ސްޕެނިޝް ލީގުގައި ލެވަންޓޭއާ ދެކޮޅަށް ކުޅުނު މެޗުން، ފަހު ވަގުތު އެންމެ ފަހުގެ ޗެމްޕިއަން ބާސެލޯނާ މޮޅުވެއްޖެ އެވެ.

ލެވަންޓޭގެ އަމިއްލަ ދަނޑުގައި ހޮނިހިރު ދުވަހުގެ ރޭ ދަންވަރު ކުޅުނު މެޗު ބާސެލޯނާ އިން ކާމިޔާބު ކުރީ 3-2 އިންނެވެ. މެޗުގައި ލެވަންޓޭ އިން ދެ ލަނޑު ޖަހައިގެން ކުރި ހޯދާފައި ވަނިކޮށް، ބާސެލޯނާ އިން ވަނީ ފަހަތުން އަރައި ތިން ލަނޑު ޖަހައިގެން މެޗުން މޮޅުވެފަ އެވެ.

މެޗުގެ ފުރަތަމަ ހާފުގައި ލެވަންޓޭ އިން ވަނީ ބާސެލޯނާ ކޮޅަށް ދެ ލަނޑު ޖަހައިގެން ލީޑު ނަގައިފަ އެވެ. މެޗު ފަށައިގެން 15 ވަނަ މިނެޓުގައި ލެވަންޓޭ އަށް ލީޑު ނަގައިދިނީ އިވާން ރޮމެރޯ އެވެ.

އޭގެ ފަހުން ފުރަތަމަ ހާފުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި އެ ޓީމުން ލީޑު ފުޅާ ކުރީ، ލިބުނު ޕެނަލްޓީ ކާމިޔާބު ކޮށްގެންނެވެ. އެ ޕެނަލްޓީ ކާމިޔާބުކޮށް ލެވަންޓޭ އަށް ލީޑު ފުޅާ ކޮށްދިނީ ޖޯސް ލުއިސް މޮރާލްސް އެވެ.

މެޗުގެ ދެ ވަނަ ހާފު ފަށައިގެން ހަތަރު ވަނަ މިނެޓުގައި ބާސެލޯނާ އިން ވަނީ ލަނޑު ޖަހައި ފަރަގު ކުޑަ ކޮށްފަ އެވެ. ސްޕެއިންގެ ޒުވާން ކުޅުންތެރިޔާ ލަމީން ޔަމާލް ތަނަވަސްކޮށްދިން ފުރުސަތެއްގައި އެ ލަނޑު ޖެހީ ޕެޑްރީ އެވެ.

އޭގެ ދެ މިނެޓު ފަހުން ބާސެލޯނާ އިން ވަނީ ދެ ވަނަ ލަނޑެއް ޖަހައި މެޗުގެ ނަތީޖާ ހަމަހަމަ ކޮށްފަ އެވެ. އެ ލަނޑު ބާސެލޯނާ އަށް ޖަހައިދިނީ ފެރާން ޓޮރޭސް އެވެ. އެ ލަނޑު ޖަހަން ޓޮރޭސް އަށް ފުރުސަތު ތަނަވަސްކޮށްދިނީ ރަފީނިއާ އެވެ.

މެޗުގައި އިތުރު ލަނޑު ޖަހަން ވެސް ބާސެލޯނާ އިން ވަނީ ފުރުސަތު ތަނަވަސްކޮށްފަ އެވެ. މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ބާސެލޯނާ މޮޅުވީ ލެވަންޓޭގެ ޑިފެންޑަރު އުނާއި އެލްޖެޒަބާލް އަތުން ބައި ކޮޅަށް ވަތް ލަނޑުންނެވެ.

މެޗަށް ފަހު ވާހަކަ ދައްކަމުން ބާސެލޯނާގެ ކޯޗު ހަންސީ ފްލިކް ބުނީ، ރަނގަޅު ކުރަން ޖެހޭ ކަންތައްތައއް ހުރި ނަމަވެސް، ކުޅުންތެރިންގެ ފަރާތުން ފެނުނު މަސައްކަތާ މެދު ހިތްހަމަ ޖެހޭ ކަމަށެވެ. ޚާއްސަކޮށް މެޗުން ތިން ޕޮއިންޓު ލިބުމަކީ އޮތް ހިތްހަމަ ޖެހުމެއް ކަމަށް ފްލިކް ބުންޏެވެ.

އޭނާ ބުނީ ކުރިއަށް ހުރި މެޗުތަކަށް ނިކުންނާނީ ރަނގަޅު ކުރަން ޖެހޭ ކަންކަމަށް ޚާއްސަ އިސްކަމެއް ދީގެން ކަމަށާއި، ކޮންމެ މެޗަކުން ވެސް ޕޮއިންޓެއް ގެއްލުވާ ނުލުމަކީ ބާސެލޯނާ އަށް މުހިންމު ކަމެއް ކަމަށެވެ.

ލީގުގައި ދެން ބާސެލޯނާ އަށް އޮންނާނީ ރަޔޯ ވަޔެކާނޯއާ ދެކޮޅަށް ކުޅޭ މެޗެވެ.