަހަރަށް ތައްޓެއް އުފުލާލައިފި އެވެ.

ބުދަ ދުވަހުގެ ރޭ ކުޅުނު ޔޫރޮޕާ ލީގުގެ ފައިނަލް މެޗު ޓޮޓެންހަމް އިން ކާމިޔާބު ކުރީ 1-0 އިންނެވެ. މެޗުގައި އެ ޓީމުން ލަނޑު ޖެހީ ވެސް ފުރަތަމަ ހާފުގަ އެވެ.

މެޗު ފަށައިގެން ވެސް ޓޮޓެންހަމް އިން ވަނީ ރަނގަޅަށް ކުޅެ ލަނޑު ޖެހުމަށް މަސައްކަތް ކޮށްފަ އެވެ. ޔުނައިޓެޑުން ވެސް ވަނީ އެ ޓީމަށް ލިބޭ ފުރުސަތުތަކުގައި ލަނޑު ޖެހުމަށް މަސައްކަތް ކޮށްފަ އެވެ.

މެޗުގެ ފުރަތަމަ ހާފުގެ ފުރިހަމަ ވަގުތު ހަމަވާން ތިން މިނެޓަށް ވެފައި ވަނިކޮށް، ޓޮޓެންހަމް އިން ވަނީ ލަނޑު ޖަހައި ލީޑު ނަގައިފަ އެވެ. ޓޮޓެންހަމްގެ ޕަޕޭ މަޓާ ސާ ތަނަވަސްކޮށްދިން ފުރުސަތެއްގައި އެ ޓީމަށް ލީޑު ނަގައިދިނީ ބްރެނަން ޖޯންސަން އެވެ.

މެޗުގެ ދެ ވަނަ ހާފުގައި ޔުނައިޓެޑުން ވަނީ ނަތީޖާ ހަމަހަމަ ކުރުމަށް ވަރަށް މަސައްކަތް ކޮށްފަ އެވެ. އެ ޓީމުގެ ކެޕްޓަން ބްރޫނޯ ފެނާންޑޭސް އަށް ލިބުނު ފުރުސަތެއްގައި އޭނާ ފޮނުވާލި ބޯޅަ ގޯލާ އަމާޒުވާ ގޮތެއް ނުވި އެވެ.

މެޗުގެ ދެ ވަނަ ހާފުގެ 67 ވަނަ މިނެޓުގައި ޔުނައިޓެޑުގެ ރަސްމުސް ހޮލުންޑް ބޮލުން ފޮނުވާލި ބޯޅަ ގޯލަށް ވަންނަން ދަނިކޮށް، ރޮނގު މަތިން އެ ބޯޅަ ސަލާމަތް ކުރީ ޓޮޓެންހަމްގެ ޑިފެންޑަރު މިކީ ވެން ޑަ ވީން އެވެ.

އޭގެ ފަހުން ވެސް މެޗުގެ ފަހު ވަގުތުގައި ވެސް ޔުނައިޓެޑުން ވަނީ ލަނޑު ޖެހުމަށް ވަރަށް ބޮޑަށް މަސައްކަތް ކޮށްފަ އެވެ. ނަމަވެސް އެ ޓީމުން ފޮނުވާލި ބޯޅަތައް ޓޮޓެންހަމްގެ ގޯލު ކީޕަރު ގުގްލިއެމްލޯ ވިކާރިއޯ ވަނީ މަތަކޮށްފަ އެވެ.

ޔުނައިޓެޑު ބަލިކޮށް ޓޮޓެންހަމް އިން ޔޫރޮޕާ ލީގު ކާމިޔާބު ކުރިއިރު، މިއީ 17 އަހަރަށް ފަހު ޓޮޓެންހަމް އިން ކާމިޔާބު ކުރި ފުރަތަމަ ތައްޓެވެ. އަދި އެ ޓީމުގެ ކޯޗު އަންގޭ ޕޮސްޓެކޮގްލޫގެ އިރުޝާދުގެ ދަށުން ކާމިޔާބު ކުރި ފުރަތަމަ ތައްްޓެވެ.