ދުނިޔޭގެ ފުޓްބޯޅައިގައި މައިގަނޑު ގޮތެއްގައި މިހާރު އޮތީ ބާސެލޯނާގެ ޑީއެންއޭ ކަމަށާއި މިހާރު އެކަން ދަސްކުރަންވީ ކުޅުންތެރިން ކަމަށް އެ ޓީމުގެ ކޯޗު ޒަވީ ހަނާންޑޭޒް ބުނެފި އެވެ.

އޭނާ މިހެން ބުނީ ޗެމްޕިއަންސް ލީގުގެ ކުއާޓާ ފައިނަލުގައި މިރޭ ފްރާންސްގެ ޕީއެސްޖީއާ ދެކޮޅަށް ނުކުންނަ މެޗުގެ ކުރިން ވާހަކަ ދައްކަމުންނެވެ. ޒަވީ މިފަދައިން ބުނީ ޗެމްޕިއަންސް ލީގުގެ ގަދަ އަށް ޓީމުގެ ތެރެއިން ހަތަރު ޓީމެއްގައި ތިބީ ބާސެލޯނާއިން ތަމްރީނުވި ކުރީގެ ކުޅުންތެރިން ކަމަށްވުމުންނެވެ. އެއީ ޒަވީ އާއި ޕީއެސްޖީގެ ކޯޗު ލުއިސް އެންރީކޭ އާއި މެންޗެސްޓާ ސިޓީގެ ކޯޗު ޕެޕް ގާޑިއޯލާ އާއި އާސެނަލްގެ ކޯޗު މިކޭލް އާޓެޓާ އެވެ. މީގެ ތެރެއިން އެންރީކޭ އާއި ގާޑިއޯލާ އަކީ ބާސެލޯނާގެ ކާމިޔާބު ދެ ކޯޗުން ވެސްމެ އެވެ.

އޭނާ އަދި ބުނީ ޕީއެސްޖީ އަކީ ވަރުގަދަ ޓީމެއް ކަމަށެވެ.

އޭނާ ބުނީ ބާސެލޯނާ އާއި ޕީއެސްޖީގެ ކުރީގެ ނަތީޖާތަކުން ބާސެލޯނާ އަށް ހިތްވަރު ހޯދިދާނެ ކަމަށެވެ. ނަމަވެސް ޕީއެސްޖީގެ މިހާރުގެ ޓީމު ބަލިކުރަން ފަސޭހަނުވާނެ ކަމަށެވެ.

ބާސެލޯނާ އާއި ޕީއެސްޖީގެ އެންމެ ތަފާތު މެޗަކީ 2017 ވަނަ އަހަރުގެ ޗެމްޕިއަންސް ލީގުގެ ދެ ވަނަ ބުރުގައި ކުޅުނު މެޗެވެ. ޕީއެސްޖީގެ ދަނޑުގައި 4-0އިން ބާސެލޯނާ ބަލިވި ނަމަވެސް އެމީހުން ޕީއެސްޖީ މުބާރާތުން ކަޓުވާލީ އަމިއްލަ ދަނޑުގައި 6-1އިން މޮޅުވެގެންނެވެ. މިމެޗުގެ ވާހަކަ މިވަގުތު ދުނިޔޭގެ މީޑިޔާތަކުން ވަރަށް ބޮޑަށް ދައްކަ އެވެ.