އެމްޑީޕީގެ ސަރުކާރުގައި ހުއްޓިފައި ހުރި މަޝްރޫޢުތައް ފެށި ކަމަށް ބުނެ ހަދަނީ ބުހުތާން ދޮގު - މޫކޭ

އެމްޑީޕީގެ ސަރުކާރުގައި ހުއްޓިފައި ހުރި މަޝްރޫޢުތައް ފެށި ކަމަށް ބުނެ މި ސަރުކާރުން ދައްކާ ވާހަކަތަކަކީ ބުހުތާން ދޮގު ވާހަކަތަކެއް ކަމަށް އާރުޑީސީގެ ކުރީގެ މެނޭޖިންގ ޑިރެކްޓަރު އަދި އެމްޑީޕީގެ ޤައުމީ މަޖިލީހުގެ މަޑުއްވަރީ ދާއިރާގެ ރައީސް މޫސާ އަލީ މަނިކު (މޫކޭ) ވިދާޅުވެއްޖެއެވެ.

އޭނާ މިހެން ވިދާޅުވި ރާއްޖެ ޓީވީގެ ފަލަސުރުހީ ޕްރޮގްރާމްގައި ވާހަކަދައްކަވަމުންނެވެ. އޭނާ ވިދާޅުވީ ވެރިކަަމަށް އައުމަށް ފަހު މަޝްރޫޢުތައް ކަނޑައަޅާ އެ މަޝްރޫޢުތައް ކުރިއަަށް ގެންދިއުމަކީ ކުއްލިއަކަށް ވާ ކަންކަން ނޫން ކަމަށެވެ. އަދި އެކަންކަމަކީ ވަރަށް ގިނަ މަޝްވަރާތަކެއްގެ މަތިން ކުރެވޭ ކަންކަން ކަމަށެވެ. މީގެ އިތުރުން އާރްޑީސީގެ މަގު ހެދުމުގެ މަޝްރޫޢުތަކާ މެދު ވެސް މި ސަރުކާރުން ފަތުރާފައި ވަނީ ދޮގު ވާހަކަތަކެއް ކަމަށް މޫސަ ވިދާޅުވިއެވެ. އެގޮތުން އާރްޑީސީ އިން ކުރިއަށް ގެންދިޔަ މަގު ހެދުމުގެ މަޝްރޫޢުތަކުގެ ތެރެއިން 17 މަޝްރޫޢުއެއްގެ މަސައްކަތް، މި ސަރުކާރު ވެރިކަމަށް އައި އިރު ހުއްޓިފައިވާ ކަމަށް މި ސަރުކާރުން ބުނި ނަމަވެސް، އެއީ ހަގީގަތެއް ނޫން ކަަމަށް އޭނާ ވިދާޅުވިއެވެ. އަދި މި ސަރުކާރުގެ ވެރިން ފެށުމަށް ފަހު މަގު ހެދުމުގެ 26 މަޝްރޫޢު ކުރިއަށްދާ ކަަމަށް ސަރުކާރުން ބުނެފައިވީ ނަމަވެސް، އެމްޑީޕީގެ ވެރިކަން ނިމުނުއިރު ވެސް 26 މަޝްރޫޢު އަށް ވުރެ ގިނަ މަޝްރޫޢު ކުރިއަށް ދިޔަ ކަމަށް އޭނާ ވިދާޅުވިއެވެ. އެހެންކަމުން މި ވެރިކަން ފެށި ފަހުން އަލަށް އެއްވެސް މަޝްރޫޢު އެއް ނެތް ކަަމަށް އޭނާ މޫސަ ވިދާޅުވިއެވެ.

އޭނާ އިތުރަށް ވިދާޅުވީ މިދިޔަ ސަރުކާރުން ފަށާފައިވާ ގިނަ މަޝްރޫއުތައް މިއަދު މި ސަރުކާރުން ހުއްޓާލާފައިވާ ކަމަށެވެ. އަދި އެކަމާއި ގުޅޭގޮތުން އާއްމުން ސުވާލުކުރުމުން އެކަމަށް ރަނގަޅަށް ޖަވާބުދާރީވަމުން ނުދާކަމަށް ވެސް މޫސަ ވިދާޅުވިއެވެ.