މެމްބަރު ސައުދުގެ މަންމަ ނިޔާވެއްޖެ
6 އޯގަސްޓު 2017 | އާދީއްތަ 05:27ސައުދު މަންމަ ނިޔާވީ ހާޓް ފެއިލްވެގެން: އާއިލާ
މެމްބަރު ސައުދުގެ މަންމަ--
ރައްޔިތުންގެ މަޖިލީހުގެ ވިލިނގިލި ދާއިރާގެ މެމްބަރު ސައުދު ހުސައިންގެ މަންމަ ނާސިރާ އަހުމަދު ނިޔާވެއްޖެއެވެ.
ނިޔާވިއިރު އުމުރުފުޅަކީ 64 އަހަރެވެ.
"ރާއްޖެއެމްވީ"އަށް މައުލޫމާތު ދެމުން މެމްބަރު ސައުދުގެ އާއިލާގެ މެމްބަރަކު ބުނީ ސައުދުގެ މަންމަ ނިޔުާވެފައިވަނީ ގިނަ ދުވަސްތަކެއް ވަންދެން ބަލިވެ އުޅުއްވުމަށްފަހު، ދިގު މުއްދަތަކަށް ބޭސްފަރުވާ ކުރައްވަމުން ގެންދަވަނިކޮށް ކަމަށެވެ.
ސައުދުގެ މަންމަ ނިޔާވެފަައި ވަނީ އައިޖީއެމްއެޗުގައި ފަރުވާ ދެމުން ދަނިކޮށް އާދިއްތަ ދުވަހުގެ ހެނދުނު، ހާޓް ފެއިލްވެގެންނެވެ.
ސައުދުގެ މަންމަ ނިޔާވިއިރު، ސައުދު ހުންނެވީ މަޖިލިސް މެމްބަރެއް ނޫންކަމަށް އިލެކްޝަންސް ކޮމިޝަނުންނާއި މަޖިލީހުން ނިންމާފައިވަނިކޮށް މިދިޔަ ޖުލައި މަހުގެ 24 ވަނަ ދުވަހު މަޖިލީހުގެ އިދާރާއަށް ވަދެވަޑައިގެންނެވި މައްސަލައިގައި 15 ދުވަހުގެ ޖަލު ބަންދެއްގައެވެ.
މީގެއިތުރުން، ސައުދުގެ މައްޗަށް ޓެރެރިޒަމްގެ ދައުވާ ވަނީ އުފުލާފައެވެ. ސައުދުގެ މައްޗަށް ޓެރަރިޒަމްގެ ދައުވާ އުފުލާފައިވަނީ ހައިކޯޓުގެ ދެކުނު ބްރާންޗްގެ ފަނޑިޔާރު ސުޖާއު އުސްމާނަށް އަވަހާރަ ކޮށްލަން އުޅުނު ކަމުގެ ތުހުމަތެއްގައެވެ.
ސައުދުގެ މައްޗަށް ތުހުމަތުތަކެއް ކުރެވިފައިވާއިރު، ރައްޔިތުންގެ މަޖިލީހުގެ މެޖޯރިޓީ ސަރުކާރަށް ގެއްލުމާއެކު ސަރުކާރުން ދަނީ ރައްޔިތުންގެ މަޖިލީހުގެ އިދިކޮޅު ގިނަ މެމްބަރުން ތަކެއްގެ މައްޗަށް ތުހުމަތުތައްކޮށް ތަހުގީގުތައް ހިންގާ އަދި ޝަރީއަތްވެސް ކުރަމުންނެވެ.
މެމްބަރު ސައުދަކީ ކުރިން ސަރުކާރަށް ނިސްބަތްވާ ޕީޕީއެމް ޕާލަމެންޓްރީ ގްރޫޕްގެ މެމްބަރެކެވެ. ސަރުކާރާއި ސައުދާއި ދެމެދު މައްސަލަތައް އުފެދި ތުހުމަތުތައް ކުރެވެން ފެށީ ޕީޕީއެމް ދެ ފެކްޝަނަކަށް ބެހި، ރައީސުލްޖުމްހޫރިއްޔާ އަބްދުﷲ ޔާމީން އަބްދުލްގައްޔޫމް އާއި ކުރީގެ ރައީސް އަދި ޕީޕީއެމް ރައީސް މައުމޫން އަބްދުލްގައްޔޫމް އާ ދެމެދު މައްސަލަތައް ފެންމަތިވިފަހުން، ސައުދު ރައީސް މައުމޫންގެ އަރިހުގައި މަސައްކަތް ކުރައްވަން ފެއްޓެވި ހިސާބުންނެވެ.
