ޒަވީ އަށް ވުރެ ބާސެލޯނާގެ ސްޓައިލަށް އަހަރެން ލޯބިކުރަން: ލުއިސް އެންރީކޭ

ބާސެލޯނާގެ މިހާރުގެ ކޯޗު ޒަވީ ހަނާންޑޭޒަށް ވުރެ ބޮޑަށް އެކުލަބުގެ ސްޓައިލަށް ލޯބިކުރަނީ އޭނާ ކަމަށް ފްރާންސްގެ ޕީއެސްޖީގެ ކޯޗު ލުއިސް އެންރީކޭ ބުނެފި އެވެ.

އޭނާ މިހެން ބުނީ މި ދެ ޓީމު ޗެމްޕިއަންސް ލީގުގެ ކުއާޓާ ފައިނަލުގައި މިރޭ ކުޅޭ މެޗުގެ ކުރިން ވާހަކަ ދައްކަމުންނެވެ.

ޒަވީ އާއި ލުއިސް އެންރީކޭ އަކީ ބާސެލޯނާ އަށް ކުޅުނު ދެ ކުޅުންތެރިންނެވެ. ފަހުން ލުއިސް އެންރީކޭގެ ކޯޗުކަމުގައި ޒަވީ އަކީ ޓީމުގެ ކެޕްޓަނެވެ. ނަމަވެސް މިއީ ކޯޗުންގެ ގޮތުގައި މި ދެ އެކުވެރިން ބައްދަލުކުރާ ފުރަތަމަ ފަހަރެވެ. އަދި މިއީ އެންރީކޭ އޭނާގެ ކުރީގެ ޓީމާ ދެކޮޅަށް ނުކުންނަ ފުރަތަމަ ފަހަރުވެސްމެ އެވެ.

އުމުރުން މިހާރު 53 އަހަރުގެ ކޯޗު އޭނާގެ ކުރީގެ ޓީމާ ދެކޮޅަށް ނުކުންނައިރު އޭނާ ބުނީ މިއީ ނަފްސާނީ ގޮތުން ވެސް ތަފާތު އިހުސާސެއް ކުރެވޭ ކަމެއް ކަމަށާއި ބާސެލޯނާ އަކީ އޭނާ އުޅެބޮޑުވިތަން ކަމަށެވެ. އަދި 8 އަހަރު އެކުލަބަށް ކުޅެ ކެޕްޓަންކަމާއި ކޯޗުކޮށް ކޮށްދިނުމުން ބާސެލޯނާ އާއި އޭނާ ވަނީ ވަރަށް ބޮޑަށް ގުޅިފައި ކަމަށެވެ.

ހަމަ މިފަދައިން ޒަވީ އަކީ ވެސް ކުލަބުގެ ކެޕްޓަންކަންކޮށް، 500ވުރެ ގިނަ މެޗު ކުޅެދީފައިވާ މިހާރުގެ ކޯޗެވެ.

ބާސެލޯނާ އާއި ޕީއެސްޖީގެ އެންމެ ތަފާތު މެޗަކީ 2017 ވަނަ އަހަރުގެ ޗެމްޕިއަންސް ލީގުގެ ދެ ވަނަ ބުރުގައި ކުޅުނު މެޗެވެ. ޕީއެސްޖީގެ ދަނޑުގައި 4-0އިން ބާސެލޯނާ ބަލިވި ނަމަވެސް އެމީހުން ޕީއެސްޖީ މުބާރާތުން ކަޓުވާލީ އަމިއްލަ ދަނޑުގައި 6-1އިން މޮޅުވެގެންނެވެ. އެއިރު ބާސެލޯނާގެ ކޯޗަކީ އެންރީކޭ އެވެ. މިކަމާބެހޭ ގޮތުން އޭނާ ވާހަކަ ދައްކަން ބޭނުމެއްނުވި އެވެ.