ތަހުގީގު ރިޕޯޓު އިރުއޮއްސި 6:00ގެ ކުރިން ލިބެންޖެހޭނެ، އެކަންކުރި ފުލުހުންނަށް ފިޔަވަޅު އަޅާނަން: ރައީސް މުއިއްޒު
ޖަލްސާއަށް ހުރަސްއެޅި އިންސްޓްރަކްޝަންއާއި ހިލާފަށް
ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު
ކުރީގެ ރައީސް އަބްދުﷲ ޔާމީންގެ ޕީޕަލްސް ނެޝަނަލް ފްރަންޓު އުފެއްދުމުގެ ޖަލްސާއަށް ފުލުހުން ރޭ ހުރަސް އެޅި މައްސަލަ ބަލައި، އެކަން ކުރި ފުލުހުންނަށް ފިޔަވަޅު އަޅުއްވާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ބުދަ ދުވަހު މީޑިއާތަކާއި ވާހަކަދައްކަވަމުން ރައީސް މުއިއްޒު ވިދާޅުވީ އެމަނިކުފާނު ވެރިކަމަށް ކުރިމަތިލީ ވެސް އަދި ރައްޔިތުންނަށް ވީ ވައުދަކީ ވެސް ގައުމުގައި ހަމަޖެހުން ގާއިމްކުރެއްވުމަށް ކަމަށެވެ. ކުރީގައި ފެނުނު ގޮތަށް ބަދަލު ހިފުމުގެ ރޫހު ނުގެންގުޅޭނެ ކަމަށާއި، ސިޔާސީ ހިޔާލެއް ފާޅުކޮށްގެން މީހަކަށް ދޭނެ އަދަބެއް ނޯންނާނެ ކަމަށް ރައީސް މުއިއްޒު ވިދާޅުވިއެވެ.
ޕީއެންއެފްގެ ޖަލްސާއަށް ހުރަސްއެޅި މައްސަލައަށް އިޝާރާތް ކުރައްވައި ރައީސް މުއިއްޒު ވިދާޅުވީ އެކަމާއި ހިތާމަކުރައްވާ ކަމަށާއި، އެއީ އެމަނިކުފާނުގެ އިންސްޓްރަކްޝަންއާއި ހިލާފަށް ކުރިއަށް ގެންދިޔަ ކަމެއް ކަމަށެވެ. އަދި ފުލުހުންނަށް ގެއްލިފައިވާ އިތުބާރު ހޯދުމުގެ މަސައްކަތް ކުރުމަށް ޚާއްސަ އިސްކަމެއްދެއްވާނެ ކަމަށް ރައީސް މުއިއްޒު ވިދާޅުވިއެވެ.
ރައީސް މުއިއްޒު ވިދާޅުވީ އެސްއޯ ފުލުހުން ފޮނުވަންޖެހޭ ހާލަތްތައް އެންމެނަށް ވެސް އެނގޭނެ ކަމަށެވެ.
އެއީ ބަޔެއްގެ މުދަލަށް ގެންލުންދީ ތަނެއްގައި ރޯކޮށް، މީހުންނަށް އަނިޔާކޮށް، ޖިސްމާނީ އަނިޔާކޮށް، މުގައްދަސް ކަހަލަ ތަނަކަށް ގެއްލުން ދިނުން ފަދަ ކަންކަން ހިނގާނަމަ ކަމަށެވެ. އަދި އެފަދަ ހާލަތަކަށް މިގައުމު ނުދާނެ ކަމަށް ރައީސް މުއިއްޒު ވިދާޅުވިއެވެ.
ރައީސް މުއިއްޒު ވިދާޅުވީ ޕީއެންއެފް ޖަލްސާއަށް ހުރަސްއަޅައި، ހިނގާ ދިޔަ ކަންކަން ބައްލަވާނެ ކަމަށެވެ. އެކަމާ މެދު ހޯމް މިނިސްޓަރާވެސް ސުވާލު ކުރެއްވި ކަމަށާއި، ހޯމް މިނިސްޓަރުވެސް އެކަން ހިނގާ ދިޔަ ގޮތް ބައްލަވާނެކަމަށް ވިދާޅުވިކަމަށް ރައީސް ފާހަގަ ކުރެއްވިއެވެ. އަދި އެސްއޯ ފުލުހުން ދާން ޖެހުނީ ކާކުގެ އިރުޝާދެއްގެ ދަށުންތޯ ކޮމިޝަނަރު އަރިހުންވެސް ސުވާލު ކުރައްވާފައިވާނެ ކަމަށާއި، އެކަމުގެ ތަހުގީގު ރިޕޯޓު ބުދަ ދުވަހުގެ އިރު އޮއްސެންވާއިރަށް ލިބެންޖެހޭނެ ކަމަށް އަންގާފައިވާ ކަމަށް ރައީސް މުއިއްޒު ވިދާޅުވިއެވެ. އަދި ވިދާޅުވީ ރިޕޯޓު ލިބިވަޑައިގަތުމުން އަޅުއްވަންޖެހޭ ފިޔަވަޅުތައް އަޅުއްވާނެކަމަށެވެ.
އަންގާރަ ދުވަހުގެ ރޭ ޕީއެންއެފް އުފެއްދުމަށް ޣިޔާސުއްދީން ސްކޫލް ހޯލުގައި ބާއްވަން އުޅުނު ޖަލްސާއަށް ފުލުހުން ހުރަސްއަޅައި، ހިނގާދިޔަ ހަމަނުޖެހުންތަކުގައި ބައެއް އާއްމު ރައްޔިތުންނާއި، ފުލުހުންނަށް އެކިވަރުގެ އަނިޔާ ލިބިފައިވެއެވެ.
